Isniin 6 May, 2024 {HMC} Dowladaha Soomaaliya iyo Kenya ayaa galabta ku kala saxiixday magaalada Nairobi ee caasimadda dalka Kenya heshiisyo is-afgarad oo ku saabsan dhinacyada, Arrimaha dibedda, Nabadgalyada, Dhaqaalaha, Ganacsiga, Waxbarashada iyo arrimaha adeegga Bulshada.

Wasiirka Arrimaha Dibedda ee Soomaaliya Mudane Axmed Macallin Fiqi ayaa Sooaamliya u saxiixay heshiiskan.

Dhanka Kenya, waxaa heshiiskaan u saxiixay Wasiirka Arrimaha Dibedda Mudane Musalia Mudavadi, heshiisyadan Is-afgarad ee ay gaareen labada dal, ayaa kor loogu qaadayaa xiriirka iskaashi iyo wax wada qabsiga ka dhaxeeya Soomaaliya iyo Kenya.

Sidoo kale, Wasiirka Waxbarashada, Hiddaha iyo Tacliinta Sare, Mudane Faarax Sheekh Cabdulqaadir iyo Wasiirka Waxbarashada Kenya Mudane Ezekiel Machogu, ayaa kala saxiixday Heshiiska Is-afgaradka oo ku saabsan Iskaashiga Waxbarashada, Tababarka iyo Cilmi-baarista.

Heshiiskaan waxaa kor loogu qaadayaa xoojinta iskaashiga dhinaca waxbarashada ee labada dal.

Heshiisyadan ayaa qeyb ka ah Socdaalka Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, uu ku joogo dalka Kenya ee la xiriira adkaynta xiriirka labada dal iyo horumarinta iskaashiga dhinacyada badan leh.

Isniin 6 May, 2024 {HMC} Warbixin ku saabsan khatarta burcad badeedda ee xeebaha Soomaaliya oo kasoo baxday howlgalka Midowga Yurub ee ATALANTA ayaa lagu sheegay in ay sare u kacday dhacdooyinka sii kordhin kara khatarta burcadbadeednimada Soomaaliya.

Midowga Yurub ayaa sheegay in burcad badeeddu ay bilaabeen afduubashada doomaha dheereeya, si ay ugu isticmaalaan si ay weeraro uga soo qaadaan meelo 600nm u jira xeebaha Soomaaliya.

“Inkasta oo aysan jirin dhacdooyin la xiriira budhcad-badeednimo todobadii maalmood ee la soo dhaafay, haddana bixinta madaxfurasho waxay abuuri kartaa mowjad cusub oo afduubasho ah,” EU NAVFOR ATALANTA ayaa sidaas yidhi.

Howlgalka ATALANTA ayaa sheegay in la qiyaasayo in ugu yaraan labo koox oo burcad badeed ah laga yaabo in ay ka shiraacdaan xeebaha Soomaaliya, iyagoo isku diyaarinaya weerarro ka dhan ah maraakiibta ganacsiga.

Ciidamada badda ee Yurub ayaa sheegay weerarrada burcad-badeeddu ay yihiin kuwo macquul ah oo mar walba dhici kara. Waxay sheegeen in ay muhiin tahay in maraakiibta ka howlgala Galbeedka Badweynta Hindiya iyo Gacanka Cadmeed, gaar ahaan kuwa u jira 700nm ee xeebaha Soomaaliya ay u hoggaansamaan talooyinka amniga,.

Bishii March ee sannadkan, Markab laga leeyahay dalka Bangladesh ayaa laga qaatay lacag madax furasho ah oo lagu sheegay 5 milyan oo dollar, taasoo ah madax furashadii ugu horraysay tobanaan sano ka dib la siiyo burcad badeedda Soomaalida.

Isniin 6 May, 2024 {HMC} Maxkamada Gobolka Sool ee Maamulka SSC-Khaatumo ayaa 4 dhallinyaro ah oo da’adoodu u dhaxayso 19 ilaa 30 sanno ku xukuntay midkiiba 3 sanno oo xadhig ah iyo 500 oo dollar oo ganaax ah.

Guddoomiyaha Maxkamada oo adeegsanaya Xeerka Ciqaabta Soomaaliya, ayaa sheegay in dhallinyarada lagu helay in ay galeen danbi ah kicin dadwayne iyo qarandumisnimo, isla markaana ay qirteen danbiga ay galeen, sidaasna lagu xukumay.

Waxa uu sheegay in xeer ilaalintu ay heshay muuqaalo iyo hadalo muujinaya dhallinyaradan oo taageero u muujinaya Somaliland, isla markaana waxa uu sheegay in lagu xukumay qodobadii ay xeer ilaalintu kusoo eedaysay.

“Maxkamadu waxay ku xukuntay danbiilayaasha kala ah Xamdi Cawil Maxamed oo 30 jir ah, Nimco Jamaal Maxamed oo 20 jir, Khadra Cawil Cali oo 21 jir ah, iyo Cabdiwali Jaamac Xasan oo19 jir ah midkiiba 3 sanno oo xadhig ah iyo 500 oo ganaax ah” ayuu yidhi guddoomiyaha maxkamadu.

Magaalada Laascaanood ayaa gacanta Somaliland ka baxday badhtamihii sannadkii hore kadib dagaalo dhexmaray dadka deegaanka oo kaashanaya ciidamo uga soo gurmaday deegaanada Puntland iyo Ciidamada Somaliland.