Isniin, 04 August 2025 {HMC} Hoggaamiyaha maamulka cusub ee Waqooyi Bari Soomaaliya Cabduqaadir Axmed Aw Cali (Firdhiye) oo khudbad xasaasi ah ka jeediyay magaalada Laascaanood, kadib dhismaha dhameystirka maamulkaan ayaa si cajiib ah ugu caqli celiyay Somaliland oo ay horay ugu dagaalameen qaybo kamid ah gobolka Sool.

Firdhiye ayaa farriin culus u diray maamulka fadhigiisu yahay Hargeysa, wuxuuna ugu baaqay inay ka shaqeeyaan nabadda, isaga oo sheegay in dagaalka oo sii socdo aanu keeni karin natiijo la mahadiyo.

Sidoo kale, wuxuu ka hadlay arrinta midnimada dalka, wuxuuna hoosta ka xariiqay inay tahay lama taabtaan, ayna marnaba ogolaan doonin inay kala go’do Soomaaliya.

“Waa masuuliyad Eebbe inaga saaray, laynagu eegayo; meesha aynu joogno haddii looga ololaynayo in Soomaaliya la kala gooyo, cidina isku hayn karimayso. Sidoo kale, haddii aan laga doonayn kala goynta, cid kala goyn kartaa ma jirto,” ayuu yiri hoggaamiye Firdhiye.

Waxaa kale oo uu intaasi ku daray in maamulka cusub ee laga yagleeyay Sool, Sanaag iyo Togdheer uu ku yimid rabitaanka shcabka, isla markaana uu u taagan midnimada dalka.

Cabdulqaadir Firdhiye ayaa sidoo kale Somaliland uga digay inay kusii socoto dhabaha dagaalka, isaga oo sheegay in aysan mahdin doono, haddii aanay ka waan-toobin.

“Walaalaha soo bu’aya waxaan leeyahay: waar nabadda ayaa naas la nuugo leh. Colaadda, dagaalka iyo dirirtana hore ayaynu u soo aragnay. Waxa aad u hanqaltaagaysaan ee aad isleedihiin xaqiijiya ma jiri karaan,” ayuu raaciyay hoggaamiyaha maamulka Waqooyi Bari.

Si kastaba, Abuuritaanka maamulkan cusub waa natiijo toos ah oo ka dhalatay colaad dhiig badani ku daatay oo ka qaraxday magaalada Laascaanood, oo ah xarunta gobolka Sool, dabayaaqadii 2022.

Dibadbaxyo looga soo horjeeday dilal is-daba-joog ah oo loo geystay shakhsiyaad deegaanka caan ka ahaa ayaa isku beddelay halgan hubeysan oo ballaaran bishii Febraayo 2023, kaas oo dhex maray ciidamada ammaanka ee Somaliland iyo ciidamadii cusbaa ee SSC-Khaatumo.

Isniin, 04 August 2025 {HMC} Waxaa saaka xaalad kacsanaan ah iyo dhaq-dhaqaaq ciidan laga dareemayaa suuqa Siinaay ee magaalada Muqdisho, halkaas oo ay maalmahaan ka taagneyd xiisad la xiriirta dhulka oo ay isku hayaan dowladda iyo dadka deegaanka.

Warar soo baxaya ayaa sheegaya in saaka suuqa uu tegay Xildhibaan Yaasiin Fareey oo ka tirsan Baarlamaanka Soomaaliya, isaga oo wata ciidamo badan iyo gaadiid dagaal, waxaana uu gudaha u galay suuqa, halkaas oo ay haatan ka taagan tahay xiisad culus.

Yaasiin Fareey ayaa doonaya inuu difaaco dhulkaas oo ay dagan yihiin dad shacab ah, isla markaana maalmahaan ka cabanayay dhul boob ay sheegeen in lagu hayo suuqa.

Xaaladda ayaa ah mid cakiran, waxaana sidoo kale bannaanka suuqa iyana ku sugan ciidamo ka tirsan kuwa dowladda Soomaaliya oo halkaas ka wada abaabul xooggan.

Dadka deegaanka ayaa cabsi ka muujinayo in dagaal uu ka qarxo goobta, waxaana haawana suuqa, iyada oo ay joogaan ciidamo iska soo horjeedo.

Muuqaallo lagu baahiyay baraha bulshada ayaa muujinayo Yaasiin Fareey iyo ciidamo uu wato oo dhex socda gudaha Suuqa iyo gaadiid dagaal oo goobta yaalla, taas oo keentay in saaka xaalad ay dareemaan dadka deegaanka ee ku sugan aagga Siinaay ee Muqdisho.

Shalay sidoo kale waxaa suuqa tegay xildhibaanno ka tirsan Golaha Shacabka oo meel fagaare ah kula hadlay dadka deegaanka, iyaga oo ka horyimid dhul boobka lagu hayo shacabka, waxayna ugu baaqeen inay sii wadaan dibadbaxooda, ayna garab istaaga yihiin.

Horay waxaa usoo baxa warar ku aadan in la’iibinayo suuqa, iyada oo si toos ah loo beec geeyay dhulka uu ku yaallo suuqa, waxaana booskiiba qiimihiisa lagu sheegay $ 45,000 illaa 80,000 oo Dollarka Mareykanka ah.

Arrintan ayaa sii kordhisa walaaca ay qabaan ganacsatada suuqa iyo dadka deegaanka, maadaama dhulkan ay haatan la wareegayaan ganacsato kale oo waawayn, waxayna taasi keentay kacdoonka dadka deegaanka iyo xildhibaannda ku metala baarlamaanka dalka.

Isniin, 04 August 2025 {HMC} Wafdi ka socda Safaaradda Turkiga ee Soomaaliya ayaa gaaray Magaalada Boosaaso si Madaxda Dowlad-Goboleedka Puntland ugala hadlaan Markabka Hubka iyo Gaadiidka Ciidanka wada ee lagu hayo Dekedda Magaaladaas.

Xubnaha Wafdiga ayaa isugu jira Saraakiil ciidan, Diblumaasiyiin Safaaradda ka shaqeeya iyo xubno kale, waxa ay kulamo toos ah la yeelanayaan Madaxweynaha Dowlad-Goboleedka Puntland Siciid Cabdullaahi Deni si Markabka Sea World loo sii daayo.

Ilo ku dhow safarka wafdiga ka socda Turkiga ayaa sheegay in Dowladda Isutagga Imaaraatka Carabta oo tababartay isla markaana taageerta ciidanka Badda Puntland ee PMPF ay sameysay dedaal xooggan oo la xiriira sidii wadahadal loo abuuri lahaa.

Markabka SEA World waxa ay Ciidamada PMPF ee Dowlad-Goboleedka Puntland ku qabteen Xeebta Bareeda ee Raas casayr 18kii July 2025, tan iyo xiligaas waxaa socday dedaallo kala duwan oo lagu sii daynayo markabkaan.

DG Puntland ayaa SEA World ku eedeysay in uu jebiyay nidaamka loogu talagalay in ay maraan marka Maraakiibta iyo Doomaha ay tagayaan xeebaha Dowlad-Goboleedkaas, sidaas darteed ayay sheegtay in ay usoo qabatay una geysay Dekedda Magaalada Boosaaso.