Talaado 10 March 2026 {HMC} Human Rights Watch ayaa Isniintii ku eedeysay Israel inay adeegsatay hubka gubi kara ee white phosphorus weerarro lagu qaaday magaalada koonfurta Yahmar, taas oo qayb ka ah dagaalka ay la jirto Hezbollah ee qarxay toddobaadkii hore.
Ururka xuquuqda aadanaha ayaa warbixin ku sheegay: “Ciidanka Israel si sharci-darro ah ayay u adeegsadeen hubka nooca white phosphorus,” intii lagu jiray weerar madaafiic ah oo lagu qaaday guryo ku yaalla Yahmar 3-da Maarso.
Madaafiicda white phosphorus waa kuwo si fudud u gubta marka ay la kulmaan ogsijiin. Badanaa waxaa loo adeegsadaa in lagu sameeyo qiiq ama lagu iftiimiyo goobta dagaalka, laakiin sidoo kale waxaa loo isticmaali karaa hub keeni kara gubasho halis ah, dhibaato neefsasho, iyo dhaawac xubnaha jirka ah, mararka qaarna waxay sababi karaan geeri.
Human Rights Watch waxay sheegtay in ay xaqiijisay oo ay goob ahaan u aqoonsatay toddobo sawir oo muujinaya madaafiicda nooca white phosphorus oo ku qarxaysa hawada kor ka xiga xaafad dad degan yihiin. Isla waqtigaas, kooxaha difaaca rayidka ayaa la tacaalay ugu yaraan laba dab oo ka kacay laba guri oo ku yaalla magaalada, iyo gaari gubtay.
Dhanka kale, milatariga Israel ayaa sheegay in aysan hadda hayn wax macluumaad ah oo xaqiijinaya isticmaalka madaafiic ay ku jirto maadada white phosphorus gudaha Lebanon. Ciidanka Israel ayaa sidoo kale xusay in siyaasaddoodu aysan ahayn isticmaalka madaafiic noocaas ah.