Puntland oo walaac weyn ka muujisay dhaqdhaqaaqyada AS

Isniin, 28 Jully 2025 {HMCPuntland ayaa cambaareysay weerarkii kooxda AS ay shalay kula wareegtay degmada Maxaas ee gobolka Hiiraan, kaas oo sababay khasaare naf iyo maalba leh.

War-saxaafadeed kasoo baxay madaxtooyada Puntland ayaa  tacsi  loogu diray ehelada iyo qoysaska dadkii ku dhintay weerarka, gaar ahaan saraakiisha iyo ciidanka geesiyaasha Soomaaliyeed ee ku naf waayey dagaalka lagula jiro kooxda AS

Sidoo kale, Puntland waxay ammaan u jeedisay ciidamada Dowladda Federaalka iyo kuwa deegaanka ee Macawiisleeyda, kuwaas oo muujiyey difaac geesinimo leh, iyagoo u taagan ilaalinta shacabka.

Puntland ayaa sidoo kale walaac weyn ka muujisay dhaqdhaqaaqyada sii kordhaya -AS oo isku dayeysa inay dib u qabsato deegaanadii horay looga xoreeyey iyo kuwa cusub oo muhiim ah.Waxay sheegtay in loo baahan yahay iskaashi dhab ah oo u dhexeeya dowladaha xubnaha ka ah Federaalka si loo helo qorshe mideysan oo lagu wajaho halista AS, iyadoo sheegtay inay diyaar u tahay inay door muuqda ka qaadato dadaallada lagu sifeynayo dalka.

Puntland waxay ugu dambayn ugu baaqday beesha caalamka inay taageero muuqata siiso dowladda Federaalka iyo dowladaha xubnaha ka ah, si loo xoojiyo dagaalka ka dhanka ah kooxaha xagjirka ah ee khalkhalgelinaya xasilloonida Soomaaliya.