Arbaco 25 Feb 2026 {HMC} Ugu yaraan 16 qof, oo ay ku jiraan siddeed haween iyo carruur ah, ayaa ku dhintay shil gaari oo ka dhacay koonfurta Yemen, sida ay sheegeen mas’uuliyiinta deegaanka uu shilka ka dhacay.
Shilkan ayaa ka dhacay deegaanka Lahmar ee degmada Al-Mahfad, oo ku taalla waddo muhiim ah oo isku xirta gobollada Abyan iyo Shabwa, maalintii Talaadada.
Isku dhaca baska yar iyo gaari xamuul ah ayaa sababay dab xooggan oo gebi ahaanba qabsaday baska, mana jirin wax rakaab ah oo ka badbaaday, sida ay werisay wakaaladda wararka ee Anadolu Agency.
Wakaaladda wararka ee Reuters, oo soo xiganaysa bayaan ay soo saareen saraakiil amni, ayaa sheegtay in shilka uu ka dhashay “isku day dhaafid khaldan” oo ka dhacay meel qalooc halis ah. Waxaa sidoo kale la sheegay in baska uu ku shaqaynayay gaas, taasoo sababtay dab degdeg ah oo keentay in dhammaan dadkii saarnaa ay ku gubtaan.
Shilkan Talaadadii dhacay ayaa noqday kii labaad ee ugu dhimashada badnaa ee ka dhaca Yemen sannadihii u dambeeyay, isla markaana ah kii ugu xumaa ee ilaa hadda dhacay 2026.
Sannadkii hore, 17 qof ayaa ku dhintay shil kale oo ka dhacay waddo buuraley ah oo halis ah oo ku taalla gobolka Abyan.
Kormeerayaal maxalli ah ayaa tilmaamay dhowr sababood oo kordhiya khasaaraha shilalka waddooyinka, oo ay ka mid yihiin dhulka buuraleyda ah ee Yemen oo halis dabiici ah leh, waddooyin dayacmay, iyo burburka ka dhashay colaadda in ka badan toban sano u dhexeysay ciidamada dowladda iyo fallaagada Xuutiyiinta.
Yemen ayaa ku jirtay rabshado iyo xasillooni darro tan iyo 2014, markaas oo Xuutiyiintu qabsadeen qaybo badan oo dalka ah, oo ay ku jirto caasimadda Sanca.
