Arbaco, 26 Feb, 2025 {HMC} Ra’iisul Wasaaraha Soomaaliya, Xamza Cabdi Barre, ayaa ballan qaaday in uu sii wadi doono howlgallada milatari ee ka dhanka ah Al-Shabaab, kadib markii ciidamada dowladda ay guulo la taaban karo ka gaareen dagaallo ka dhacay Shabeellaha Dhexe.

Ciidanka Xoogga Dalka Soomaaliyeed (CXDS), oo kaashanaya Ciidamada deegaanka ee Ma’awisley, ayaa weerarro abaabulan ku qaaday goobihii ay Al-Shabaab gacanta ku hayeen, taasoo khasaare culus gaarsiisay dagaalyahannada kooxdaas, sida ay sheegeen saraakiil dowladeed.

Howlgalkan, oo qayb ka ah dagaalka ballaaran ee ka socda dalka, ayaa lagu bartilmaameedsaday xoreynta goobaha ay weli ku sugan yihiin Al-Shabaab ee Shabeellaha Dhexe iyo Hiiraan.

“Geesiyaasha ciidankeennu waxay dharbaaxo culus u geysteen argagixisada dulmiga badan ku haysay shacabkeenna,” ayuu yiri Xamza. “Ma nasan doonno illaa aan dalkeena ka xoreyno gacanta cadowga.”

Sida ay sheegayaan ilo-wareedyo amni, ciidamada dowladda ayaa dilay tiro badan oo ka tirsan Al-Shabaab, halka kuwa kalena ay dib uga gurteen goobihii istiraatiijiga ahaa.

Saraakiisha milatariga ayaa sheegay in la xoreeyay dhowr aag oo horey u ahaa saldhigyo ay kooxda isticmaali jirtay, inkastoo xaqiijinta madax-bannaan ay weli xaddidan tahay sababo la xiriira xaaladda amni.

Dowladda Soomaaliya ayaa sanadkii la soo dhaafay xoojisay dagaalka ka dhanka ah Al-Shabaab, iyadoo taageero ka helaysa maleeshiyaadka deegaanka iyo saaxiibada caalamiga ah.

Xamza ayaa mar kale xaqiijiyay in xukuumaddiisu ay ka go’an tahay xoojinta joogitaanka dowladda ee dhulka laga xoreeyay Al-Shabaab, si loo hubiyo in adeegyada aasaasiga ah ay gaaraan shacabka ay dhibaatadu saameysay.

Wuxuu sidoo kale ballan qaaday in ciidamada amniga ay sii wadi doonaan cadaadiska ka dhanka ah Al-Shabaab, islamarkaana ay ballaarin doonaan howlgallada milatari ee gobollada kale ee weli ay kooxdu ku sugan tahay.

“Dagaalku wuu sii socon doonaa illaa Al-Shabaab si buuxda looga adkaado,” ayuu yiri Barre. “Waxaan ka go’nahay xaqiijinta nabad, xasillooni, iyo mustaqbal ka caagan argagixiso.”

Al-Shabaab, oo ah koox xiriir la leh Al-Qaacida, ayaa muddo ka badan toban sano dagaal kula jirtay dowladda Soomaaliya, iyada oo doonaysa in ay dalka ku soo rogto aragti xagjir ah oo shareecada Islaamka ah.

Inkastoo ay jiraan guulo milatari, kooxda weli waxay khatar weyn ku haysaa amniga dalka, gaar ahaan deegaannada miyiga ah oo ay ku leedahay shabakado adag.

Dowladda Soomaaliya ayaa ugu baaqday shacabka in ay taageeraan dadaallada lagula dagaallamayo argagixisada, isla markaana ay la shaqeeyaan hay’adaha amniga si looga hortago in kooxdu dib ugu soo laabato dhulkii laga xoreeyay.

Arbaco, 26 Feb, 2025 {HMC} Diyaaradaha dagaalka Israa’iil ayaa duqeeyay magaalo ku taal koonfurta caasimadda Suuriya, iyo sidoo kale gobolka koonfureed ee Darcaa goor dambe oo Talaadadii ah, sida ay sheegeen dadka deegaanka, ilo-wareedyo dhanka amaanka ah iyo TV-ga maxaliga ah ee Suuriya.

Diyaaradaha Israa’iil ayaa duqeeyay magaalada Kisweh oo qiyaastii 20 kiiloomitir u jirta koonfurta Dimishiq sida ilo wareedyada ay sheegeen. Laamaha ammaanka ayaa sheegay in la beegsaday goob ciidan, iyadoo aan faah faahin dheeraad ah laga bixin.

Milateriga Israa’iil ayaa bayaan ay soo saareen mar dambe ku sheegay, in ay weerareen bartilmaameedyo militari oo ku yaalla koonfurta Suuriya oo ay ku jiraan xarumo iyo goobo ay ku sheegeen in uu hub yiil.

Hadal uu soo saaray afhayeenka wasiirka difaaca Israel Katz ayaa lagu sheegay, in ciidamada cirka ay si xoog leh u weerarayaan koonfurta Suuriya, taas oo qayb ka ah siyaasadda cusub ee ay qeexeen ee lagu nabadeeynayo koonfurta Suuriya fariintuna ay cadahay iyagoo aan dooneeyn in Koonfurta Suriya noqoto koonfurta Lubnan.

Arbaco, 26 Feb, 2025 {HMC} Ururka Caafimaadka Adduunka ayaa Talaadadi sheegay, in dad ka badan 50 qof ay u dhinteen toddobaadyadii la soo dhaafay kiisas xanuuno aan la garaneeyn waqooyi-galbeed ee Jamhuuriyadda Dimuqraadiga ah ee Congo.

Laga soo bilaabo bishan Febraayo 16-keedii, waxaa jiray 431 xaaladood iyo 53 dhimasho ah oo ka dhashay laba cudur oo ka dillaacay tuulooyin fog-fog oo ku yaal gobolka Equateur, sida WHO ay ku sheegtay war-saxaafadeed. Waxay sheegtay in ay baareyso cudurradan.

Afhayeenka WHO Tarik Jasarevic ayaa ku sheegay xog warran kooban Talaadadii, in cudurrada dillaacay oo la garaneeyn sababta, ay kiisaskoodu si xawli ah u kordhayaan maalmo gudahood, taas oo khatar weyn ku ah caafimaadka bulshada.

WHO ayaa sheegtay in cudurradaasi lagu garanayo astaamha ay ka mid yihiin qandho, xanuun, mantag iyo shuban.

Cudurradan ayaa imanaya xilli qeybo ka mid ah Congo ay ka jiraan colaado sokeeye oo uu dhig badani ku daatay. Colaadda ayaa xooggeeda ka jirta dhanka bari ee Congo.

Talaado 25 Feb 2025 {HMC} Dhakhaatiirta aan xuduudda lahayn ee MSF ayaa Isniintii hakisay howlihii ay ka wadeen xerada Zamzam ee dalka Suudaan, oo ay macluushu ku dhufatay, kadib markii ay sii kordheen weerarrada iyo dagaallada ka socda agagaarka aaggaasi.

MSF ayaa sheegtay in dagaalka u dhexeeya millatariga Suudaan iyo Ciidamada Taageerada Degdegga ah ee ay iska soo horjeedaan uu ku sii xoogeystay xerada, oo ku taalla Waqooyiga Darfur.

Xiisadda sii kordheysa ayaa ka dhigtay mid aan macquul ahayn in MSF ay sii waddo bixinta gargaarka bini’aadantinimo, oo u badan taageero naf-badbaadin ah oo dhinacyo kala duwan leh, loona fidiyo kumannaan barakacayaal ah oo ku sugan deegaanka, sida lagu sheegay warbixin ay soo saartay hay’addu.

Yahya Kalilah, oo ah madaxa howlgalka MSF ee Suudaan, ayaa sheegay in mashruucooda la hakiyay, iyada oo xerada Zamzam ay ku dhex jirto musiibo qalbi-jab ah.