Sabti 13, Dec 2025 {HMC} Dowladda Mareykanka ayaa wajahaysa su’aalo iyo muran sii xoogeysanaya kaddib weerarro cirka ah oo ay ciidamadeedu ka fuliyeen Badda Kariibiyaanka, kuwaas oo lagu bartilmaameedsaday doonyo lagu eedeeyay ka ganacsiga daroogada.
Wararku waxay sheegayaan in weerarradan ay sababeen dhimasho, arrintaas oo dhalisay walaac la xiriira sharciyadda iyo habraacyada la adeegsaday.
Xildhibaanno Mareykan ah iyo hay’ado kala duwan ayaa dalbanaya in si buuxda loo shaaciyo xogta iyo muuqaallada la xiriira howlgalka, si loo caddeeyo waxa dhab ahaan dhacay.
Murankan ayaa sidoo kale saameyn ku yeeshay hoggaanka milatariga Mareykanka, iyadoo taliyaha masuulka ka ahaa hawlgallada Kariibiyaanka uu hawlgab noqday kaddib khilaaf ka dhashay qaabka weerarrada loo fuliyay.
