Talaado 7, Jan 2025 {HMC} Wasiirka Arrimaha Dibadda Xukuumada Federaalka Soomaaliya ayaa  gaaray magaalada Kampala ee caasimadda dalka Uganda.

Wasiirka Arrimaha Dibadda Dowladda Federaalka Soomaaliya Amb. Axmed Macallin Fiqi iyo wafdi uu hoggaaminayo ayaa gaaray magaalada Kampala ee dalka Uganda si uga qayb galo shir-madaxeedka aan caadiga ahayn ee Midowga Afrika oo ay martigalinayso Dowladda Uganda.

Wasiirka ayaa waxaa Airport-ka Entebbe kusoo dhaweeyay Danjire Fardowsa Maxamed Qanyare Safiirka JFS ee Uganda iyo madax kale.

Shir-madaxeedka aan caadiga ahayn ee Midowga Afrika ayaa looga hadlayaa istaraatiijiyada shaqo ee Ururka 10-sano ee soo socota 2026- 2035.

Talaado 7, Jan 2025 {HMC} Madaxweynaha Faransiiska Emmanuel Macron ayaa sheegay in dalalka Afrika ay ” illoobeen” inay u mahadceliyaan Faransiiska sida uu dalalkooda uga badbaadiyay inay maamulaan kooxaha hubeysan.

“Waxaan u maleynayaa inay illoobeen inay noo mahadceliyaan, laakiin waa caadi, waxay imaan doontaa waqtigeeda,” Macron ayaa yiri sidaa.

Midkoodna ma yeelan lahaayeen dowlad madax-bannaan haddii uusan Faransiisku ciidankooda u soo dirin gobolkan,” ayuu hadalkiisa ku daray hoggaamiyaha Faransiisku.

Faallooyinkiisa ayuu ku sheegay kulan sanadle ah oo ka dhacay magaalada Paris oo ay isugu yimaadeen safiirada Faransiiska, waxaana diirada lagu saaray siyaasada arrimaha dibadda ee Faransiiska ee sanadkan 2025-ka.

XIGASHO BBC

Talaado 7, Jan 2025 {HMC} Dowladaha Urdun iyo Suuriya ayaa bilaabay iskaashi cusub oo ay ku sugayaan xuduudda ay wadaagaan, si ay uga hortagaan tahriibka hubka iyo daroogada, isla markaana ula dagaalamaan in kooxda Daacish (ISIS) ay dib ugu soo laabato gobolka.

Wasiirka Arrimaha Dibadda Urdun, Ayman Safadi, ayaa ku tilmaamay guddi-wadaagga cusub ee amniga inay tahay tallaabo muhiim ah oo lagu xaqiijinayo maamul.

“Waa tallaabo loo qaaday dhinaca wada-shaqeynta iyo hagaajinta xaaladda guud ee amniga xuduuddaha,” ayuu yiri Safadi, isagoo sidoo kale ka hadlay muhiimadda iskaashiga labada dhinac ee ka dhanka ah kooxaha argagixisada.

Dhanka kale, Wasiirka Arrimaha Dibadda Suuriya, Al-Shibani, ayaa fursaddan uga faa’iidaystay inuu mar kale ku celiyo baaq uu ku codsanayo in cunaqabataynta Mareykanka ee saaran Suuriya laga qaado.

Wuxuu ku adkeystay in cunaqabatayntani ay tahay sababta ugu weyn ee hor istaagtay dadaallada dib u dhiska iyo soo kabashada Suuriya, taas oo ka dhalatay burburkii dagaalka sokeeye ee muddada dheer socday.

Sida ay wararku sheegayaan, guddiga wadajirka ah ee amniga ayaa xoogga saaraya in si gaar ah loola dagaallamo tahriibka daroogada, taas oo ka mid ah dhibaatooyinka ugu waaweyn ee ka jira xuduudda Urdun iyo Suuriya.

Talaado 7, Jan 2025 {HMC} Saraakiil katirsan Dowladda Shiinaha ayaa sheegay in ugu yaraan 53 ruux ay ku dhinteen halka tiro kale ay dhaawacmeen dhul gariir ku dhuftay Gobolka Tibet, waxaa burburay guryo badan oo ay ku noolaayeen Dadkaas iyada oo lagu howlan yahay gurmadka degdega ah.

Mas’uuliyiin katirsan Shiinaha oo la hadlay Wakaaladda Wararka Xinhua ayaa sheegay in Dhul-gariirka uu aad u xoogganaa isla markaana uu saameyn taban ku reebay Nepal, India iyo meelo kale sida uu hadala u dhigay.

Dhul baaxad weyn oo dhaca Galbeedka Jamhuuriyadda Shacabka Shiinaha ayaa laga cararay kolkii digniin xooggan loo diray Dadka ku nool mar haddii ay u nugul yihiin dhibaatada kasoo gaari karto dhul-gariirkaas la saadaalinayo.

Qaaradaha Afrika, Yurub iyo Aasiya waxaa sanadihii lasoo dhaafay aafo dhibaato xannuun badan ka tagay ku noqday Dhul-gariir, waxaa ku dhintay kumanaan qof, dhaawaca waa tiro ka badan inta geeriyootay iyo Dad ku guryo waayay.