Xoogag taabacsan Al-Shabaab ayaa weeraray deegaan lagu magacaabo Garile oo ka tirsan Gobolka Gedo, kuna dhow xuduuda u dhaxeysa Soomaaliya iyo Kenya, halkaasoo ay ku dileen Taliyihiin deegaanka.
Weerarkan oo dhacay xalay saqdii dhexe ayaa sidoo kale Al-Shabaab waxay ku gubeen illaa saddex gaari, iyadoo iska hor imaad kooban uu halkaas ka dhacay.
Guddoomiyaha degmada Ceelwaaq Ibraahim Guuleed Aadan oo la hadlayay Idaacada BBC-da ayaa sheegay in Taliyaha ku dhintay weerarkaas uu ku dhintay xabadihii u horeeyay ciidamo ku sugnaa fariisimo ay ku lahaayeen agagaarka deegaanka.
Sidoo kale waxaa uu sheegay in Al-Shabaab ka faa’ideysteen ciidamo badan oo aan ku sugneyn deegaanka Gariley, isla markaana inta badan ciidamadii dowladda ay aadeen dhinaca Baardheere.
Guddoomiyaha ayaa sheegay in ciidamo u direen deegaanka, si ay u xaqiijiyaan ammaanka deegaanka Gariley, waxaana uu xusay in ciidamada ay iska difaaci doonaan hadii mar kale Al-Shabaab soo weeraraan deegaanka.
Al-Shabaab ayaa sheegatay mas’uuliyada weerarka, isla markaana ay dishay taliyihii deegaanka Gariley, ayna mid ka mid ah baabuurtii tiil soo qaadatay, labo ay gubeen.
