Isniin , October -30- 2023-{HMC} Ra’iisul Wasaaraha Xukuumadda Jamhuuriyadda Federaalka Soomaaliya Xamsa Cabdi Barre, ayaa maanta Xafiiskiisa ku qaabilay Madaxda Bangiga Ziraat Katilim ee laga leeyahay dalka Turkiga, kaas oo dhawaan xarun cusub ka hirgeliyey magaalada Muqdisho.
Ra’iisul Wasaaraha ayaa uga mahad-celiyey madaxda bangiga Ziraat Katilim hirgelinta xarunta cusub ee ay ka furteen Soomaaliya, taas oo kor u qaadaysa iskaashiga ganacsiga, horumarinta dhaqaalaha iyo adkeynta cilaaqaadka ganacsi ee u dhaxeeya labada bulsho ee walaalaha ah. Sida lagu yiri qoraal ka soo baxay Xafiiska Ra’iisul Wasaaraha.
Kulanka uu la yeeshay Ra’iisul Wasaaraha Xukuumadda Jamhuuriyadda Federaalka Soomaaliya Xamsa Cabdi Barre Madaxda Bangiga Ziraat Katilim ayaa waxaa ku wehelinayey Danjiraha Dowladda Turkiga u fadhiya Soomaaliya Mudane Ibrahim M. Yagli.
Bangiga Ziraat Katilim ayaa xarunta uu ku leeyahay magaalada Muqdisho xarriga laga jaray, iyada oo munaasabadda xarig jarka ay ka qeyb galeen qaar ka mid ah Golaha Wasiirrada Xukuumadda Soomaaliya, Guddoomiyaha Bankiga dhexe iyo qaar ka mid ah ganacsatada Soomaaliyeed.
