Axad  4, Jan 2026 {HMC} Wasiirka Arrimaha Dibadda ee Masar, Dr. Badr Abdelatty, iyo dhiggiisa Turkiga Hakan Fidan oo xiriir telefon dhex maray ayaa si weyn diiradda u saaray arrimaha Soomaaliya, gaar ahaan mowqifka ay labada dal ka qaateen aqoonsiga Israel ay ku sheegtay in ay siisay Somaliland, arrin ay ku tilmaameen mid si cad u jebinaysa sharciga caalamiga ah iyo Axdiga Qaramada Midoobay.

Labada wasiir ayaa si wadajir ah u adkeeyay in Soomaaliya ay tahay dal leh midnimo, madax-bannaani iyo wadajir dhuleed oo aan gorgortan geli karin, iyagoo caddeeyay in tallaabo kasta oo hal dhinac ah oo lagu carqaladeynayo midnimada dalka ay khatar ku tahay xasilloonida Geeska Afrika iyo amniga guud ee gobolka.

Wadahadallada ayaa sidoo kale lagu xusay in mowqifkan diidmada ah uusan ku ekaan Masar iyo Turkiga oo keliya, balse ay wadaagaan Ururka Iskaashiga Islaamka iyo dhammaan dalalka ku yaalla gobolka, kuwaas oo horay u muujiyay in aysan aqbali karin isbeddello siyaasadeed oo lagu sameeyo khariidadda Soomaaliya si ka baxsan rabitaanka shacabka Soomaaliyeed iyo xeerarka caalamiga ah.

Intii uu socday xiriirka, wasiirradu waxay hoosta ka xariiqeen muhiimadda ay leedahay in la dhowro doorka dowladda federaalka ah ee Soomaaliya, isla markaana la taageero dadaallada lagu xoojinayo amniga, nabadda iyo dhismaha hay’adaha qaranka, si looga hortago firaaq kasta oo siyaasadeed oo ay ka faa’iideysan karaan kooxaha xagjirka ah iyo quwadaha shisheeye.

Ka sokow arrimaha Soomaaliya, Masar iyo Turkiga ayaa ka wada hadlay xaaladda bani’aadannimo ee ka jirta Marinka Gaza, iyagoo ku baaqay in si buuxda loo adkeeyo xabbad-joojinta, la dardar-geliyo marxaladda labaad ee heshiisyada nabadeed, lana hubiyo in gargaar bani’aadannimo oo degdeg ah uu gaaro shacabka Falastiiniyiinta.

Sidoo kale, labada dhinac ayaa is dhaafsaday aragtiyo ku saabsan xaaladda Yemen, iyagoo adkeeyay muhiimadda ay leedahay dejinta xiisadda, dhiirrigelinta wadahadalka siyaasadeed iyo ka fogaanshaha tallaabooyin hal dhinac ah oo sii hurin kara colaadda dalkaas.

Dhanka xiriirka laba geesoodka ah, wasiirradu waxay dib u eegis ku sameeyeen diyaargarowga shirka labaad ee Golaha Iskaashiga Istaraatiijiga ee Heerka Sare ee Masar iyo Turkiga, kaas oo la filayo inuu qabsoomo rubuca hore ee sanadka 2026, islamarkaana ay guddoomin doonaan Madaxweyne Cabdifataax Al-Sisi iyo Madaxweyne Recep Tayyip Erdoğan.

Ugu dambeyn, Masar iyo Turkiga ayaa isku raacay in ay sii xoojiyaan wada-tashiga iyo isku-duwidda mowqifyadooda, si loo ilaaliyo xasilloonida gobolka loona xaqiijiyo in Soomaaliya ay sii ahaato dal mideysan oo ka madax-bannaan faragelin shisheeye.

Axad  4, Jan 2026 {HMC} Madaxweynaha Mareykanka Donald Trump ayaa sabtigii soo xiray madaxweynahya Venezuelan Nicolas Maduro kaddib weerar lagu qaaday caasimadda dalkaas ee Caracas.

Xeer-ilaaliyaha guud ee Mareykanka, Pam Bondi, ayaa ku dhaaaqday in Nicolas Maduro iyo xaaskiisa dacwad loogu soo oogayo New York.

Pam Bondi waxay intaas ku dartay in Maduro lago soo oogay “shirqool la xiriir sameyn iyo ka ganacsiga maandooriye, in uu u geliyo daroogo Mareykanka, iyo haysasho hubka wax-gumaada oo lagu weerarayo Mareykanka”

Waxay kaloo intaas ku dartay in madaxweynaha iyo xaaskiisa ay degdeg u wajahayaan cadaaladda.

BBC

Axad  4, Jan 2026 {HMC} Wararka ka imaanaya Buuraleyda Calmiskaad ee Gobolka Bari ayaa sheegaya in saaka uu qarax miino ka dhacay waddada cusub ee isku xirta deegaanada Dhaadaar iyo Boosaaso, kaas oo sababay khasaare isugu jira dhimasho iyo dhaawac.

Qaraxa ayaa lala beegsaday baabuur miino-baar ah oo ay leeyihiin Ciidamada Puntland, sida ay sheegayaan wararka.

Wararka ayaa intaasi ku daraya in qaraxu uu sababay geerida 3 askari iyo dhaawaca 5 kale.

Saddexda askari ee ku geeriyooday qaraxa ayaa kala ah.

Jaamac Maxamed Caduur, Taliyihii Saadka Ururka Dayax ee Ciidamada Puntland, Miina-baarihii ciidanka iyo Darawalkii baabuurka miina-baarka waday.

Sidoo kale, ilaa shan askari oo kale ayaa ku dhaawacmay qaraxa, kuwaas oo la gaarsiiyay goobaha caafimaadka si loogu daweeyo dhaawacyadooda.

Ciidamada Puntland ayaa hadda wada hawlgal baaris iyo xaqiijin amni ah oo ka socda halka uu qaraxu ka dhacay, si loo xaqiijiyo amniga waddada loona baadi-goobo cidda ka dambeysay falkaasi.

Maamulka Puntland ayaa weli ka hadlin faahfaahin dheeraad ah oo ku saabsan qaraxan.

Axad  4, Jan 2026 {HMC} Wasiirrada Arrimaha Dibadda ee Masar iyo Turkiga ayaa si wadajir ah u diiday aqoonsi kasta oo Isrl ama cid kale siiso Somaliland, iyagoo ku tilmaamay mid ka hor imaanaya sharciga caalamiga ah iyo Axdiga Qaramada Midoobay.

Talaabadan ayaa ka dambeysay kadib markii qadka taleefanka ay ku wadahadleen Dr. Badr Cabdulcaati iyo Hakan Fidan, kuwaas oo ka wada hadlay xaaladda Geeska Afrika, gaar ahaan Soomaaliya.

Labada wasiir ayaa adkeeyay taageeradooda midnimada iyo wadajirka dhuleed ee Jamhuuriyadda Federaalka Soomaaliya, kana digay in tallaabooyin hal dhinac ah ay khatar ku yihiin nabadda iyo xasilloonida gobolka.

Masar iyo Turkiga ayaa mar kale xaqiijiyay taageeradooda buuxda ee midnimada, madaxbannaanida iyo wadajirka dhuleed ee Jamhuuriyadda Federaalka Soomaaliya, iyagoo ku baaqay in laga fogaado tallaabooyin hal dhinac ah oo wax u dhimaya qarannimada Soomaaliya ama carqaladeynaya dadaallada lagu xoojinayo nabadda iyo xasilloonida dalka.

Labada dhinac ayaa tilmaamay muhiimadda ay leedahay in dhammaan arrimaha la xiriira Soomaaliya lagu xalliyo wada-hadal, is-afgarad iyo ixtiraam buuxa oo loo hayo sharciga caalamiga ah, si loo xaqiijiyo nabad waarta iyo amni u adeegaya shacabka Soomaaliyeed iyo guud ahaan gobolka.

Axad  4, Jan 2026 {HMC} Ciidamada ammaanka ee dowladda Federaalka Soomaaliya ayaa maanta gaaray deegaanka ay  AS ku weerareen gaari ay saarnaayeen dad shacab ah oo musaafur ah, kaddib markii qarax miino lagula eegtay duleedka degmada Ceeldheer ee gobolka Galgaduud.

Qaraxa ayaa sababay khasaare naf iyo maalba leh, iyadoo ugu yaraan 7 qof oo shacab ah ay ku geeriyoodeen, halka tiro kale ay ku dhaawacmeen.

Sawirro laga helay goobta ayaa muujinaya burbur xooggan oo gaaray gaariga ay saarnaayeen dadka musaafurka ah, kaas oo si weyn u gubtay una burburay.

Ciidamada dowladda oo goobta gaaray ayaa bilaabay baaritaan ku saabsan dhacdada, iyagoo sidoo kale xaqiijinaya ammaanka deegaanka si looga hortago qaraxyo kale oo suurtagal ah.

Dowladda Federaalka Soomaaliya ayaa cambaareysay falkaas, waxayna ku tilmaantay mid arxan-darro ah oo si bareer ah loogu beegsaday dad rayid ah.

Dadka ku dhaawacmay qaraxa ayaa qaarkood loo soo qaaday magaalada Muqdisho si loogu daaweeyo xaaladooda caafimaad, halka kuwa kale lagu dabiibayo xarumo caafimaad oo ku yaalla gobolka.

Axad  4, Jan 2026 {HMC} Xarumo Caafimaad oo ku yaalla   ayaa wajahaya xaalado dhaqaale la’aan, waxaa la sheegay in ay xirmayaan in ka badan 60 Xarumood maadaama uu go’ay lacagihii ku baxayay.

Wasiirka Dowlad-Goboleedka Galmudug, Cabdiraxmaan Maxamed Diiriye Makaawi ayaa sheegay in xirmashada Xarumahaan ay kusoo beegmeen xili ay xaaladdu adag tahay oo Abaaro darran ay ka jiraan Gobollada Dalka gaar ahaan Bartamaha.

Makaawi ayaa intaas ku daray in xarumahaan xirmaya ay dabooli jireen dad badan, 25 kamid ahna loogu adeegayay Carruurta, waxa uu dalbaday in la garab istaago sii socoshada Mashaariicdaan si looga hortago halista laga digayo.

“Haddii Roob yimaado dhibaato ayaa jira, haddii la waayo dhibaato ayaa jirta, haddii Siyaasadda iyo amniga lagu heshiin waayo abaarta ayaa imaanaysa, Galmudug 500,000 oo qof ayaa saameen ku yeelatay abaarta hadda jirta.” Sidaasi waxaa yiri, Cabdiraxmaan Maxamed Diiriye Makaawi, Wasiirka Gargaarka Galmudug

Waa uu sii hadlay waxaana uu hadalkiisa sii raaciyay “25 xarumood oo loogu talagay carruurta ayaa maanta waxaa ka istaagay mashaariicdii, March 2026, saddex bilood ka dib 35 xarumood ayaa mashaariicda ka istaagi doonaan.”

Hay’ado gacanta ku hayay Mashaariic kala duwan ayaa shaqada joojiyay sababo la xiriira Dalalkii iyo ururradii Caalamiga ah ee garab taagnaa oo ku wargeliyay in ay joojiyeen taakuladii ay siinayeen, waxa ay ku qasbanaadeen in ay qaataan go’aanka albaabada la isugu dhufanayo xarumo badan oo kala duwan.

Axad  4, Jan 2026 {HMC} Dowladda Kuuriyada Waqooyi ayaa sheegtay in ay aad uga xuntahay tillaabada Mareykanka ku soo xiray Madaxweynihii dalka Venezuela, Nicolas Maduro.

Afhayeenka Wasaaradda Arrimaha Dibadda ee Waqooyiga Kuuriya oo la hadlay Wakaaladda Wararka KCNA ayaa sheegay in hannaanka loo maray qabashada Maduro uu yahay mid qaab daran oo ka hor imaanaya Madaxbannaanida dalkaasi.

“Dhacdadan waxaa ay tusaale u tahay naxariis darrada Mareykanka iyo dabeecadda qalafsan ee maamulka Madaxweyne Trump” ayuu yiri Afhayeenka Wasaaradda Arrimaha Dibadda Kuuriyadda Waqooyi.

Hadalka afhayeenka ayaa ku soo aadaya xilli dalal badan oo caalamka ay cambaareeyeen tillaabada Mareykanka ku soo xiray Madaxweynihii dalka Venezuela, Nicolas Maduro.

Hoggaamiyaha la xiray oo laga dajiyay magaalada Newyork ayaa la qorsheynayaa in la soo taago Maxkamad, si loogu soo oogo dambiyo ay ka mid yihiin ka ganacsiga daroogada iyo burburinta Dimuqoraadiaydda.