Sabti 8 June 2024 {HMC}  Dagaal xooggan oo u dhaxeeya labo maleeshiyo beeleed oo kasoo kala jeeda degmooyinka Caabudwaaq iyo Xeraale ayaa tan iyo saakay waabarigii ka socda deegaan lagu magacaabo Laandheer oo u dhexeeya labada degmo.

Maleeshiyaadka dagaallamaya ayaa isku adeegsanaya hubka nuucyadiisa kala duwan, waxaana dagaalka uu ahaa mid saacadbo saacada kasii dambeysa sii xoogeesanayay ayna isku soo gurmanayeen dhinacyada dagaallamaya.

Khasaaro badan oo isugu jira dhimasho iyo dhaawac ayaa ka dhashay dagaalka saacadaha badan ka socda deegaanka u dhaxeeya Xeraale iyo Caabdudwaaq, dadka ku dhaawacmay dagaalka iyo kuwa ku dhintay ayaa la geeyay isbitaaladav labada degmo iyo goobo kale.

Ciidamo katirsan booliiska Galmudug oo ka kala baxay Caabuwaaq iyo Xeraale ayaa ku guul dareestay in dagaalka qaboojiyaan, waxaana lasoo warinayaa in dagaalka ay ku dhinteen askar uu ku jiro taliye kuxigeenkii saldhigga booliiska degmada Caabudwaaq .

Maamulka Galmudug ayaan wali ka hadlin dagaalka dhiigga badan ku daadanayo ee saakay ka socda deegaanno maamulkaasi katirsan, labada beel ee dagaalka u dhaxeeyo ayaana marar badan sidaan oo kale horey ugu dhax maray dagaallo rag badan kudhinteen.

Sabti 8 June 2024 {HMC}  Al Shabaab ayaa saakay weerar culus oo ku bilowday qaraxyo ismiidaamin ah ku qaaday saldhigyada ciidanka dowladda iyo kuwa deegaanka kaga sugan yihiin degmada Ceeldheer, waxaana halkaasi ka dhacay dagaal culus oo dhiig badan ku daatay.

Wasiir kuxigeenka Wasaaradda Warfaafinta Soomaaliya Cabdiraxmaan Al Cadaala ayaa qoraal uu soo saaray ku sheegay in kooxda Al Shabaab lagu jabiyay weerarkii saakay aroortii hore ku qaadeen degmada Ceeldheer.

Al Cadaala ayaana sheegay in ciidanka dowladda iyo kuwa deegaanka iska difaaceen weerarka lagu soo qaaday, waxa uuna sheegay in hadda socdaan dhameestirka howlgalka ka dhanka ah kooxdii weerarka soo qaaday sida uu tilmaamay.

”Khawaarijta si adag ayaa loogu jabiyay Ceeldheer , alle ayaa mahadsan, Ciidanka Qaranka iyo Geesiyaasha deegaanku waa mahadsanyihiin, dhamaystirka hawlgalka ayaa socda, ayuu yiri Wasiir kuxigeenka Wasaaradda Warfaafinta.

Dhinaca kale warbaahinta dowladda war lagu daabacay ayaa lagu sheegay in ciidanka dowladda iyo kuwa deegaanka ay hayeen xogta kooxda Al Shabaab ee weerarka soo qaaday, waxa ayna xuseen in weerarkaasi Al Shabaab si weyn loogu jabiyay.

Kooxda Al Shabaab ayaa dhankooda guulo ka sheegtay weerarka ay saakay ku qaadeen degmada Ceeldheer, waxa ayna sheegeen in halkaasi la wareegeen kuna dileen ciidan badan, sidoo kale ku qabsadeen hub kala duwan iyo saanad.

Sheegashada labada dhinac marka laga soo tago ma jiraan ilo madax-bannaan oo xaqiijinaya khasaaraha ka dhashay weerarka Al Shabaab saakay ku qaaday degmada Ceeldheer iyo waliba cida libinta dagaalka heshay.