Sabti, 20,Sep 2025 {HMC} Netanyahu oo Cabsi Xoogan ka muujiyay Masar, Codsi Deg deg ah u Diray Tramp.

Netanyahu ayaa codsi rasmi ah u diray Madaxweyne Trump, isagoo usoo jeediyay inuu soo farageliyo dhaqdhaqaaqyada Dowladda Masar ay ka wado gobolka Siinay ee xadka la leh dhulka ay Israa|l heysato,

Waxa uu sheegay Netanyahu in awoodda milatari ee Masar in la soo dhigay, tallaabadaasoo uu ku sheegay inay jebinayso heshiiska nabadda ee 1979.

Netanyahu ayaa intaa raaciyay in gobolka Siinay la soo dhigay nidaamyada Shiinaha ee HQ-9 oo ay weheliyaan gantaallo casri ah oo awood burburin leh, sida ay werisay warbaahinta Axiso.

Sabti, 20,Sep 2025 {HMC} Wasiirka Wasaaradda Dekedaha iyo Gaadiidka Badda, Mudane Abdulkadir Maxamed Nuur, ayaa maanta magaalada Istanbul kulan kula yeeshay Wasiirka Wasaaradda Warshadaha iyo Teknoolajiyadda ee Jamhuuriyadda Türkiye,  Mehmet Fatih Kacir.

Kulanka ayaa diiradda lagu saaray xoojinta iskaashiga labada dal ee dhinacyada hal-abuurka, horumarinta teknoolojiyada casriga ah, iyo dhiirrigelinta dhallinyarada

Sidoo kale, Wasiirka Wasaaradda Dekedaha iyo Gaadiidka Badda Soomaaliya ayaa bogaadiyey kaalinta muhiimka ah ee Jamhuuriyadda Türkiye ku leedahay qaban-qaabada TEKNOFEST 2025, oo ah bandhigga ugu weyn caalamka ee duulista hawada, dayax-gacmeedyada iyo teknoolajiyada casriga ah.

Wasiirku wuxuu xusay in iskaashigan uu gacan ka geysan doono horumarinta kaabeyaasha dekedaha iyo tayeynta adeegyada gaadiidka badda ee Soomaaliya.

Sabti, 20,Sep 2025 {HMC} Wafdi uu hoggaaminayo kusimaha Madaxweynaha ahna Guddoomiyaha Baarlamaanka Koonfur Galbeed, Dr. Cali Saciid Faqi, oo ay weheliyaan Guddoomiyaha Gobolka Shabeellaha Hoose Mudane Ibraahim Aadan Cali (Najah) iyo masuuliyiin kale ayaa maanta gaaray furimaha hore ee dagaalka degmada Awdhiigle ee Gobolka Shabeelaha Hoose.

Booqashadan ayaa qayb ka ah dhiirrigelinta iyo dardargelinta ciidamada Qalabka sida iyo kuwa saaxibada Soomaaliya ee ku sugan jiidaha hore, kuwaas oo maalmihii la soo dhaafay dagaallo culus kula jiray Khawaarijta.

Kusimaha Madaxweynaha ayaa ciidamada ku bogaadiyay geesinimada iyo dadaalka ay ugu jiraan difaaca dadka iyo dalka, isaga oo ballanqaaday in Dowlada Koonfur Galbeed iyo Dowladda Federaalka Soomaaliya ay sii xoojin doonaan taageerada dhinacyada kala duwan ah ee ciidamada.

Sidoo kale, wafdiga ayaa kulan la yeeshay saraakiisha hoggaamineysa howlgalada ka socda degmada Awdhiigle, halkaas oo laga warbixiyay xaaladda dagaalka, guulaha la gaaray iyo caqabadaha taagan.

Guddoomiyaha Gobolka Shabeellaha Hoose, Mudane Ibraahim Aadan Cali (Najah), ayaa dhankiisa xusay in shacabka deegaanka ay garab taagan yihiin ciidamada, isla markaana ay muhiim tahay in si wadajir ah looga shaqeeyo nabad ku soo dabaalidda gobolka.

Booqashada wafdigan ayaa imaneysa xilli howlgal ballaaran oo ka dhan ah Al-Shabaab uu ka socdo deegaano badan oo ka tirsan gobolka Shabeellaha Hoose, waxaana Dowlada Koonfur Galbeed uu sheegay in uu ka go’an yahay ciribtirka kooxaha nabad-diidka ah.

Sabti, 20,Sep 2025 {HMC} Safiirka Maraykanka ee Soomaaliya, Riley, Taliyaha Ciidamada Maraykanka ee ka howlgala Afrika, Major General Claude Tudor, iyo Taliyaha Hawlgalka gaarka ah ee Bariga Africa Col. Benander, ayaa magaalada Boosaaso kula kulmay Madaxweynaha Puntland, Siciid Deni, si ay uga mahad celiyaan dadaallada Puntland ee la dagaallanka ISIS iyo sugidda ammaanka xeebaheeda.

Saraakiisha Maraykanka ayaa ku bogaadiyay Puntland doorka hormuudka ah ee ay ka qaadato dagaalka ka dhanka ah Daacish, iyagoo xusay in khataraha argagixisadu aysan ku koobnayn Soomaaliya oo keliya, balse sidoo kale ay khuseeyaan gobolka iyo Maraykanka.

Dhinaca kale, Warsaxaafadeed ka soo baxay Madaxtooyada Puntland ayaa lagu sheegay in kulanka labada dhinac looga hadlay xaaladda guud ee Soomaaliya, gaar ahaan dhinacyada amniga, siyaasadda, iyo horumarinta.

Madaxtooyada Puntland ayaa sheegtay in Saraakiisha Hawlgalka Gaarka ah ee Maraykanka ee Afrika ay kulan doceed la qaateen Saraakiisha Hawlgalka Hillaac ee ka howlgala buuraleyda Calmiskaad.

Kulankan ayaa kusoo beegmaya, maalmo kaddib markii uu Maraykanku duqayn ku dilay caaqil lagu magacaabi jiray Cabdullaahi Cumar Cabdi, kaasoo lagu eedeeyay inuu ahaa dulaal hubka u kala gudbin jiray kooxaha argigixisada, inkastoo uusan Maraykanka caddayn buuxda bixin.

Lama oga in Puntland iyo saraakiisha Maraykanku kawada hadleen duqaynta ka dhacday gobolka Sanaag, taasoo caro ka dhalisay gobolkaas, iyagoo dadku kasoo horjeesteen duqaynta lagu dilay caaqilka.