Khamiis November 30 2023 {HMC} Agaasimaha Hey’adda Sirdoonka iyo Nabadsugidda Qaranka (NISA), Mahad Salad, ayaa maanta si dhow u indha indheeyay isbeddelada dhanka amniga ah ee ka socda Suuqa Bakaaraha. Suuqa, oo hore u ahaa meel ay ku badnaayeen falalka amni darada iyo dilalka, ayaa haatan muujinaya horumar la taaban karo oo dhanka amniga ah.
Inta uu ku guda jiray kormeerkiisa, Mahad Salad waxa uu qiimeeyay sida ay u hirgaleen awaamiirtii Hey’adda NISA ee ahaa in ganacsatadu ku xiraan kaamirooyinka qarsoon ee CCTV goobahooda ganacsi. Tallaabadan ayaa looga golleeyahay in ay gacan ka geysato sugidda amniga, badbaadada nafta iyo hantida muwaadiniinta Soomaaliyeed ee suuqaas ku ganacsada.
Agaasimaha ayaa sidoo kale lugeeyay suuqa, isagoo si gaar ah ula kulmay qaar ka mid ah ganacsatada, isla markaana ka wareystay xaaladaha amniga ee suuqa iyo sida ay u arkaan isbeddeladan cusub.
