Jimco , October -20- 2023-{HMC} – Wararka ka imaanaya gobolka Galgaduud ayaa sheegaya in howlgal qorsheysan ay maanta ka sameeyeen ciidanka amaanka deegaanka Dawacooleey oo ah deegaan u dhaxeeya Xiindheere iyo Gadoon ee gobolka Galgaduud iney ku qabteen gaari xamuul ah oo kooxda Al-shabaab u socday.
Gaariga ciidanka ay gacanta ku dhigeen ayaa la sheegay inuu siday sahay ciidan oo aad u badan, Shidaal iyo Raashin.
Intaa kadib waxaa lasoo wariyay in xubno ka tirsan kooxda Al-shabaab oo ka war helay in gacanta lagu dhigay gaarigii sahayda u siday iney weerar kusoo qaadeen ciidanka amaanka.
Weerarkaas ayaa la sheegay inuu ahaa mid waqti kooban socday, islamarkaana lagu dilay 3 ka mid ah xubnahii shabaabka ee weerarka soo qaaday.
Warbaahinta qaranka ayaa goordhaw baahisay sawirada gaariga siday sahayda loo waday kooxda Al-shabaab ee haatan xaalad go’doon ah ku wajaheysa qeybo ka mid ah deegaanada gobolada Galgaduud iyo Mudug ee maamulka Galmudug.
