Haweeney bastoolad ku hubeysan oo markii ugu horeysay dil ka geysatay Muqdisho

0
14

Haweeney ku hubeysan bastoolad ayaa xalay nin ka tirsan dadka degaanka ku toogatay xaafada Xamar bile oo ka tirsan degmada Warta nabada ee magaalada Muqdisho.

Goob joogayaal ayaa xaqiijiyey in haweeneydan oo lebisneyd dharka ciidanka Booliska Soomaaliyeed ay la soo baxday bastoolad ay rasaas ku furtay ninkan oo ku sugnaa goob ay ku fiidsadaan shacabka degaanka.

Ninka la dilay ayaa markiiba goobta ku naf waayey, iyadoo dadkii goobta ku sugnaa ay kala carareen argagax awgeed, waxaana goobtaas ka baxsatay haweeneydii dilka fulisay.

Lama oga sababta ay haweeneydan u dishay ninkan shacabka ah iyo cida ka dambeysay, mana jirto illaa hadda cid sheegatay.

Dilkan ayaa la yaab iyo fajac ku abuuray maadaama ay fulisay haweeney, iyadoo horey loo maqli jiray in dilalka noocan ah ee magaalada ka dhaca ay fuliyaan rag hubeysan, waana markii ugu horeysay ee la maqlo haweeney bastoolad wadata oo dil ka geysatay caasimada.

LEAVE A REPLY

Please enter your comment!
Please enter your name here