Sabti jan-6 2024-{HMC}  Kumannaan shacab ah oo ka careysan heshiis beenaadkii dowladda Itoobiya ay la saxiixatay maamulka Somaliland ayaa màanta isugu soo baxay magaalada Burco ee xarunta Gobolka Togdheer.

Shacabka Magaalada Burco ayaa isugu soo baxay waddooyinka magaalada  kuwaas oo si weyn uga soo horjeystay damac gurracan ee Dowladda Itoobiya ku dooneeyso badda soomaaliya.

Dadkii ka qeyb galay banaanbaxa ayaa muujiyay dareenkooda ku aadan sida ay uga soo horjeedaan isku daygaasi, iyagoo sheegay in aysan aqbali doonin in taako ka mid ah dhulka iyo badda soomaaliya midnaba aan la siin karin.

Maalmihii la soo dhaafay waxaa ka dhacay guud ahaan dalka dibad baxyo waa-weyn oo looga soo horjeeda heshiis benaadka Dowladda Itoobiya ay la gashay Soomaaliland.

intabadan Shacabka Soomaaliyeed ayaa si isku mid ah u mujiyeen sida aan marnaba loo aqbali karin ku xadgudubka ay Dowladda Itoobiya ku sameeysay qarannimada ummadda Soomaaliyeed.

Sabti jan-6 2024-{HMC} Diyaarad rakaab ah ayaa hawada ku lumisay mid ka mid ah daaqadaheeda, taasoo ku khasabtay in ay si degdeg ah ugu degto gobolka Oregon ee dalka Maraykanka Jimcihii.

Diyaaradda Alaska Airlines oo ah noocay ay samayso shirkadda Boeing ee 737 Max 9 ayaa ku soo laabatay Portland, 35 daqiiqo markay socotay duulimaadkeedii Kalifornia ka dib markii qaybta bannaanka, oo ay ku jirto daaqad, ay soo dhacday.

Alaska waxay sheegtay in diyaaradda oo ay saarnaayeen 177 rakaab ah iyo shaqaalihii diyaaradda “ay si nabad ah u degtay”.

Shirkaddu waxay sheegtay in ay si ku meel gaar ah u joojin doonto dhammaan 65 ka mid ah diyaaradaheeda 737 Max 9 si ay baaritaanno ugu sameyso.

Boeing waxay sheegtay inay ka warhayso dhacdadan ayna “ka shaqaynayso sidii ay xog dheeraad ah u ururin lahayd”.

Sabti jan-6 2024-{HMC}  Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa xafiiskiisa ku qaabilay Danjiraha Boqortooyada Sucuudi Carabiya u fadhiya Soomaaliya, Mudane Axmed Bin Maxamed Al-Mawlid oo ay ka wada hadleen xoojinta xiriirka iskaashi ee u dhexeeya labada dal ee walaalaha ah iyo fursadaha maalgashi ee jira maadaama dalkeena laga cafiyey deyntii

Dhankiisa, Danjire Axmed Al-Mawlid ayaa muujiyey in ay Dowladda Sacuudigu ay diyaar u tahay fursadaha maalgashi ee ka jira Soomaaliya, iyo taageeridda dowladda Soomaaliya ee dhinacyada mashaariicda kala duwan ee horumarineed oo dalka laga hirgeliyo, isagoo si gaar ah u ballanqaaday ay ka qaybqaadan doonaan xasillinta

Ra’iisul Wasaaraha ayaa Dowladda Boqortooyada Sacuudi Carabiya uga mahadceliyay taageerada dowladda Sacuudiga iyo garab istaagga ilaalinta madax-banaannida, gobannimada iyo midnimada dhuleed iyo shacab ee Jamhuuriyadda Federaalka Soomaaliya

Dowlada Somalia ayaa wada dedaalo diblomaasiyadeed oo oo caalami ah kuwaasoo ay kaga hortagayso gardarada Itoobiya ka wado Somalia iyo heshiiskii guracnaa ee ay la gashay Somaliland

Sabti jan-6 2024-{HMC} Guddoomiyaha Golaha Shacabka Baarlamaanka 11aad ee Jamhuuriyadda Federaalka Soomaaliya Sheekh Aadan Maxamed Nuur Madoobe oo maanta ka hadlay fadhiga Golahaas ayaa sheegay in lala xisaabtamayo Xildhibaannada maqan fasax la’aanta

Aadan Madoobe ayaa sheegay in si ay u gutaan shaqadooda loogana kaaftoomo kooram la’aanta la billaabayo dabagalka Xildhibaannada si caddaaladda ay ugu sinnaadaan Mudaneyaasha joogtada usoo xaadira iyo kuwa maqan

Guddoomiyaha Golaha Shacabka Baarlamaanka Jamhuuriyadda Federaalka Soomaaliya Waxa uu amaanay Xildhibaanno uusan shaacin Magacyadooda balse maalin weliba fadhiga xaadira si ay u gutaan waajibaadka Qaran ee saaran

Tiro Xildhibaanno ah ayaa ka maqan fadhiyada Golaha Shacabka Baarlamaanka 11aad Jamhuuriyadda Federaalka Soomaaliya kuwaas oo guddoonkoodu sheegay in aanay jirin cudur-daar rasmi ah ay ku maqan yihiin.

Sabti jan-6 2024-{HMC}  Wararka naga soo gaaraya gobolka Mudug ayaa sheegaya in maanta dagaal xoogan uu ka socdo koonfurta gobolkaasi, kadib markii ay weerar culus A,s ku qaadeen ciidamada dowladda, kuwa Galmudug iyo dadka deegaanka

Dagaalka ayaa xoogiisa waxa uu ka dhacay deegaanka Jeex-Jeexa oo hoostaga magaalada Caad ee koonfurta gobolkaasi, halkaas oo ay ku xoogan yihiin A,s

Weerarkan waxaa si wadajir ah u qaaday ciidanka sida gaarka ah u tababaran ee Gorgor, kuwa Daraawiishta Galmudug iyo Macawiisleyda ka howlgasha deegaanka

Sidoo kale waxaa dagaalka oo saaka hore ay qaadeen ciidamada huwanta, soona gaaray illaa duhurkii ayaa waxaa barbar socday duqeymo ay fulinayaan diyaarado dagaal

Ma cadda khasaaraha rasmiga ah ee ka dhashay dagaalka, maadaama weli uu socda, isla markaana ay xaaladdu tahay mid aad u kacsan

Saraakiil ka tirsan milatariga Soomaaliya ayaa shaaca ka qaaday inay cagta mariyeen difaacyadii A,s, uuna weli dagaalka ka socdo aagga deegaanka Jeex-Jeexa

Dhanka kale ma jiro wax hadal ah oo kasoo baxay A,s oo ku aadan weerarkaasi dhulka iyo cirka ee maanta lagu qaaday

Mudug ayaa waxaa maalmihii u dambeeyay ka socday howlgallo ballaaran oo ay iska kaashanayaan ciidamada Xoogga dalka, kuwa Galmudug iyo dadka deegaanka.