Madaxweynaha Hir-shabeelle Oo Hambalyada Ciida u Diray Shacabka Maamulkiisa

0
72

War qoraal ah oo ka soo baxay Xafiiska Madaxweynaha Hir-Shabeelle ayaa lagu yiri Madaxweynaha Hir-Shabeelle Dr Maxamed Cabdi Waare oo ku hadlaya Afka Golayaasha Hir-Shabeelle ayaa waxaa uu Hambalyo ku aadan Munaasibadda Ciidul Adxaa u dirayaa dhammaan Ummadda Soomaaliyeed gaar ahaan Reer Hir-Shabeelle.

Madaxweynaha ayaa sheegay in maalmaha farxadeed aawgeed loo baahan yahay inay is cafiyaan dhammaan Ummadda Soomaaliyeed, isla markaana laga farxiyo dadka danyarta ah iyo ubadkeena soo koraya.

‘’ Illaah waxaan ka baryayaa in sanadkaan sanadkiisa kale nagu gaarsiiyo Nabad-gelyo, Horumar, Wadajir , Midnimo iyo inaan ka shaqeyno midnimadeena iyo horumarkeena ‘’ Ayuu yiri Madaxweyne Waare.

‘’ Waxaan rajeynayaa in Soomaaliya wanaagsanaato, in Soomaaliya horumarto, in Hirshabelle meesha ay hada joogto sanadka dambe meel ka fiican ay gaarto dhanka horumarka iyo nabad-gelyada ‘’ ayuu hadalkiisa sii raaciyey Madaxweyne Waare.

Madaxweynaha Hir-Shabeelle waxaa uu sidoo kale baaq nabadeed oo ku aadan joojinta colaad beeleedyada mararka qaar Hirshabelle ka dhaca in lagu bedelo walaalnimo iyo wax wada qabsi.

‘’ Waxaan rajeynayaa in caqligu shaqeeyo , waxaana rabaa inaan ku booriyo cilimo udiinka, madax dhaqameedka, ganacsatada , waxgaradka reer Hirshabelle inay u kacaan sidii ay uga qeyb qaadan lahaayeen Horumarinta Dowladnimada’’ Ayuu yiri Madaxweynaha Hirshabelle Dr Maxamed Cabdi Waare.

Ugu dambeyntii Waxa sidoo kale Ciida Carafo uu u diray Guud ahaan Ciidamada Qalabka Sida ee Soomaaliyeed, kuwa Hirshabelle, iyo ciidamada Amisom Ka howlgala Hirshabelle Gaar ahaan Ciidamada Hiil Walaal Ee Jabuuti Iyo Shacbiga Walaalaha Jabuuti, isagoo u rajeeyay caafimaad qab iyo Horumar.