Arbaco 13, Nov 2024 {HMC}  Wareegto goordhaw kasoo baxday Wasiirka Wasaaradda Isgaarsiinta iyo Tiknoolajiyada Xukuumadda Soomaaliya Maxamed Aadam Macallin , ayaa shaqada looga joojiyya maareeyihii kumeel gaarka ahaa ee Hay’adda dhowrista xogta Maxamed Axmed Cali (Royal).

Wasiirka ayaa wareegtada uu soo saaray ku sheegay in sababaha shaqada looga joojiyay Maxamed Royal ay tahay in uu ku kacay falal curyaaminaya habsami u socodja howlaha hay’adda, sidoo kale ku kacay falal ka baxsan hab-dhaqanka saraakiisha sar sare ee dowladda.

Maareeyaha shaqada laga joojiyay ayaa maalmihii lasoo dhaafay baraha uu bulshada ku leeyahay kusoo qorayay qoraalo uu ku dhaliilayay hab-maamulka Madaxweyne Xasan Sheekh , uu horey uga mid ahaa dadkii u ololeeyay aadkana ugu dhawaa.

Wasiirka Wasaaradda Isgaarsiinta iyo Tiknoolajiyada Xukuumadda Soomaaliya Maxamed Aadam Macallin, ayaa Daa’uud Cabdi Xuseen oo horey kuxigeen ugu ahaa Maxamed Royan hadda u magacaabya kusimaha maareeyaha KMG ee Hay’adda dhowrista xogta.

Arbaco 13, Nov 2024 {HMC} Ciidanka Hay’adda Sirdoonka Qaranka ee NISA ayaa War saxaafadeed ay soo saartay ku sheegtay iney soo qabtay labo nin oo ku eedeysan dilal ka dhacay Muqdisho.

Cali Hilowle Ibraahim iyo Axmed Samatar Cali ayaa ku eedeysan inay seddax qof oo ganacsato ah ku dileen degmada Daarusalaam ee gobolka Banaadir

Xubnahan ayaa la sheegay iney ka tirsan kooxda Al Shabaab ayna ganacsatadaas u dileen sababo la xiriira kameroyin ay ku xireen goobahooda ganacsiga ka dib amar ka soo baxay DF

“Sidoo kale waxaa lagu dabajiraa eedeysane kale oo la sheegay in dilalkaas uu wax ka geystay” ayaa lagu yiri qoraalka ka soo baxay heyada NISA oo sidan hoose u qornaa

Arbaco 13, Nov 2024 {HMC} Guddoomiyaha Aqalka Sare ee Baarlamaanka Jamhuuriyadda Federaalka Soomaaliya, Mudane Cabdi Xaashi Cabdullaahi ayaa ka qayb galay shirka 18-aad ee Guddoomiyayaasha Baarlamaaannada Dowladaha Bulshada Bariga Afrika oo maanta ka furmay magaalada Nayroobi ee Dalka Kenya.

Guddoomiyaha oo shirka khudbad ka jeediyay ayaa ka hadlay muhiimadda ay Soomaaliya u leeyahay ka mid noqoshada Ururka Bulshada Bariga Afirka, iyo kaalinta ay ka gaysan karto horumarka dhinaca dhaqaalaha, iskaashiga Ganacsiga, Nabadda iyo horumarinta Bulshada,

Sidoo kale guddoomiyuhu, wuxuu xusay in Ururkan uu tusaale wanaagsan u yahay dhammaan dowladaha Afrika ayna ku dhiirigelinayso in Afrika oo idil ay iskaashato, islamarkaana ay samaysato midow ay u dhanyihiin dowladahaas, taas oo faa’iido wayn u ah dhaqaale ahaan, bulsho ahaan iyo in ay iska kaashadaan soo saarka khayraadka dihan ee dhaxyaal dhulka Afrika.

Shirka waxaa sidoo kale qeyb ka ahaa Xoghayaha Guud ee Aqalka Sare Cabdinaasir Ibraahim Guuleed oo ka qayb galay shirka Xoghayayaaash Guud ee Baarlamaannada Ururka Bulshada Bariga Afrika oo isna ka furmay magaalada Nairobi.