Talaado Dec 16, 2025 {HMC} Wasiirka Gaashaandhigga Dalka aan walaalaha nahay ee Jabuuti ayaa maanta Soo gaaray Magaalada  Muqdisho.

Wasiiru Dowlaha Wasaaradda Gaashaandhigga, Xildhibaan Cumar Cali Cabdi, ayaa maanta garoonka diyaaradaha Aadan Cadde ku soo dhaweeyay Wasiirka Gaashaandhigga Jamhuuriyadda Jabuuti, Xasan Cumar Maxamed.

Wasiirka Gaashaandhigga Jabuuti ayaa ka qeybgalaya Kalfadhiga 35-aad ee Wasiirrada Gaashaandhigga ee dalalka ku bahoobay Ciidamada Heeganka Afrikada Bari (EASF), oo ay martigelinayso Jamhuuriyadda Federaalka Soomaaliya.

Tuesday Dec 16, 2025 {HMC} Xoghayaha Guud ee FESOJ oo ka cudurdaartay ka mid noqoshada Guddiga Ilaalinta iyo La socodka Hab-dhaqanka Saxaafadda ee Xilliga Doorashada.

Xoghayaha Guud ee Ururka Suxufiyiinta Soomaaliyeed ee FESOJ Mudane Faarax Cumar Nuur oo magaciisu uu ku soo baxay Liiska Xubnaha guddiga ilaalinta iyo la socodka Habdhaqanka Saxaafadda ee Xilliga Doorashada ayaa cudurdaar rasmi ah ka bixinaya ka imid ahaanshahaa guddigaas.

“Federation of Somali Journalists- FESOJ, waxa uu u taagan yahay difaaca xorriyadda saxaafadda iyo tan hadalka sidaas darteed, mid shakhsi iyo mid ururba kama mid noqon karno mabaadii’deena wixii wax u dhimaya, waxaanna sii wadi doonnaa ku shaqaynta madaxbannaanida iyo kormeerka xaaladdaha Suxufiyiinta ku jira shaqooyinka, si aan loo dhantaalin dhowrista xorriyadda saxaafadda iyo ilaalinta saxafiyiinta guud ahaan Soomaaliya”.

Xoghayaha guud Faarax Cumar waxaa uu intaas ku daray in uu rajeynayo in mawqifkaas la tixigalin doono Insha Allah.

Talaado Dec 16, 2025 {HMC} Ra’iisul wasaaraha Hindiya , Narendra Modi ayaa maanta booqasho ku tagay Addis Ababa, halkaa oo wadahadallo uu kula yeelanayo Ra’iisul wasaaraha Itoobiya, Abiy Axmed.

Booqashada waxaa ka horreysay socdaal ay Addis Ababa ku tageen Ra’iisul wasaaraha Singapore, Lawrence Wong oo sheegay inay Addis Ababa noqon doonto caasimadda labaad ee Afrika oo ay Singapore safaarad ku yeelato, waxaa ka horreyay Ra’iisul wasaaraha Malaysia, Anwar Ibraahim oo booqashadiisa Addis Ababa ay ahayd mid taariikhi ah ,

maaddama uu ahaa hoggaamiyihii u horreeyay ee ka socda Malaysia oo booqda Itoobiya, wuxuuna albaabka u furay iskaashi cusub oo ay yeelanayaan Addis Ababa iyo Kuala Lumpur.

Talaado Dec 16, 2025 {HMC} Masar ayaa heshiis dhan $200 milyan la saxiixatay shirkadda Al Mana Holding ee laga leeyahay dalka Qadar, kaas oo ku saabsan mashruuc shidaal (sustainable aviation fuel).

Mashruuca ayaa laga hirgelin doonaa Aagga Dhaqaalaha ee Kanaalka Suweys, waxaana la filayaa in wejigiisa koowaad uu soo saaro ilaa 200,000 tan sanadkii.

Tallaabadan ayaa ah maalgelintii warshadeed ee ugu horreysay ee ay Qadar ka sameyso aaggaas, taasoo muujinaysa iskaashi laba geesood ah oo sii xoogeysanaya.

Masar ayaa dadaal ugu jirta soo jiidashada maalgelin shisheeye si ay uga hortagto caqabadaha dhaqaale ee dalka ka jira, oo ay ka mid yihiin deymaha dibadda iyo hoos u dhaca miisaaniyadda.

Talaado Dec 16, 2025 {HMC} Taliyaha Ciidanka Xoogga Dalka Soomaaliyeed, Sarreeye Gaas Odawaa Yuusuf Raage, ayaa maanta shir-guddoomiyay Kalfadhiga 35-aad ee Caadiga ah ee Guddiga Taliyeyaasha Difaaca iyo Ammaanka ee Ciidanka Heeganka Afrikada Bari (EASF), oo ka socda magaalada Muqdisho.

Kulankan, oo ay ka qaybgalayaan taliyeyaasha ciidamada waddamada xubnaha ka ah Ciidanka Heeganka Afrikada Bari (EASF), ayaa diiradda saaraya muhiimadda ay leedahay in la iska kaashado amniga gobolka, maadaama nabadda gobolku ay tahay mid isku xiran, loona baahan yahay iskaashi joogto ah.

Taliye Odawaa ayaa tilmaamay in shirkan, oo markii labaad lagu qabanayo Soomaaliya, uu caddeyn u yahay sida ay Dowladda Soomaaliya uga go’an tahay ka qaybqaadashada ilaalinta amniga gobolka, isla markaana amniga waddan kasta oo ka mid ah gobolka uu yahay tiir muhiim u ah xoojinta nabadgelyada Geeska Afrika.

Talaado Dec 16, 2025 {HMC} Shir ay mucaaradku ku lahaayeen magaalada Kismaayo ayaa wajahaya hoos-u-dhac ka qeybgal iyo caqabado dhaqaale, kaddib markii la hakiyey taageero la filayay in ay ka timaaddo Imaaraadka Carabta, sida ay ogaatay Hmc Somalia oo xiganaysa xubno ka tirsan Baarlamaanka oo qaybgali lahaa shirka Kismaayo.

Imaaraadku Carabta ayaa horey u muujiyay diyaar garow uu ku taageerayo shirka Kismaayo dhinaca dhaqaalaha.

Hase yeeshee, wada-hadallo iyo isfahan la sheegay in ay dhexmareen Madaxweynaha Soomaaliya, Xasan Sheekh Maxamuud, iyo dowladda Imaaraadka Carabta ayaa horseeday in maalgelinta la filayay ay istaagto.

Go’aanka Imaaraadka ayaa si toos ah u saamaysay qabanqaabada shirka, iyadoo Madaxweynaha Jubbaland, Axmed Maxamed Islaam (Axmed Madoobe), uu mucaaradka ku wargeliyay in uusan awood u lahayn bixinta kharashaadka safarka iyo deggenaanshaha dhammaan ka qeybgalayaasha Kismaayo imanaya.

Sidaa darteed, qof kasta oo shirka ka qeybgalaya ayaa lagu wargeliyay inuu iskiis u daboolo kharashaadkiisa.

Axmed Madoobe ayaa sheegay in uu qaadan doono qarashka daganaasha dadka la casuumay qaarkood balse mucaaradku ay hoos u dhigaan dadka ay casuumayaan iyo in meesha laga saaro dhamaan dadka ka qaybgalkooda laga maarmi karo oo markii hore la qorsheeyay la geeyo Kismaayo.

Dadkaas waxaa ka mid ah xubmo ka tirsan bulshada Rayidka, aqoonyahano, odoyaal dhaqameed iyo guddi ka socda dadka ka cabanaya dhul boobka DFS.

Go’aankaas ayaa sababay in tiradii la filayay inay shirka xaadiraan ay hoos u dhacdo, maadaama caqabado dhaqaale ay soo food saareen qaar ka mid ah siyaasiyiinta iyo xubnaha mucaaradka.

Imaaraadka ayaa lagu eedeeyaa in uu xiriir la leeyahay dhamaan dhunacyada isku haaya siyaasada Soomaaliya isagoo kala ilaaliya in ay isku soo dhawaadaan.

Talaado Dec 16, 2025 {HMC} Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre ayaa maanta ka qeyb galay munaasabadda xuska 65-guurada xiriirka diblomaasiyadeed ee u dhexeeya Jamhuuriyadda Federaalka Soomaaliya iyo Jamhuuriyadda Dadka Shiinaha, taas oo lagu qabtay Magaalada Muqdisho.

Ra’iisul Wasaaraha oo khudbad ka jeediyay munaasabadda ayaa muujiyay muhiimadda taariikhiga ah ee ay leedahay 65 sano oo xiriir diblomaasiyadeed, isagoo xusay in xiriirka Soomaaliya iyo Shiinaha uu ku dhisan yahay saaxiibtinimo qoto dheer, ixtiraam madaxbannaani, is-fahan iyo iskaashi faa’iido wadaag ah.

Mudane Xamsa Cabdi Barre ayaa tilmaamay in tan iyo aasaaskii xiriirka diblomaasiyadeed sanadkii 1960-kii, labada dal ay wada joogeen marxalado kala duwan oo isbeddello gobol iyo kuwa caalami ah, isla markaana Shiinaha uu mar walba ahaa saaxiib ay Soomaaliya leedahay oo taageera mudnaanta Qaranka Soomaaliya.

Ra’iisul Wasaaraha ayaa si gaar ah u xusay taageerada Shiinaha ee dhowaan ay ku dhawaaqday dowladda Waddankaas kaas oo ah hal milyan oo doollar oo loogu talagalay gurmadka shacabka Soomaaliyeed ee ay abaartu saameysay, isagoo ku tilmaamay tallaabo muujinaysa garab istaag dhab ah iyo saaxiibtinimo fog.

Munaasabadda Waxaa ka qeyb galay xubno ka tirsan golaha Wasiirada Xukuumadda Soomaaliya, qaar ka mid ah danjireyaasha caalamka ee fadhigoodu yahay Muqdisho iyo marti-sharaf kale.

Talaado Dec 16, 2025 {HMC} Milatariga Dowladda Maraykanka ayaa sheegay inuu weeraray saddex doon oo lagu tuhunsanaa ka ganacsiga daroogada kuwaas oo ku sugnaa Badweynta Baasifigga, taas oo keentay dhimashada siddeed qof.

Taliska Koonfureed ee ayaa baraha bulshada ku baahiyay muuqaal muujinaya weerarrada, isagoo sheegay in doomahaasi ay ku socdeen marinno si fiican loogu yaqaan ka ganacsiga daroogada isla markaana ay ku lug lahaayeen hawlgallo daroogo tahriibin ah.

Sida uu sheegay milatarigu, in ka badan 20 doon oo ku sugnaa Badweynta Baasifigga iyo Kariibiyaanka ayaa la weeraray bilihii la soo dhaafay, taas oo sababtay dhimashada ugu yaraan 90 qof.

Arrintani waa qayb ka mid ah olole uu madaxweyne Donald Trump ku qaadayo kooxaha uu ku eedeeyo inay daroogo ku tahriibiyaan gobolka.

Si kastaba ha ahaatee, khubaro qaar ayaa sheegaya in weerarradan ay suurtagal tahay inay jebiyaan sharciga caalamiga ah.

Weerarkii ugu horreeyay ee dhacay 2-dii Sebtembar ayaa muran gaar ah dhaliyay, maadaama la sheegay inuu ahaa weerar laba jeer ah, halkaas oo dadkii ka badbaaday weerarkii koowaad lagu dilay weerarkii labaad.

Khubaro dhanka sharciga ah ayaa u sheegay BBC Verify in weerarka labaad ee ay ciidamada Maraykanku ku qaadeen doon lagu tuhunsanaa tahriibinta daroogada oo laga lahaa Venezuela uu noqon karo mid sharci-darro ah, isla markaana loo tixgelin karo dil sharciga ka baxsan marka loo eego sharciga caalamiga ah.

Aqalka Cad ayaa sheegay in tallaabooyinka la qaaday ay waafaqsan yihiin shuruucda dagaalka, isla markaana loogu talagalay in lagu ilaaliyo.

Maraykanka kooxaha ka ganacsada daroogada wuxuu ku eedeynayaa inay “sun dalka soo gelinayaan oo burburinayaan nolosha muwaadiniinta.”