Khamiis 2 April 2026 {HMC} – Hoggaamiyaha Xisbiga Wadajir ahna xildhibaan ka tirsan Baarlamaanka Federaalka, Cabdiraxmaan Cabdishakuur Warsame, ayaa si adag u cambaareeyay go’aanka dowladda federaalka ay ku magacowday hoggaan ku-meel-gaar ah oo loo dhiibay maamulka Koonfur Galbeed, isagoo ku tilmaamay mid ka hor imaanaya dastuurka dalka.
Xildhibaan Cabdiraxmaan Cabdi Shakuur Warsame, ayaa bayaan uu soo saaray maanta ku sheegay in magacaabista Ra’iisul Wasaare ku-xigeenka labaad, Jibriil Cabdirashiid Xaaji Cabdi, loo magacaabay hoggaanka KMG ee Koonfur Galbeed ay tahay “xadgudub cad oo sharci darro ah” oo ka dhan ah Dastuurka Federaalka iyo kan dowlad-goboleedka.
“Waa jebin cad oo sharci iyo dastuurba ah in dowladda federaalka ay maamul u magacowdo dowlad-goboleed leh hay’ado dastuuri ah oo shaqeynaya,” ayuu yiri Xildhibaan Cabdiraxmaan.
Wuxuu sidoo kale xusay in Dastuurka Koonfur Galbeed uu dhigayo in marka madaxweynaha iscasilo la qabto doorasho cusub muddo 30 maalmood gudahood ah, isagoo carrabka ku adkeeyay in aysan jirin wax sharci ah oo u oggolaanaya dowladda federaalka inay la wareegto ama maamusho maamulkaas.
Sidoo kale, Xildhibaanka ayaa ka digay in tallaabadan ay muujinayso jihayn ku wajahan awood urursi, taas oo wiiqi karta nidaamka federaalka iyo ku dhaqanka sharciga. Wuxuu ku eedeeyay maamulka Madaxweynaha Soomaaliya Xasan Sheekh inuu wado ajande siyaasadeed oo lagu ballaarinayo awoodda dowladda dhexe isla markaana lagu saameynayo hannaanka doorashooyinka dalka.
“Tani waa bilowga dadaal qorsheysan oo lagu ururinayo awoodda, lagu burburinayo nidaamka federaalka, isla markaana lagu hoos geynaayo sharciga rabitaanka shaqsiyaad gaar ah,” ayuu yiri.
Wuxuu ka digay in dhaqamada kali-talisnimo sida takooridda, ku-takri-falka awoodda iyo maamul-xumadu ay ahaayeen sababihii horseeday burburkii dowladdii Soomaaliya ee dhacay sanadkii Burburkii Dowladdii Soomaaliya 1991, isagoo ku baaqay in aan dib loogu laaban khaladaadkaas.
Dhaliishan ayaa timid kadib markii Ra’iisul Wasaaraha Soomaaliya, Xamsa Cabdi Barre, uu soo saaray wareegto uu ku magacaabay Jibriil Cabdirashiid inuu noqdo hoggaamiyaha KMG ee Koonfur Galbeed.
Dowladda federaalka ayaa sheegtay in tallaabadan looga gol leeyahay in lagu xaqiijiyo sii socoshada howlaha maamulka, dib-u-soo celinta dowladnimada iyo diyaarinta doorasho qof iyo cod ah.
Arrintan ayaa ku soo beegmeysa xilli ciidamada dowladda ay si toos ah ula wareegeen amniga magaalada Baydhabo, taas oo keentay iscasilaaddii madaxweynihii hore ee maamulkaas, Cabdicasiis Xasan Maxamed Laftagareen, isla markaana dhalisay isbeddel siyaasadeed oo degdeg ah.