Isniin 27 Jan 2025 {HMC} Maxkamad ku taalla dalka Pakistan ayaa afar nin ku xukuntay dil, kadib markii ay baraha internet-ka ku faafiyeen qoraallo lagu aflagaadeynayo diinta, sida uu maanta sheegay xubin ka mid ah koox “qareenno gaar ah oo is-abaabulay” oo dacwaddan soo oogay

Afarta nin ayaa lagu xukumay magaalada Rawalpindi, oo ah magaalo ciidan oo ku dhow caasimadda Islamabad, sida uu wakaaladda wararka ee AFP u sheegay Rao Abdur Raheem, oo ah qareen ka tirsan Guddiga Sharciga ee Kahortagga Aflagaadeynta Diinta ee Pakistan {LCBP}

Aflagaadeynta diintu waa eedeyn culus dalka Pakistan oo ay Muslimiintu u badan yihiin, halkaas oo xitaa eedeymo aan la hubin ay kicin karaan caro dadweyne oo sababi karta dilal sharciga baal-marsan

Dalka Pakistan ayaa waxaa aad ugu soo badanayay dacwad-oogista kiisaska “aflagaadeynta diinta ee online-ka”, iyadoo kooxo gaar ah ay dacwado ka dhan ah boqollaal dhallinyaro ah ku soo oogayaan, kuwaasoo lagu eedeeyay inay galeen falal aflagaadeyn diinta ah

“Waxaa lagu xukumay dil… Jimcihii, kadib markii lagu helay inay online-ka ku faafiyeen qoraallo aflagaaddo ah oo ka dhan ah Nabiga Muxammad {NNKH }iyo Qur’aanka Kariimka,” ayuu yiri Raheem oo la hadlay AFP Isniinta maanta ah

“Dacwaddeenna waxaa lagu xoojiyay caddeymo forensik ah oo laga soo uruuriyey aaladihii loo adeegsaday falkan foosha xun,” ayuu raaciyay isagoo ka hadlayay mid ka mid ah dacwadihii ugu dambeeyay ee kooxda LCBP ay soo oogtay

In kasta oo xukunnadan ay dhaceen, haddana dalka Pakistan weli cidna uma dilin aflagaadeynta diinta darteed

Xubin ka tirsan koox taageero ah oo ay sameysteen qoysaska eedeysanayaasha ayaa u xaqiijiyay wakaaladda AFP xukunka, wuxuuna sheegay in kooxdu ay racfaan ka qaadan doonto xukunka

Warbixin ay soo saartay Guddiga Qaranka ee Xuquuqda Aadanaha ee ay dowladdu maamusho bishii Oktoobar ee sanadkii hore ayaa lagu sheegay in ay jiraan 767 qof, oo u badan rag dhallinyaro ah, oo xabsiyada ku jira iyagoo sugaya maxkamadeyn la xiriirta eedeymo aflagaadeyn diinta ah.

Isniin 27 Jan 2025 {HMC} Madaxweynaha Jamhuuriyadda Federaalka Soomaaliya Xasan Sheekh Maxamuud ayaa qayb ka ah Shir madaxeedka looga hadlayo Tamarta Afrika ee ka dhacay Dalka Tanzania gaar ahaan caasimadda Dalkaas ee Daarusalaam

Shir madaxeedkaan oo isla maanta furmaya ayaa la dhageysan doonnaa hadal jeedinta Madaxda si Mustaqbalka Qaaradda Afrika ee dhinaca Tamarta loo kordhiyo sida lagu sheegay bayaan kasoo baxay Dowladda Tanzania

Soomaaliya ayaa qayb ka ah Dalalka daneynaya ka faa’iideysiga Tamarta, waxa uu Madaxweyne Xasan Sheekh Maxamuud kulamo kala duwan la qaadanayaa madaxda ka qaybgaleysa shirkaan muddada uu socdo sida ay xaqiijiyeen ilo kala duwan

Madashaan oo ah mid ballaaran waxa ay hoggaamiyaasha diiradda saarayaan waxyaabaha ay u baahan tahay Afrika si looga hormariyo dhinaca Tamarta, Malaayiin ruux oo ku nool Qaaradda Afrika ayaa u baahan helista Tamarta si gaar ah Korontada.

Isniin 27 Jan 2025 {HMC} Ciidamada ammaanka ee Puntland ayaa magaalada Garowe ka sameeyay howlgallo ballaaran oo lagu beegsanayo muhaajiriinta sharci darrada ah, gaar ahaan dadka u badan qowmiyadda Itoobiyaanka, kadib markii maamulka Puntland uu soo saaray amar mamnuucaya dadka aan sharciyeysneyn inay joogaan Puntland

Howlgallada hadda socda ayaa keenay in boqolaal muhaajiriin ah oo u badan Itoobiyaan lagu xiray xarumaha ciidamada ammaanka, iyada oo Puntland ay sii xoojineyso tallaabooyinka xakameynta muhaajiriinta sharci darrada ah ee kusoo qulqulaya Puntland

Dhinaca kale, dad caraysan oo shacab ah ayaa lagusoo waramayaa inay ku xoomeen goobaha ay degen yihiin dadka Itoobiayanka ah ee Garowe, kuwaas tacaddiyo u geystay tobanaan kamid ah dadkan, inkastoo markii dambe ay ciidamaada ammaanku soo faragaliyeen

Kaddib markii uu soo baxay amarka lagu mamnuucayo muhaajriinta ku sugan Puntkand, waxaa magaalooyinka ka bilowday raaf ka dhan ah dadkan. Muuqaallo lasoo dhigay baraha internetka ayaa la arkayay ciidamada ammaanka oo waddooyinka ka qabqabanaya dadkan

Dhinaca kale, hay’adda dambi baarista Puntland ayaa sheegtay inay keentay hannaan lagu diiwaan galinayo muhaajirinta lagulana soconayo dhaqdhaqaaqyadooda

Waa howlgalkii ugu ballaaran ee ka dhan ah muhaajiriinta ee ka dhaca Puntland. Tallaabadan aaya timid kaddib markii ajaanib badan oo ku sugan Puntland ay ku biireen kooxda Daacish ee ka dagaalamaysa buuraha Calmiskaad.

Isniin 27 Jan 2025 {HMC} Hay’adda Socdaalka iyo Jinsiyadda Soomaaliya iyo Booliska Caalamiga ah ee (Interpol) ayaa maanta kala saxiixday heshiis iskaashi oo muhiim ah. heshiiskan ayaa waxa uu diiradda saari doonaa dhowr arrimood oo muhiim ah, kuwaas oo ay ka mid yihiin:

𝟭. 𝗞𝗮-𝗵𝗼𝗿𝘁𝗮𝗴𝗴𝗮 𝗗𝗮𝗺𝗯𝗶𝘆𝗮𝗱𝗮 𝗔𝗯𝗮𝗮𝗯𝘂𝗹𝗮𝗻.
𝟮. 𝗞𝗼𝗿 𝘂 𝗤𝗮𝗮𝗱𝗶𝗱𝗱𝗮 𝗔𝗺𝗻𝗶𝗴𝗮 𝗦𝗼𝗰𝗱𝗮𝗮𝗹𝗸𝗮
𝟯. 𝗫𝗶𝗿𝗶𝗶𝗿𝗸𝗮 & 𝗜𝘀𝗸𝗮𝗮𝘀𝗵𝗶𝗴𝗮 𝗛𝗦𝗝 & 𝗕𝗼𝗼𝗹𝗶𝘀𝗸𝗮 𝗖𝗮𝗮𝗹𝗮𝗺𝗶𝗴𝗮 𝗮𝗵.
𝟰. 𝗦𝗮𝗿𝗲 𝘂 𝗾𝗮𝗮𝗱𝗶𝗱𝗱𝗮 𝘅𝗶𝗿𝗳𝗮𝗱𝗮𝗵𝗮 𝗔𝗺𝗻𝗶 𝗲𝗲 𝗦𝗮𝗿𝗮𝗮𝗸𝗶𝗶𝘀𝗵𝗮 𝗛𝗦𝗝.
𝟱. 𝗕𝗮𝗮𝗱𝗶𝗴𝗼𝗼𝗯𝗸𝗮 𝗗𝗮𝗱𝗸𝗮 𝗟𝘂𝗺𝗮𝘆.

Taliyaha Hoggaanka Booliska Caalamiga ah ee Soomaaliya, Jeneraal Dhoore, oo munaasabadda ka hadlay ayaa ugu horeyn ku ammaanay Agaasimaha Guud ee Hay’adda Socdaalka, Mudane Mustafe Sheekh Cali Dhuxulow, mudada kooban ee uu joogo hey’adda. sida uu uga mira dhaliyay dhaqangalka heshiiskaan oo muhiim u ah HSJ, dhanka kale waxa uu Taliyuhu u mahaceliyay Gudigii ka socday dhanka Hey’adda Socdaalka & Jinsiyadda ee sida hagar la’aanta ah kala soo shaqeeyay heshiiskan

Agaasimaha Guud, Mudane Mustafe Sheekh Cali Dhuxulow, ayaa dhankiisa u mahadceliyay guddiga HSJ iyo Booliska Caalamiga ah (Interpol), gaar ahaan hogaankooda Soomaaliya, isaga oo ku tilmaamay heshiiskan mid muhiimad gaar ah u leh xoojinta dadaallada la-dagaallanka xagjirka iyo ka hortagga dambiyada socdaalka ee Soomaaliya, tan gobolka, iyo guud ahaan Caalamka

Ugu dambeyn, Agaasimaha Guud Mudane Mustafa Duhulow ayaa wafdiga Interpol booqasho ku geeyay Xafiiska Ka-hortagga Dambiyada Socdaalka, Fraud Detection Unit (FDU) ee Hey’adda Socdaalka & Jinsiyadda, halkaas oo ay warbixin kooban kaga dhageysteen saraakiisha ka howlgala xafiiskaan

Saraakiisha Xaafiiskan {FDU} ayaa Agaasimaha iyo xubnaha ka socday Interpol la wadaagay qalabka {Forensic Science} ah oo ah qalab casriya oo loogu tala galay inay Saraakiishu uga hortagaan Dembiyada abaabulaan sida: Dukumintiyo wax laga bedelay, kuwa been abuurka ah, & kala saarista document-yada loo isticmaalo hababka isku ekaanshaha