Khamiis November 30 2023 {HMC}  Shirkadda diyaaradaha Kenya ee Kenya Airways ayaa ka laabatay qoraal muran badan dhaliyey oo ku saabsan dib u bilaabidda duulimaadyada Muqdisho iyo Nairobi

Qoraal kaas ayey Kenya ku sheegtay inay duulimaadyada Muqdisho-Nairobi dib u billaabeyso 14-ka Febraayo 2024, balse qiimaha ticket-ka uu yahay $1050, taasi oo hadal hayn badan ka abuurtay baraha bulshada

Qoraalkaas ayey hadda ka laabatay shirkadda, waxaana qoraal cusub oo ay soo dhigtay barteeda twitter-ka ay ku sheegtay in qiimaha duulimaadka uu ka billaabanayo $420
Waanu idin dhegaysanay, waanu idin daryeeleynaa. Laga billaabo 14-ka Febraayo 2024, uga duula Nairobi-Muqdisho, saddex mar todobaadkii si aan kala joogsi lahayn Kenya Airways, Isniin, Arbaco iyo Sabti kasta. Ku raaxayso qiimaha gaarka ah ee ticket-ka ka billaabanayo oo ah $420. Hadda gooso,” ayey shirkadda ku tiri qoraal ay soo dhigtay twitter-ka

Dib u billaabidda ayaa imaneysa kadib markii duulimaadyada la hakiyey bishii August ee 2020, sababo la xiriira cudurka Coronavirus

Madaxa dhanka ganacsiga iyo macaamiisha ee Kenya Airways Julius Thairu ayaa sheegay in tallabadani ay daba socoto ganacsiga sii kordhaya iyo tirada sii kordheysa ee isu socodka hawada ee Kenya iyo Soomaaliya
“Waxaan aad ugu hanweynahay in aan dib u yagleeli karno isku xirka Muqdisho iyo Nairobi iyada oo ay sahleyso KQ. Diyaaradda Kenya Airways waxaa ka go’an inay macaamiisheena siiso adeeg tayo sare leh, si aan uga wada shaqayno sidii aan u kobcin lahayn ganacsiga iyo maalgashiga si loo helo kobac joogto ah.

Dib-u-soo-celinta duullimaadyada Muqdisho waa qayb ka mid ah istaraatiijiyadda ballaarinta shabakadda Kenya Airways iyo ballan-qaadka looga gol leeyahay horumarinta isku xirka qaaradda Afrika si ay shirkadda gacan uga geysato horumarka dhaqaale ee mustaqbalka fog

Ku dhawaaqista ayaa ku soo beegantay saddex bil kadib markii Kenya iyo Soomaaliya ay kala saxiixdeen heshiis laba geesood ah oo dhinaca duulimaadka ah, taasi oo xoojin u ah shirkadda diyaaradaha ee Kenya Airways oo dadaal ugu jirtay in ay duullimaadyo ka bilowdo Soomaaliya.

Khamiis November 30 2023 {HMC} Milateriga Israa’iil ayaa dilay labo carruur ah oo Falastiini ah, kaddib markii ay Arbacadii rasaas ku fureen xerada qaxootiga Jenin oo ka tirsan Daanta Galbeed ee la haysto, sida ay sheegtay Wasaaradda Caafimaadka Falastiin

Wasaarada ayaa magacyadooda ku sheegtay Adam Samer Al-Ghoul oo 8 jir ah iyo Basel Sliman Abu Al-Wafa oo 15 jir ah

Ururka Bisha Cas ee Falastiin ayaa sheegay in ay canug ka soo qaaday degaanka Basateen ee Jenin oo ay geeyeen isbitaal maxalli ah ka dib markii ay toogteen ciidamada Israel, sida lagu sheegay bayaan la daabacday

Ciidamada Israiil ayaa war ay soo saareen waxay kaga hadleen dhacdadan

“Maanta intii ciidamadu ay dhaq dhaqaaqyo ka wadeen xerada Jenin, ayaa tiro tuhmaneyaal ah waxay ku tuureen walxaha qarxa gaadiid ay la socdeen askarta, ciidamadu waxay rasaas nool ugu jawaabeen tuhmanayaasha, waana la aqoonsaday.” ayaa lagu yiri warka ciidamada Israel

Muqaal CCTV ah oo la helay ayaa duubtay canug isku dayay inuu ku dhuunto baabuur ka hor inta aan la toogan oo la arkay isagoo dhulka jiifa. Dabadeed, ilmo kale ayaa u soo dhowaaday, isaga oo isku dayaya inuu dhulka ku jiido

Muuqaalo badan oo CCTV ah oo ku wareegaya baraha bulshada ee Falastiin ayaa muujinaya wiil labaad oo dhalinyaro ah oo ku sugan Jenin oo shidaya shay aan la aqoonsan ka hor inta aan la toogan

Khamiis November 30 2023 {HMC} Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre oo ka qeyb galay dood furan oo uu soo qaban qaabiyey Machadka Dooxada Jubba, ayaa uga jawaabay bulshada ku dhaqan magaalada Kismaayo su’aallo la xiriira waxyaabihii u qabsoomay Xukuumadda DanQaran iyo halka la hiigsanayo

Ra’iisul Wasaaraha ayaa si qoto dheer uga hadlay Xaaladda Siyaasadda, Dhaqaalaha, Amniga Dalka, ciribtirka A-shabaab gurmadka daadadka iyo arrimo kale oo la xiriira dowlad-dhiska Soomaaliya

Ra’iisul Wasaare Xamse Cabdi Barre ayaa tilmaamay in guul laga joogo barnaamijka deyn-cafinta oo Xukuumaddu ay dadaal ku bixisay, sidoo kale xasilinta amniga caasimadda iyo ka mid noqoshada Dalladda Bulshada Bariga Afrika oo fursad u noqonaysa ganacsatada Soomaaliyeed

Ra’iisul Wasaaraha Xukuumadda ayaa tilmaamay muhiimadda ay dalka u leedahay in dastuurka la dhammeystiro, Khawaarijta la ciribtiro iyo in la hormariyo dhaqaalaha dalka si dadka Soomaaliyeed u gaaraan barwaaqo iyo nabad

Arbaco November 29 2023 {HMC}Booliska ayaa sheegay in ay ku dhaawacmeen saddex dhalinyaro ah, wuxuuna shaaciyay in qaraxa uu ka dhashay xabad nooca loo yaqaan {37}, oo ay dhalinyarada ku qar-qaraaceen agagaarka wadada ka tagta Saldhiga Galbeed ee aada Bixin ee magaalada Garowe

Saddexda dhalinyaro ee ku dhaawacmay qaraxa ayaa sida uu shaaciyay Booliska
Ana’s Ahmed Jaamac
Ahmed Jaamac Cabdi
Ayuub Cawil Cali

Booliska ayaa sidoo kale waxa uu sheegay in ay socoto baaris ay wadaan waaxda miina baarista ee Ciidanka Booliska Puntland, gaar ahaan Gobolka Nugaal ay wadaan baaritaano dheeri ah oo la xiriirta dhacdadaas iyo waxa sabababay

Saddexda dhalinyaro ee dhaawaca ayaa waxaa la dhigay isbitaalka, iyaga oo qaba dhaawacyo fudud, sida ay warbaahinta u sheegeen qoysaskood