Madaxweyne Farmaajo oo kulan deg deg ah la leh Hey’addaha ammaanka

0
332

Madaxweynaha Soomaaliya Maxamed C/llaahi Farmaajo ayaa xilligan kulan albaabada u xiran la leh Taliyeyaasha Ciidamada iyo Saraakiisha Hey’addaha ammaanka.

Kulankan oo ahaa mid deg deg ayaa waxaa shir guddoominaya Madaxweynaha ahna Taliyaha Guud ee Ciidamada qalabka sida, waxaa kulanka looga hadlayaa xaalada ammaan ee dalka.

Ilo lagu kalsoonaan karo oo ay heleyso Jowhar.com ayaa sheegaya in waxyaabaha kulanka looga hadlayo ay ka mid tahay shaqaaqadii todobaadkii hore dhex martay Ciidamada dowladda, taasoo sababtay dhimasho iyo dhaawac iyo qaraxii shalay ka dhacay Muqdisho.

Arrimaha kale ee kulanka looga hadlayo ayaa ka mid ah dagaalka ka dhanka ah Al-Shabaab, iyadoo shalay weerar ay ku qaaday Ciidamada AMISOM ku dishay askar fara badan.

Madaxweyne Farmaajo ayaa la filayaa in awaamiir la xiriira ammaanka inuu siiyo saraakiisha ciidamada ee uu xilligan kulanka la leeyahay.

Wariyeyaasha ayaa dibad joog ka ah kulanka, waxaana lagu wadaa in saxaafada looga warbixiyay marka uu soo gaba gaboobo kulanka.

Bishii April ee sanadkan ayay aheyd markii Madaxweyne Farmaajo oo xirnaa dareyska ciidamada uu sheegay in dalka ku jiro xaalad dagaal ah, isla markaana Al-Shabaab ay ku soo afjari doonaan labo sano gudahood.