Arbaco 16, April 2025 {HMC} Wasiirka Wasaaradda Cadaaladda iyo Arrimaha Dastuurka XFS, Mudane Xasan Macallin Maxamuud ayaa maanta xarigga ka jaray dhismo dayactir iyo qalabeyn lagu sameeyay kaas oo loogu talagalay in lagu tababaro maxaabiista ku xiran Xabsiga Dhexe si kor loogu qaado xirfadahooda.

Arrintaan ayaa qeyb ka ah dadaallada Wasaaradda ee dib-u-habaynta nidaamka xabsiyada in maxaabiistaas lagu siiyo xirfado ay noloshooda dib ugu dhisan karaan marka ay xabsiga ka baxaan.

Munaasabadda xarig-jarka waxaa wasiirka ku weheliyay Safiirka Turkiga Soomaaliya u jooga Alper AKTAŞ, isku-duwaha Hay’adda TİKA Zafer EŞKİ iyo Taliye ku-xigeenka Ciidanka Asluubta Soomaaliyeed, Gen. Cilmi Waasuge Colow, waxaana goobta lagu wareejiyay agab tababar oo dhammeystiran.

Wasaaradda Cadaaladda iyo Arrimaha Dastuurka XFS oo kaashanaysa saaxiibadeeda caalamiga ah ayaa deddaal weyn ugu jirta dib-u-casriyeynta xarumaha xabsiyada iyo horumarinta nolosha maxaabiista ku xiran xabsiyada dalka.

Arbaco 16, April 2025 {HMC} Madaxweynaha Puntland, Siciid Cabdullaahi Deni oo ku sugan magaalada Boosaaso, ayaa si rasmi ah u caddeeyay in uusan qeyb ka noqon doonin gogosha uu madaxweyne Xasan Shiikh ku marti-qaaday dowlad goboleedyada dalka.

Madaxweyne Siciid Deni oo shalay Boosaaso kulan kula yeeshay xildhibaannada Baarlamaanka Puntland ayaa xubnahaasi u sheegay in uusan ka qeyb geli doonin Shirka madaxweyne Xasan Shiikh iclaamiyay, oo Deni ku tilmaamay mid aysan ajandiisa caddayn.

Wararku waxay sheegayaan in madaxweyne Deni uu rumaysan yahay in Villa Somalia aysan rabin shir loo dhan yahay oo ku saabsan xallinta dhammaan khilaafka siyaasadeed ee ka taagan arrimaha dastuurka, doorashooyinka iyo qeybsiga mashaariicda lagu helo magaca Soomaaliya.

Diidmada ka timid Puntland ayaa imaanaysa xilli ay dhawaan Villa Somalia shaacisay shir wada-tashi oo ay ku sheegtay u midoobista la-dagaallanka argagixisada, halkii laga filayay in ay ku dhawaaqdo shir siyaasadeed oo lagu xallinayo khilaafka jira.

Arbaco 16, April 2025 {HMC} Magaalada Beledweyne ee xarunta gobolka Hiiraan waxaa gaaray ciidamo cusub oo ka socday dalka Jabuuti, kuwaas oo qeyb ka ah howlka cusub ee AUSSOM, kaas oo dhawaan lagu badalay howgalkii hore ee ATMIS.

Ciidankaan oo soo dirtay Xukuumadda Djabuuti, ayaa la dadajiyey Saldhigyo ay ciidanka AUSSOM ku leeyihiin magaalooyinka Buula Burde iyo Jalalaqsi oo ah laba magaalo oo istiraatiiji ah oo ka tirsan gobolka Hiiraan, ee Dowlad Goboleedka Hirshabeelle.

Taliyaha Qeybta Afaraad, Col. Saciid Waaberi iyo saraakiil kale oo ka tirsan ciidamada xoogga dalka ayaa ku soo dhoweeyay garoonka diyaaradaha Ugaas Khaliif, iyaga oo ka hadlay doorka ay ka qaadanayaan dardar gelinta howlaha wadajirka ah ee ay wadaan. sida lagu yiri warsaxaafadeed ka soo baxay taliska ciidanka.

Sidoo kale warsaxaafadeedka ka soo baxay Howlgalka AUSSOM ayaa lagu sheegay in ciidankaan ka shaqeyn doonaan ilaalinta xarumaha muhiimka ee maamulka Hirshabeelle, garoomada diyaaradaha, iyo Saldhigga taliska ciidanka nabad ilaalinta ee ku sugan gobollada Hirshabeelle.