Arbaco 12 June 2024 {HMC} Wasiirka Gaashaandhigag Xukuumadda Soomaaliya Cabdiqaadir Maxamed Nuur oo wareysi bixiyay ayaa ka hadlay go’aanka dowladda ee kula wareegeyso qabuuraha Iskuul Buluusiya, isagoona dhanka kale eedeyn u jeediyay dowladdii hore ee Farmaajo.

Wasiirka ayaa sheegay in dowladdii hore uu madaxweynaha ka ahaa Farmaajo ay isku deyday inay burburiso qabuuraha Iskool Buluusiya, iyada oo ka leh dano gaar ah, balse laga diiday xilligaasi, kadib markii ay ka horyimaadeen culimada iyo shacabka.

Waxa uu sheegay Wasiirka Gaashaandhigga in Madaxweynihii hore ee Soomaaliya Farmaajo iyo kooxdiisa ay rabeen in dhulkaasi ka dhistaan hoteelo iyo goobo kale oo dalxiis, balse ku fashilmeen rabitaankooda maadaama ay dano gaar ah wadeen.

“Xukuumaddii madaxweyne Farmaajo dalab ayay culimada Soomaaliyeed u gudbisay waxay codsadeen in culimada ay Ummadda Soomaaliyeed u sharraxdo, kadib culimada way wadiisay waxa meesha lagu qabanaayo waxa ay yiraahdeen hoteelo ka dhiseynaa iyo deegaan wayna diideen culimada” ayuu yiri Wasiirka Gaashadhigga.

Dhinaca kale warkan eedeynta ah ee kasoo yeeray Wasiirka Gaashaandhigga Soomaaliya waxaa si adag u beeniyay afhayeenka Madaxweyne Farmaajo, waxa uuna warkaasi ku tilmamay mid aan raad laheyn oo been ah.

”Warka uu sheegay Wasiirka Gaashaandhiggu waa mid aan sal iyo raad toonna lahayn oo laga leeyahay dano gurracan, waxayna ka tarjumaysaa sida dowladda hadda joogta ay u caadaysatay been abuurka iyo musuqmaasuqa xargaha goostay” ayuu yiri afhayeenka.

Afhayeenka Farmaajo Cabdirashiid Maxamed Xaashi ayaa intaas ku daray ”Ummadda Soomaaliyeed way ka dheregsan yihiin labada madaxweyne, midka ay caadada u tahay musuqmaasuq, wayna xusuustaan in Maxadweyne Farmaajo wareejiyey dhulkii danta guud iyada oo la dhawray iyo Madaxweynaha hadda xilka haya oo isaga oo aan sannad joogin xafiiska dhaxal wareejiyey inta badan dhulkii danta guud.

Eedeyta kasoo yeertay wasiirka Gaashaandhigga ayaa kusoo aadeysa xilli dowladda hadda jirta ammartay in meydadka ku aasan qabuuraha Iskuul Buluusiya halkaasi laga saaro, waxa ayna dowladda sheegtay in dhulkaasi iyadu u baahan tahay.

Arbaco 12 June 2024 {HMC} Shirkadda diyaarada Masar ee Egypt Air oo warsaxaafadeed soo saartay ayaa shaacisay inay bilaabeyso duulimaadyo ay ku imaaneyso magaalada Muqdisho ee caasimada dalka, waxayna soo saartay wargelin ku aadan duulimaadyadeeda.

Qoraal kooban oo lagu daabacay bogga Twitterka ee shirkadda Egypt Air ayaa waxaa lagu sheegay in diyaaradahooda ay isaga kala gooshi doonaan Qaahira, Muqdisho iyo Jabuuti.

“War xiiso leh! Diyaaradda Egypt Air waxay bilaabaysaa khad cusub oo ay ku tagi doonto Jabuuti iyo Muqdisho. Soo ogow dhaqamada iyo muuqaalka meelahan cajiibka ah.” ayaa lagu yiri qoraalka kasoo baxay shirkadda.

Sidoo kale waxa ay intaasi kusii dartay in duulimaadyadooda ayaa billaabanayaan wixii ka dambeeya 11-ka bishan June oo shalay ahayd, ayna tagi doonaan Soomaaliya iyo Jabuuti.

Sida lagu sheegay qoraalka todobaad kasta laba maalmood ayay diyaaradahooda kasoo duuli doonaan Qaahira, iyaga soo gaarayo Muqdisho, kadibna kusii hakanaya Jabuuti.

“Laga bilaabo 11-ka July 2024, kasoo duul Qaahira Khamiis iyo Sabti kasta. Qaahira illaa Muqdisho oo ku sii hakanaya Jabuuti.” ayaa mar kale lagu yiri bayaanka.

Soomaaliya ayaa waxaa bilihii u dambeeyay kusoo xirmayay duulimaadyo caalami ah oo hadda yimaada Garoonka Aadan Cadde, kuna sii xira dalalka kale ee caalamka.

Tallaabadan ayaa imaanaysa xilli diyaaradda Fly Dubai oo kamid aheyd diyaaradaha caalamiga ah ee yimaada Muqdisho ay ku dhowaaqday inay joojineyso duulimaadyadii ay ku tegi jirtay Muqdisho wixii ka dambeeya 11-ka bishaan June oo shalay ku beegneyd.

Laba arrimood ayaa loo sababeeyay arrintaan, balse mid kamid ah labadaasi qodob waxaa ku hareeraysan waxyaabo daciifinaya. Labada qodob mid waa suuqa midna waa siyaasadda.