Isniin 2 March 2026 {HMC} Shirkadda maraakiibta ee dalka Denmark laga leeyahay ee Maersk ayaa Axaddii ku dhawaaqday inay hakisay maraakiibteeda mara marinka Badda Hormuz, kadib warar sheegayay in marinkaasi la xiray kaddib weerarro ay Maraykanka iyo Israa’iil ku qaadeen Iran.
Maersk ayaa bayaan ay soo saartay ku tiri:
“Badbaadada shaqaalaheena, maraakiibteena iyo xamuulka macaamiisha ayaa ah mudnaantayada koowaad. Waxaan joojinay dhammaan maraakiibta ka gudbaya Marinka Hormuz ilaa amar dambe.”
Shirkaddu waxay sidoo kale sheegtay in dhammaan safarrada maraakiibta ee u kala goosha:
Bariga Dhexe iyo Hindiya ilaa Badda Mediterranean-ka, iyo
Bariga Dhexe iyo Hindiya ilaa Xeebta Bari ee Maraykanka,
loo weecin doono marinka Cape of Good Hope (Koonfur Afrika) ilaa amar dambe, sababo la xiriira xaaladda amni ee sii xumaanaysa ee gobolka.
Sidoo kale shirkadda maraakiibta ee Mediterranean Shipping Company (MSC) ayaa ku dhawaaqday inay hakisay dhammaan dalabyadii xamuulka caalamiga ah ee loo dirayay Bariga Dhexe ilaa ogeysiis dambe.
Maraykanka iyo Israa’iil ayaa Sabtidii weerar ku qaaday Iran, halka Iran ay ka jawaabtay gantaallo iyo diyaarado aan duuliye lahayn (drone) oo ay ridday.
Warbaahinta Iran ayaa Sabtidii sheegtay in Marinka Hormuz uu si dhab ah u xirmay, kadib weerarrada ay Maraykanka iyo Israa’iil ku qaadeen dalkaasi.
Iran ayaa Axaddii xaqiijisay geerida hoggaamiyihii sare Ayatollah Cali Khamenei iyo mas’uuliyiin sare oo kale, kuwaas oo ku dhintay weerarrada ay Israa’iil iyo Maraykanku qaadeen.
Washington iyo Tel Aviv waxay ku eedeeyaan Tehran inay leedahay barnaamijyo nukliyeer iyo gantaallo oo halis ku ah Israa’iil — oo ah dalka keliya ee gobolka leh hub nukliyeer iyo xulafada Maraykanka.
Iran se waxay ku adkeysanaysaa in barnaamijkeeda nukliyeer uu yahay mid nabadeed, isla markaana aysan dooneyn inay samaysato hub nukliyeer.
