Talaado, 3 Maarso 2026 {HMC} Shiinaha waxay dib u adkaysay taageerada ay u hayso Iiraan kadib wada hadal dhex maray wasiirrada arrimaha dibadda ee Beijing iyo Tehran, iyadoo arrintan ay ku soo beegantay kororka xiisadaha gobolka.
Wasiirka Arrimaha Dibadda ee Shiinaha, Wang Yi, ayaa u sheegay dhiggiisa Iiraan, Abbas Araghchi, in Beijing ay garab taagan tahay Tehran “ilaalinta madaxbannaanideeda, amnigeeda, dhulkeeda iyo sharafta qarankeeda.”
Wuxuu carrabka ku adkeeyay in Shiinuhu uu taageerayo Iiraan “ilaalinta xuquuqdeeda iyo danaha sharciyeysan,” sida lagu sheegay war lagu daabacay bogga Wasaaradda Arrimaha Dibadda ee Shiinaha.
Wang ayaa sidoo kale sheegay: “Shiinuhu wuxuu ku baaqayaa in Mareykanka iyo Israa’iil ay si degdeg ah u joojiyaan howlaha milatari, ay ka hortagaan sii kordhinta xiisadda, islamarkaana ay joojiyaan fiditaanka colaadda oo ku fida guud ahaan Bariga Dhexe.”
Wang oo ku baaqay diblomaasiyad
Isla maalintaas, Wang wuxuu wada hadallo telefoon la yeeshay wasiirrada arrimaha dibadda ee Faransiiska iyo Cumaan, isagoo ku baaqay in xal diblomaasiyadeed lagu dhammeeyo xiisadda sii xoogeysanaysa.
Wada hadal uu la yeeshay Wasiirka Arrimaha Dibadda ee Faransiiska, Jean-Noel Barrot, ayuu Wang ku sheegay in dalalku aysan isticmaalin “awood milatari si ay weerarro aan loo meel dayin ugu qaadaan dalal kale,” sida ay sheegtay wakaaladda wararka ee dowladda Shiinaha.
Wadahadal kale oo uu la yeeshay Wasiirka Arrimaha Dibadda ee Cumaan, Badr Albusaidi, ayuu Wang ku ammaanay “horumarka aan horay loo arag” ee laga gaaray wada-hadallada ay Muscat dhexdhexaadinaysay ee lala lahaa Iiraan, isagoo ku boorriyay dhammaan dhinacyada inay dedejiyaan xabbad-joojin degdeg ah.
Wuxuu sheegay in Shiinuhu uu qiimeeyo “dalabaadka sharciyeysan ee dowladaha Khaliijka” isla markaana uu taageerayo ilaalinta madaxbannaanidooda iyo amniga qarankooda, balse uu xusay in dagaalku muddada fog uusan dan ugu jirin.
Weerar wadajir ah oo ay Mareykanka iyo Israa’iil bilaabeen tan iyo Sabtidii ayaa la sheegay inay ku dhinteen saraakiil sare oo Iiraaniyiin ah, oo ay ku jirto hoggaamiyaha ruuxiga ah ee Iiraan, Ayatollah Ali Khamenei.
Tehran ayaa kaga jawaabtay weerarro diyaarado aan duuliye lahayn (drone) iyo gantaallo lagu bartilmaameedsaday goobo lala xiriiriyo Mareykanka oo ku yaalla dalalka Khaliijka, taasoo sababtay dhimashooyin badan. Afar askari oo Mareykan ah ayaa la dilay, afar kalena si daran ayaa loo dhaawacay.
Ururka Bisha Cas ee Iiraan ayaa sheegay in tirada dhimashada ee ka dhalatay duqeymaha cirka ee Mareykanka iyo Israa’iil tan iyo Sabtidii ay gaartay 555 qof.