Talaado 20 Jun 2025 {HMC} Trump ayaa shaaciyay fariin uu sheegay in uu ka helay Madaxweynaha Faransiiska Emmanuel Macron.
Fariintaas oo u qornayd qaab farriin qoraal ah, ayaa Macron ku muujiyay in labada dhinac ay isku aragti ka yihiin arrimaha Suuriya, isla markaana ay wada shaqeyn ka sameyn karaan xaaladda Iiraan.
Macron ayaa sidoo kale sheegay inuusan fahmin mowqifka Mareykanka ee ku aaddan arrinta Greenland, balse uu rajeynayo in labada dal ay sii xoojiyaan iskaashigooda si loo gaaro guulo waaweyn.
Intaa waxaa dheer, Madaxweynaha Faransiiska ayaa soo jeediyay in la qabto kulan G7 ah oo ka dhaca Paris kadib shirka Davos, kaas oo ay ka qayb geli karaan dalal ay ka mid yihiin Ukraine, Denmark, Suuriya iyo Ruushka, inkastoo ay noqonayaan ka qaybgal dhinac ah.
Sidoo kale, Macron ayaa Trump ku casuumay casho ay wada qaataan magaalada Paris ka hor inta uusan dib ugu laaban Mareykanka.
Fariintan ayaa muujinaysa xiriirka diblomaasiyadeed ee u dhexeeya Faransiiska iyo Mareykanka, iyo sida ay labada dal uga wada hadlayaan arrimaha caalamiga ah ee xasaasiga ah.
