Sabti, 29 Nov 2025 {HMC} Wasiirka Gaadiidka iyo Kaabayaasha Dhaqaalaha, dalka Turkiga Cabdulkadir Uraloğlu, ayaa ku dhawaaqay in dadaallada badbaadada la bilaabay kadib qaraxyadii ka dhacay maraakiibta saliidda ee Kairos iyo Virat ee xeebta Badda Madow, isla markaana maraakiibtu ay maranyihiin.

Uraloğlu wuxuu sheegay in shaqaale gaaraya 25 qof oo saarnaa markabka Kairos la badbaadiyay, iyadoo 20 kale oo iyaguna saarnaa qof ee ku markabka Virat ay caafimaad qabaan, waxaana gurmad u fidiyay shale samatabixiyaal ah.

Agaasimaha Guud ee Arrimaha Badda ayaa sheegay in markabka Kairos uu ku sii jeeday dekedda Ruushka ee Novorossiysk, isla markaana dab uu ka kacay isagoo marayay meel 28 mayl-badeed ka xigta xeebta Turkiga.

Qaraxa ayaa loo maleynayaa in uu yahay wax dibadda kaga yimid oo aanu ka dhalan gudaha Maraakiibta.Markabka Kairos, ayaa weli dabku ka holcayaa.

Ilaa iyo hadda lama oga sababta dhalisay qaraxyada, hase-yeeshee waxaa loo maleynayaa in diyaaradaha aan duuliyaha laheyn ay weerareen.

Sabti, 29 Nov 2025 {HMC} Hay’adaha badda ee Turkiga ayaa sheegtay in qaraxyo ay ka dhaceen laba markab oo ah nooca saliidda xambaara oo ku sii jeeday dalka Ruushka, kuwaas oo dab ka kacay kadib qaraxyo ka dhacay. Mid ka mid ah maraakiibtan wuxuu ku safrayay waqooyiga Biyogga Bosphorus markii qaraxu dhacay.

Markabka labaad waxaa la sheegay inuu marayay bariga badda Madow markii qaraxu uu isna haleelay.

Hay’aduhu waxay sheegayaan in maraakiibtaan laga yaabo in lagu weeraray diyaaradaha aan duuliyaha laheyn ee drone-ka loo yaqaan. Labadaba waxay ku jiraan liiska maraakiibta cunaqabataynta lagu soo rogay kadib markii Ruushku duullaanka ku qaaday Ukraine sannadkii 2022-ka.

Shaqaalaha labada markab saarnaa waa la badbaadiyay, sida wararku sheegayaan.

Warar kale oo soo baxaya ayaa sheegaya in mid ka mid ah maraakiibta uu weli dab ka holcayo. Dowladda Turkiga ayaa u gurmatay iyadoo weli howshu ay socoto.

Jimco, 28 Nov 2025 {HMC} Kim Jong Un, ayaa soo saaray amar ku khasbaya dadka Kuuriyada Waqooyi inay bartaan luuqadda Ruushka, waxaana lagu daray manhajka waxbarashada , iyadoo arday kasta oo fasalka 4aad ee dugsiga hoose looga baahanyahay inuu ku hadlo afka Ruushka.

Markii uu soo baxay go’aankan, waxaa warbaahinta la hadlay Alexander Kozlov, wasiirka kheyraadka dabiiciga iyo deegaanka ee Ruushka, ahna guddoomiye ku-xigeenka guddiga wadajirka ah ee Ruushka iyo Kuuriyada Waqooyi, oo sheegay dhinaca Ruushka in 3,000 arday oo dugsiyo hoose/dhexe ah iyo 300 arday jaamacadeed ay bartaan luqadda Kuuriyaanka, tallaabo la doonayo qaab nololeedka bulshada labada waddan inuu noqdo mid isku mid ah.

Jimco, 28 Nov 2025 {HMC} Dowladda Kenya ayaa la saxiixatay heshiis ku kacaya 1.5 bilyan oo dollar labo shirkadood oo ay leedahay dawladda Shiinaha , si ay u billaabaan mashaariic lagu ballaarinayo waddooyin isku xiraya Mombasa iyo dalalka dariska ah oo ay ku jiraan Uganda, Koonfurta Suudaan iyo Tansaaniya, iyadoo la sheegay heshiiskan inay ku dhaqaaqday dawladda Kenya markii maamulka Trump ee Mareykanka ay joojiyeen mashaariic uu Mareykanka ku taageerrayay horumarinta waddooyinka Kenya.

Jimco, 28 Nov 2025 {HMC} Madaxweynihii xilka laga tuuray ee Guinea-Bissau Umaro Sissoco Embaló ayaa gaaray wadanka ay jaarka yihiin ee Senegal kaddib markii ay sii daayeen ciidamada militariga ee afgamiyay dowladiisa todobaadkan, sida ay sheegtay dawladda Senegal.

Arintan ayaa dabo joogtay wada xaajood uu sameeyay ururka wadamada Galbeedka Afrika ee Ecowas oo dalbaday in madaxweynaha la sii daayo, xili ay sii kordheyso xiisadda ka taagan Guinea-Bissau.

Wasaaradda arrimaha dibadda ee Senegal ayaa bayaan ay soo saartay ku sheegtay in Embaló uu si nabad ah ku soo caga dhigtay dalkaasi isagoo soo raacay diyaarad ciidan oo loo kireeyay goor dambe oo Khamiistii ah.

Milateriga dalka Guinea-Bissau ayaa horey u dhaariyay hogaamiyaha cusub ee kumeel gaarka ah Gen Horta N’Tam, kaas oo muddo sanad ah maamuli doona wadankaasi u nugul inqilaabka.

Afgambigii Arbacadii dhacay ayaa ku soo beegmay maalin ka hor inta aysan mas’uuliyiintu ku dhawaaqin natiijada ku meel gaarka ah ee doorashada madaxweynaha iyo baarlamaanka.

Ciidamada ayaa hakiyay habsami u socodkii doorashada, waxayna hor istaageen in natiijada doorashada la shaaciyo.

Xigasho BBC

Jimco, 28 Nov 2025 {HMC} Wasiirka Wasaaradda Beeraha iyo Waraabka XFS, Maxamed Cabdi Xayir Maareeye, ayaa magaalada Istanbul ee dalka Turkiga uga qeyb galay Madasha Wasiirrada Beeraha Adduunka ee sanadkan, kaasi oo hal ku dhiggiisu ahaa “Ka hortagga luminta cuntada iyo biyaha iyo ilaalinta mustaqbalkeenna”.

Wasiirka waxa uu madasha ka jeediyay khudbad ujeedkeedu ahaa in la qaado tallaabo degdeg ah oo caalami ah si wax looga qabto khataraha isa soo taraya ee amni-darrada cuntada iyo biyo yarida.

Wasiirku waxa uu madasha ka sheegay saameynta sii kordhaysa ee isbeddelka cimilada, wuxuuna tilmaamay in Soomaaliya ay durba la tacaalayso abaaro soo noqnoqda, hoos u dhaca wax-soosaarka beeraha, iyo yaraanta biyaha.

Wuxuu ku adkeeyay in yareynta khasaaraha cuntada iyo biyaha ay maanta tahay waajibaad deegaan, dhaqaale, iyo bini’aadannimo, iyadoo ay Soomaaliya ka go’an tahay hirgelinta Qaraarka Golaha Guud ee Qaramada Midoobay A/RES/74/209, kaas oo ku baaqaya in dunida oo dhan ay xoojiso dadaallada lagu dhimayo khasaaraha cuntada iyo biyaha si loo gaaro horumar waara.

Jimco, 28 Nov 2025 {HMC} Kulankii magaalada Mombasa dalka kenya uga socday Xubnaha Goleyaasha warbaahinta Bariga Afrika EAPC ayaa lagu saxiixay heshiiska Dastuurka ay yeelanayaan Golaeyaasha warbaahinta Bariga afrika.

Labadii maalin ee la soo dhaafay ayaa la soo bandhigay aadna loo falanqeeyay Dastuurka, ugu dambeyna mabd’a ahaan ayaa la isku raacay qaabdhismeedka goboleed ee Xeerka Anshaxa ee Saxafiyiinta Bariga Afrika iyo qaabeynta dhaqanka Saxaafadda Bariga Afrika.

Kulanka oo lagu soo gabagabeeyay saxiixa Dastuurka Goleyaasha Saxaafadda Bariga Afrika waxaa wada saxiixay goleyaasha warbaahinta waddamada bariga Afrika ee Kenya, Uganda Tansaniya, Ruwanda, Kongo iyo Ururka Saxafiyiinta Soomaliyeed FESOJ ee Soomaliya.

Goleyaasha Saxafada Bariga Afrika (EAPC) waxaa loo aasaasay si ay u horumariyaan xorriyadda saxaafadda, xirfadda, iyo xeer-nidaamiyaha guud ahaan Bulshada Bariga Afrika (EAC). Sida ku cad qodobka 104 ee EAC.

Jimco, 28 Nov 2025 {HMC} Saddex qof oo u dhalatay Shiinaha ayaa maanta lagu dilay xadka Tajikistan iyo Afgaanistaan, markii diyaarad nooca aan duuliyaha lahayn lagu qarxiyay warshada sifeysa macdanta oo ay ka shaqeynayeen shaqaale u dhashay Shiinaha , iyadoo dawladda Tajikistan ay sheegtay in weerarka laga soo qaaday gudaha dalka Afgaanistaan.

Shiinaha ayaa sidoo kale sheegay inay sameynayaan baaritaan la xiriira weerarka lagu dilay muwaadiniintiisa.

Horey weerarro laga soo qaaday Afgaanistaan ayaa ka dhacay xadka Pakistan, markan waa Tajikistan, taa oo indhaha ku soo jeedinaysa maamulka ay hoggaamiyaan Taalibaan ee dalka Afgaanistaan oo loo soo bandhigi karo inay hadda khatar ku yihiin gobolka koonfurta Aasiya.