Isniin 30, Dec 2024 {HMC} Ururka Suxufiyiinta Soomaaliyeed ee FESOJ ayaa maanta soo gabagabeysay tababar muhiim ah oo loo qabtay Wariyayaasha xubnaha ka ah ururka, kaas oo Muqdisho ka socday saddex cisho.

Tababarkan, oo diiradda lagu saaray anshaxa saxaafadda, soo saarista warbixinnada maqalka iyo muuqaalka, iyo badbaadada dijitaalka ah, ayaa waxaa ka qayb-galay 25 wariye oo ka kala socda gobollada Hirshabelle, Koofur Galbeed, iyo Benaadir.

Tababarka waxaa lagu baray Wariyeyaasha xirfadaha soo saarista warbixino sax ah, ilaalinta xogta bulshada, iyo badbaadada suxufiyiinta, gaar ahaan marka ay ka shaqeynayaan meelaha khatarta ah.

Waxaa sidoo kale la baray tiknoolajiyadda iyo software-yada casriga ah ee warbaahinta, iyo sidii loo ilaalin lahaa amniga dijitaalka ah, iyadoo laga hortagayo khataraha sida hacking iyo malware.

FESOJ iyo BBC Media Action ayaa iska kaashaday tababarkan, oo ay maalgeliyeen Midowga Yurub. Guddoomiyaha FESOJ, Abaadir Cabdulqaadir Cilmi, ayaa sheegay in tababarkan uu suxufiyiinta ka caawinayo in ay soo saaraan warbixino mas’uuliyad leh iyo kuwo ku saleysan anshaxa saxaafadda.

Xoghayaha Guud ee FESOJ, Farah Omar Nur, ayaa dhankiisa carabka ku adkeeyay muhiimadda wacyigelinta ku saabsan khataraha dijitaalka iyo xatooyada xogta.

FESOJ waxay rajaynaysaa in tababarkani uu sii xoojin doono xirfadaha suxufiyiinta Soomaaliyeed iyo badbaadadooda shaqo.

Axad 29, Dec 2024 {HMC} Hogaamiyaha Suuriya ayaa Axaddii sheegay in muddo afar sano ah ay qaadan karto xilliga la qaban doono doorasho ka dhacdo Suuriya, isaga oo intaasi raaciyay in ay qorsheynayaan sidi loo kala diri lahaa kooxdiisa islaamiga ah ee hogaaminaysay kacdoonka dalkaasi ee xakunka looga tuuray dowladdii taliskii Bashar Al Asad ee muddada dheer dalkaasi xakumayay.

Ahmad al-Sharaa, oo hoggaamiya Jabhadda Xayat Taxrir Al Sham, oo ah kooxda majaraha u heysa dhaq dhaqaaqyada hadda la wareegay awoodda Suuriya, ayaa hadalkaasi ka sheegay wareysi uu siiyay telefishanka laga leeyahay Sacuudiga ee Al Carabiya.

Hadalkan ayaa imanaya kaddib ku dhawaad muddo bil ah oo ay xakunka hayaan, ka gadaal marki ay sidi biriqdi oo kale gobollada dalka oo dhan uga xureeyeen dhammaan ciidanki dowladdii waqtiga dheereyd ee reer Asad, taas oo Suuriya xakumay muddo ka badan 50 sano.

Kacdoonkaasi ayaa soo billowday sannadki 2011-ki, waxaana ku dhintay tobnaan kun, halka malaayiin kale ay qaxeen ama barakacaeen.

Axmed Al Sharca wuxuu sheegay in ay waqti qaadan doonto doorasho xor ah, iyadoo oo loo baahan yahay buu yiri ciidamo kala duwan, wadahadallo siyaasadeed iyo in dib loo qoro dastuurka Suuriya.

Wuxuu kaloo sheegay in kaabayaasha dalka ay aad u liitaan loona baahanyahay dib u dhis cusub loo lagu sameeyo Suurya.

Xigasho VOA