Axad 19 april 2026 {HMC} Ian Smith oo 81 jir ah, ayaa bilaabay inuu muuqaallo soo dhigo internetka si uu u xayeysiiyo buug sheeko ah oo uu isagu iskiis u daabacay; wuxuuna ku guulaystay inuu helo malaayiin taageerayaal ah isagoo bixinaya talooyin nololeed oo uu soo ururiyay 80-kii sano ee uu noolaa.
Ian Smith, oo deggan miyiga Britain, ayaa hadda maalintii laba jeer muuqaallo u soo duuba 1.5 milyan oo taageerayaashiisa ah; kuwaas oo xambaarsan farriimo togan oo dhiirigelin leh.
Xaaskiisa ayaa ku dhiirrigelisay inuu muuqaallada soo dhigo TikTok; wuxuuna sheegay inuu “is-adkeeyay” ka dib markii ay markii hore u sheegtay inuusan waligiis heli doonin xataa 100 taageerayaal ah.
“Waan ku tusi doonaa,” ayuu si kaftan ah ugu yiri.
“Waxaan ku iri, ‘Fiiri, haddii aan heli karo 100 taageerayaal ah, waxaan heli karaa 1,000. Haddii aan heli karo 1,000, waxaan heli karaa 100 kun’ – dhab ahaantii maysan iila muuqan inay taasi dhacayso; laakiin dadkii ayaa bilaabay inay i soo raacaan.”
Ka hor inta uusan Smith u soo weecan dunida baraha bulshada, wuxuu ka shaqaynayay dhakhtar ilkaha ah muddo ka badan 50 sano; wuxuuna hawlgab noqday sannadkii 2022.
Wuxuu bilaabay inuu qoro buug sheeko ah; in kasta oo uu buuggii uu diyaariyey u diray boqollaal madbacado ah, haddana wuxuu helay saddex jawaabood oo keliya.
Halkii uu ka quusan lahaa, wuxuu iskiis u daabacay buuggiisii, wuxuuna bilaabay inuu ku xayeysiiyo qaybta TikTok ee loogu talagalay dadka buugaagta jecel oo loo yaqaan “BookTok”. 18-kii bilood ee la soo dhaafay, wuxuu madashaas si joogto ah ugu soo gudbinayay farriimo dhiirigelin ah iyo fikrado togan.
Wuxuu sheegay inay “la yaab” ku noqotay inuusan helin wax jawaab diidmo ah ama faallooyin xun.
Isagoo la hadlayay barnaamijka BBC Look East, wuxuu yiri: “Waa wax aad loogu hoosaysiiyo.”
“Nin 81 jir ah ayaa fadhiya isagoo ku hadlaya taleefan yar, waxaana u imaanaya jawaabo ka imaanaya adduunka oo dhan,” ayuu yiri.
Ian ayaa intaas raaciyay: “Maalinta Khamiista, siddeedda fiidnimo ayaan toos u soo galaa; waxaa jira dad uga soo biiraya Brazil . . . dad ka imaanaya adduunka oo dhan; runtii waa wax lala yaabo.”
Muuqaalka ugu daawashada badan wuxuu helay in ka badan 59 milyan oo daawasho, dadka ku jira da’da 20-ka ayaana u badan taageerayaashiisa.
“Markaad tahay nin 81 jir ah, marna kuma fekeraysid inaad waxan oo kale samayn karto. In kastoo aan anigu gaboobayo, haddana daawadayaashaydu aad bay u kordhayaan.”
XIGASHO BBC