Arbaco 10, Dec 2025 {HMC} Golaha Caalamiga ah ee Iscafinta iyo Nabadda ayaa muujiyay sida ay ugu faraxsan yihiin uguna hanweyn yihiin soo dhawaynta aan caadiga ahayn ee loo sameeyay wafdigooda intii ay ku guda jireen booqashadooda rasmiga ah ee Jamhuuriyadda Federaalka Soomaaliya.
Goluhu wuxuu bogaadiyay soo dhawaynta kal iyo laabta ah ee ay u fidiyeen madaxda iyo shacabka Soomaaliyeed, iyo rabitaanka xooggan ee ay u qabaan in kor loo qaado dadaallada wadajirka ah iyo dhisidda iskaashi dhab ah oo u adeegaya mustaqbalka Soomaaliya, kana qayb qaata amnigeeda, xasiloonideeda, iyo barwaaqadeeda.
Guddoomiyaha Golaha, Mudane Axmed bin Maxamed Al-Jarwaan, ayaa bayaan uu soo saaray intii lagu guda jiray booqashada ku sheegay:
“Waxaan ka helnay Soomaaliya dal ka soo kabanaya dhibaatooyin iyo caqabado waaweyn, haddana leh rabitaan adag oo lagu soo celinayo xaaladdii caadiga ahayd iyo inaan dhisno mustaqbal la jaanqaadi kara rabitaanka shacabka Soomaaliyeed iyo waxa ay mudan yihiin marka la eego horumarka iyo xasilloonida.
Waxay ka tarjumaysaa rabitaan qaran oo daacad ah oo ah in la furo cutub cusub, oo lagu qeexay rajo, shaqo, iyo dib-u-dhis.”
Intii booqashadu socotay, wafdigu waxay arkeen dhaqdhaqaaq cajiib ah oo ka jira waddooyinka, suuqyada, dekedaha, iyo garoonka diyaaradaha.
Caruurta ciyaaraysa iyo bulsho muujinaysa rabitaan adag oo lagu noolaado ayaa ka tarjumaysa go’aan ka gaarista horumarka. Waxa kale oo la arkay dadaalka dowladda Soomaaliya ee lagu fududeynayo nolol maalmeedka dadka soo booqda, wufuudda rasmiga ah, ganacsatada, iyo maalgashadayaasha—talaabo cad oo loo qaaday xasilooni iyo furfurnaan.
Mudane Al-Jarwaan wuxuu xusay in Soomaaliya, oo leh taariikh qani ah iyo mawqif istaraatiijiyadeed oo muhiim ah Afrika, ay awood u leedahay in ay noqoto saaxiib firfircoon oo ka shaqeeya horumarinta nabadda iyo horumarka gobolka iyo adduunka.
Waxa uu intaa ku daray in Golaha Caalamiga ah ee Iscafinta iyo Nabadda uu ahmiyad gaar ah siinayo doorka Xukuumadda, Baarlamaanka, Bulshada Rayidka, Aqoonyahanka, iyo Ragga iyo Dumarka Soomaaliyeed ee hoggaaminaya marxaladda cusub ee dib-u-dhiska dalka, si loo hubiyo horumar waara iyo mustaqbal wanaagsan oo jiilalka soo socda.
Goluhu wuxuu caddeeyay in Soomaaliya ay tahay dal nabad jecel, taageera nabadda, isla markaana adduunku u baahan yahay in Soomaaliya ay dib ugu soo laabato qaab dhismeedka amniga gobolka iyo kan caalamiga ah.
Waxay ballanqaadeen inay la shaqeeyaan saaxiibadooda Soomaaliya si loo taageero dhammaan dadaallada kor u qaadaya Iscafinta, horumarinta, awood siinta haweenka iyo jiilalka mustaqbalka, iyo furfurnaan ballaaran oo lagu dhisayo dowlad xasilloon oo siisa dadkeeda fursado rajo mustaqbalka ah.
Mudane Al-Jarwaan wuxuu hadalkiisa ku soo gabagabeeyey:
“Ilaahey ha xafido Soomaaliya iyo dadkeeda sharafta leh, hoggaankeedana ha ku hanuuniyo wax kasta oo wanaag, barwaaqo, iyo xasillooni u ah dalkaan qaaliga ah.”