Khamiis 26-Sep-2024 {HMC} – Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa magaalada New York ee dalka Mareykanka kulan kula yeeshay, Molly Phee, Kaaliyaha Xoghayaha Arrimaha Dibedda Mareykanka ee Afrika.

Kulanka dhaxmaray Ra’iisul Wasaaraha Soomaaliya iyo Kaaliyaha Mareykanka ee Arrimaha Afrika ay uga wada hadleen xoojinta xiriirka labada waddan, sidii la isaga kaashan lahaa la dagaallanka argagixisada, amniga gobolka Geeska Afrika

Waxa ay sidoo kale Xamse Barre iyo Molly Phee kawada hadleen qaabka ay labada waddan ee Soomaaliya iyo Mareykanka ay iskula shaqeyn lahaayeen Golaha Amniga ee Qaramada Midoobay oo Soomaaliya ay xubinnimadeeda qaadan doonto sannadka cusub.

Ra’isul Wasaaraha Xukuumadda Soomaaliya oo ku sugan xarunta Qaramada Midoobay ee New Yourk ayaa kulamo kula qaadanaya madax kala gedisan, waxa uuna kala hadlayaa xaalada Soomaaliya iyo sidii dowladda taageero dheeraad ah u heli laheyd.

Khamiis 26-Sep-2024 {HMC} –  Ciidamo katirsan milatariga Soomaaliya ayaa howlgal qorsheysan ku beegsaday maleeshiyaad ka tirsan Al Shabaab, kuwaa oo la sheegay in xilliga ay ciidamada beegsanayeen ay ku sugnaayeen deegaan hoostaga gobolka Shabeelaha Hoose.

Saraakiisha ciidanka xoogga dalka ayaa sheegay in ciidamo katirsan guutooyin Gorgor iyo 14-ka October ay fuliyeen howlgal lagu beegsaday dagaallamayaal iyo horjoogayaal Al Shabaab katirsan, kuwaas oo ku sugnaa deegaanka Jowhar-Awdheegle oo 5 KM u jirta degmada Awdheegle.

Howlgalka ciidanka xoogga dalka fuliyeen ayaa lagu bartilmaameedsaday goob ay kooxda Al Shabaab isugu yimaadeen, waxaana goobtaasi ka socday shirar iyo abaabul dagaal ay wadeen saraakiisha iyo xubnaha kale ee katirsan Al Shabaab ee goobtaasi lagu weeraray.

Ciidanka Guutada 175-aad ee Gorgor iyo Guutada 146-aad ee 14-ka October ayaa si wadajir ah u fuliyay howlgalkan qorshaysan, waxaana wararku sheegayaan in howlgalkan khasaaro kala duwan lagu gaarsiiyay xubnihii katirsanaa Al Shabaab .

Khamiis 26-Sep-2024 {HMC} –  Golaha Wasiirrada Xukuumadda Jamhuuriyadda Federaalka Soomaaliya oo maanta yeeshay kualankoodii caadiga ahaa, ayaa ansixiyey soo jeedinta Wasaaradda Amniga Gudaha ee magacaabidda Taliyaha Ciidanka Booliska Soomaaliyeed, kaas oo loo magacaabay Generaal Asad Cismaan Cabdullaahi.

Taliyaha cusub ee ciidanka Booluuska Soomaaliya ee Goluhu ansixiyey, ayaa ah sarkaal aqoon iyo khibrad u leh arrimaha ciidammada, isaga oo intii u dhaxeysay sanadihii 2007 ilaa 2018 soo noqday Taliyaha Ciidanka Amniga Puntland ee PSF.

Shirka Golaha Wasiirrada oo uu guddoominayey Ku-simaha Ra’iisul Wasaaraha, ahna Ra’iisul Wasaare ku-xigeenka Xukuumadda JFS Mudane Saalax Axmed Jaamac, ayaa sidoo kale looga hadlay qodobo kale oo muhiim ahaa.

Magacaabista taliyaha cusub ee ciidanka booliiska Soomaaliya ayaa muddooyinkii lasoo dhaafay si weyn loo hadal hayay, waxa ayna magacaabistan imaaneysaa xilli taliyihii hore ee ciidanka booliiska xalay loo magacaabay in uu noqdo wasiir kuxigeen.