Jimco 3 Jan 2025 {HMC} — Booliiska Kuuriyada Koonfureed ayaa u suurtagashay in ay gudaha u galaan xarunta madaxtooyada iyaga oo isku dayaya in ay soo xiraan madaxweyne Yoon Suk Yeol oo horey xil ka qaadis lagu sameeyay.

Balse waxa ay sheegeen in ay is hortaag ku sameynayeen ciidamada ilaalada madaxtooyada, ka dib markii uu iska hor imaad uu dhexmaray cutub ka tirsan ciidamadaasi.

Qareenka Yoon ayaa sheegay in kiis ka dhan ah amarka lagu soo xirayo ee “sharci darada ah” ay u gudbinayaan maxkamad.

Jimco 3 Jan 2025 {HMC} —  Saraakiisha caafimaadka ayaa sheegay in duqeymo cirka ah oo ay ciidamada Isra’il ku rusheeyeen qeybo kala duwan oo Gaza lagu dilay, ugu yaraan 54 qof oo Falastiiniyiin ah.

11 ka mid ah dadka la dilay oo ay ku jireen dumar iyo carruur ayaa lagu duqeeyay teendhooyin ku yaalla xaafadaha baraka cee degmada Al-Mawasi, halkaas oo ay Isra’il u asteysay aagga bani’aadannimo ee dadka rayidka ah.

Wasaaradda arrimaha gudaha Gaza ayaa sheegtay, in mid ka mid ah duqeymihi shalay ee Gaza lagu dilay, agaasimihi guud ee Qeybta Booliska ee Gaza, Maxmuud Salaax iyo kaaliyihiisa Xusaam Shawxan.

War kasoo baxay millatariga Isra’il ayaa lagu sheegay in deegaanka Al Mawasi ee galbeedka magaalada Khan Yunis ku dileen Xusam Shawxan oo ay sheegeen in uu Xamas ma’uul uga ahaa amniga guud ee koofurta Marinka Gaza.

Weeraro kale oo cirka ah oo ay Isra’il ka fulisay Gaza Khamiistii shalay, ayay ku dishay ugu yaraan 43 Falastiiniyiin ah.

Duqeymaha ayaa lagu bartilmaameedsaday xarunta Wasaaradda Arrimaha Gudaha ee Gaza ee ku taalla Khan Yunis, dhismooyin ku yaalla xerada Jabaaliya ee Waqooyiga Gaza, kaamba Shati iyo xerada qaxootiga ee Maghazi ee bartamaha Gaza.

Duqeymihi ugu danbeeyay ee Isra’il ee ay Gaza ku qaadday xalay ayaa lagu dilay ugu yaraan 4 qof, bartamaha Gaza iyo degmada Xeytuun, sidaasi waxaa wakaaladda wararka ee Rueters u xaqiijiyay saraakiisha caafimaadka.

Khamiis 2 Jan 2025 {HMC} Taliyaha Ciidanka Boliiska Soomaaliyeed Sarreeye Guuto Asad Cismaan Cabdullaahi ayaa shir gudoomiyey kulanka Hogaanada, Taliyayaasha Qeybaha iyo Fadhiyada Madaxa banaan ee todobaadlaha ah kaasoo ka qabsoomay Xarunta Taliska guud ee Ciidanka Boliiska Soomaaliyeed.

Kulanka ayaa looga hadlay Xakameynta Hubka sharci darada ah ,ka hor tagga Dhibaatada ay geystaan Khawaariijta, Diiwaangelinta Hantida Ciidanka Boliiska oo ay ku jiraan Gaadiidka, Isgaarsiinta iyo Agabka kale si meesha looga saaro isticmaalka hantida Dawladda ee aan munaasibka aheyn.

Taliyaha Ciidanka Boliiska Soomaaliyeed Sarreeye Guuto Asad Cismaan Cabdullaahi oo Saraakiisha Dawladda uga mahadceliyey shaqada ay hayaan ayaa amray in dedaal xoogleh la geliyo sidii loo xakameyn lahaa hubka sharci darada ah ee Magaalada Muqdisho lagu dhexwato , waxaanu uu Hogaanka Isgaarsiinta faray in iyaguna dib u eegis ku sameeyaan adeegyada isgaarsiinta Ciidanka si loo helo Isgaarsiin hufan oo amaan ah .

Khamiis 2 Jan 2025 {HMC}  27 muhaajiriin ah oo isugu jiray dumar iyo caruur ayaa dhintay ka dib markii labo doonyood oo ay la socdeen ay ku gaddoomeen xeebaha dalka Tunisia. 83 kale ayaa la badbaadiyey, sida saraakiisha difaaca madaniga ah ee Tunis ay u sheegeen wakaaladda wararka ee AFP.

Rakaabkii la badbaadiyey iyo kuwii dhintay ayaa laga helay jasiiradaha Qarqana ee bartamaha dalka Tunisia. Waxay ku sii jiideen Qaaradda Yurub, waxayna dhammaantood ka soo jeedeen dalalka Afrika ee Saxaraha ka hooseeya, sida uu sheegay Zied Sdiri oo ah madaxa difaaca madaniga ah ee magaalada Safaaqis.

Baarista ayaa wali sii socotay si loo eego haddii ay jireen rakaab kale oo wali maqan, sida uu sheegay ciidanka Illaalada Qaranka ee Tunisia.

Dalka Tunisia waa bar-bilow muhiim ah oo ay maraan dadka muhaajiriinta ah ee doonaya in ay tagaan Yurub. Dadkan ayaa safarkooda Yurub ka billaaba jasiiradda Lampedusa ee dalka Talyaaniga, taas oo 150km oo kaliya u jirta dalka Tunisia.

Sanad walba, tobanaan kun oo qof ayaa isku daya inay ka tallaabaan badda Mediterranean-ka ee khatarta badan, taas oo ay ka dhaceen shilal maraakiib, iyada oo cimilo xumi ay uga sii darto.

18-kii bishii December ee inna dhaaftay, ugu yaraan 20 muhaajir oo reer Afrika ah ayaa ku geeriyooday magaalada Safaaqis, iyada oo 5 kalena la waayey.

12-kii December, ciidanka ilaalada xeebaha ayaa bad-baadiyey 27 muhaajir, halka 15 kale ay geeriyoodeen.

Ilaa bilowgii sanadka hay’adda xuquuqda aadanaha ee Tunis ayaa sheegtay in 600-700 oo muhajir ay dhinteen ama lagu la’yahay maraakiibta gaddoontay. Tiro ka badan 1,300 ayaa iyaguna dhintay ama la waayey sanadkii 2023-kii.

XIGASHO VOA

Khamiis 2 Jan 2025 {HMC} Guddoomiyaha Gobolka Banaadir ahna Duqa Magaalada Muqdisho Mudane Maxamed Axmed Amiir ayaa guddoomiyay kulan loogu hadlaayay dar-dargelinta howlaha shaqo ee Ciidanka ilaalinta Deegaanka Xamar iyo sidii ay ugu qeyb qaadan lahaayeen qorshaha bilicda Magaalada Muqdisho.

Taliyaha Ciidanka Ilaalinta Deegaanka Xamar Janaraal Maxamed Carabow Cali ayaa ka warbixiyay shaqooyinka ciidanka Ilaalinta Deegaanka, isbadalka dhinaca tayada ee lagu sameeyay iyo caqabadaha jira, asigoona xusay in ay diyaar u yihiin gudashada waajibaadka loo igmaday.

Guddoomiye Amiir ayaa xusay ka go’naashiyahiisa ku aadan tayeynta iyo dhismaha ciidanka ilaalinta deegaanka Xamar, asigoona faray saraakiisha ciidanka in ay dardargaliyaan ilaalinta Nadaafada iyo bilicda Caasimadda, kor u qaadista Dakhliga iyo in loo turo oo si dabacsan loola dhaqmo bulshada Gobolka Banaadir.

—𝐃𝐇𝐀𝐌𝐌𝐀𝐀𝐃—