Khamiiis -December-7-2023-{HMC} Wafdi uu hogaaminayo Wasiirka Wasaaradda Gaashaandhigga Xukuumadda Federaalka Soomaaliya Cabduqaadir Maxamed Nuur Jaamac ayaa xalay booqasho rasmi ah ku tegay magaalada Addis Ababa ee xarunta Dalka Ethiopia

Wasiirka oo ay wehliyaan mas’uuliyiin kala duwan ayaa waxa uu kulamo la qaadan doonaa Madaxda Dalka Ethiopia, isagoo casuumaad rasmi ah ka helay dhigiisa dalka Ethiopia

Wafdiga Wasiirka Gaashaandhigga Soomaaliya waxaa garoonka diyaaradaha ku soo dhaweeyay Madaxda katirsan Dowlada Ethopia iyo Safaaradda Soomaaliya ee dalkaas

Khamiiis -December-7-2023-{HMC} Dowladda Kenya ayaa raali gelin siisay dowladda federaalka Soomaaliya, kadib qoraal xasaasiyad abuuray oo baraha bulshada, gaar ahaan Twitterka uu ku baahiyey Senator ka tirsan baarlamaanka dalka Kenya

Senatorka ayaa qoraalkaas uga hadlay kulan uu Nairobi kula yeeshay saraakiil ka socotay Somaliland, isagoo sheegay inay ka wada hadleen sidii loo bilaabi lahaa duulimaadyo toos ah oo Hargeysa to Nairobi ah

Xoghayaha guud ee wasaaradda arrimaha dibadda Kenya ayaa arrintaan ka soo saaray qoraal raali gelin ah, isagoo cadeeyey in Kenya aqoonsan tahay midnimada Jamhuuriyadda Soomaaliya

Xoghayaha ayaa cadeeyey in dowladda Kenya ay Somaliland u aqoonsan tahay gobol ka mid ah Jamhuuriyadda Soomaaliya

Sidoo kale wuxuu qoraalkiisa ku raali geliyey dowladda Soomaaliya, isagoo sheegay in siyaasadda arrimaha dibadda ee Kenya ay la jaanqaadeyso Midowga Afrika oo aqoonsan midnimada Jamhuuriyadda Federaalka ah ee Soomaaliya

Xoghayaha wasaaradda arrimaha dibadda Kenya wuxuu sharaxaad ka bixiyey xafiiska ay Somaliland ku leedahay Nairobi, kaas oo sida uu sheegay ka shaqeeya arrimo ganacsi oo Kenya aysan u aqoonsaneyn safaarad

Qoraalka Xoghayaha ayaa xubnaha baarlamaanka Kenya lagu xusuusiyey in aysan awood u laheyn inay faro-geliyaan siyaasadda arrimaha dibadda Kenya, waxaana twitterka Senatorka laga saaray qoraalkii ay dhibsatay dowladda Soomaaliya

Dowladda Federaalka Soomaaliya ayaa dhawaan Jabriil Ibraahim Cabdulle u magacowday safiirka cusub ee Kenya, ninkaan oo horay u soo noqday musharax madaxweyne ayaa ku xeel-dheer diblomaasiyadda, waxaana la rajeynayaa inuu wax badan ka bedeli doono siyaasadda ay Kenya kula dhaqanto Soomaaliya.

Khamiiis -December-7-2023-{HMC} Madaxweynaha Turkiga Recep Tayyip Erdogan ayaa uga digay Israa’iil iney cawaaqib xumo ka dhalan doonto haddii ay ku adkeysaro hanjabaada ay ku weerareyso mas’uuliyiinta Xamaas ee ku sugan Turkiga

Waxaa uu sheegay in haddii ay Israaiil ku dhaqaaqdo fal noocaas ah ay ugu kici doonto qiimo weyn oo sababi doona cawaaqib xumo ba’an

Madaxa hay’adda amniga gudaha ee Israa’iil ee ShinBet ayaa dhowaan sheegay iney madaxda Xamaas ku ugaarsan doonaan “meel kasta” oo ay ku jiraan Lubnaan, Turkiga iyo Qatar

Hoggaamiyaha Turkiga ayaa sidoo kale sheegay in dalkiisa uu maxkamadda caalamiga ah ee Dambiyada {ICC} u gudbiyay dacwad ka dhan ah ra’iisul wasaaraha Israa’iil Benjamin Netanyahu iyo mas’uuliyiin kale oo lagu eedeeyay dambiyo dagaal oo ka dhacay Gaza

Erdogan ayaa sidoo kale sheegay in kumanaan qareeno ah oo ka kala socda dalal kala duwan ay u shaqeynayeen si ay u dacwoodaan maxkamada ICC

“Waxaan keennay dambiyada dagaal ee Gaza ka dhacay maxkamadda, waana la socon doonaa arrintan. Netanyahu ma awoodi doono inuu ka baxsado ciqaabta falkiisa. Mar dhow ama ha dheeraato, waa la maxkamadayn doonaa, wuxuuna bixin doonaa qiimaha dambiyada dagaal ee uu galay.” ayuu yiri Edogan.