Khamiis Nofembar 23, 2023 {HMC} Somaliland ayaa cambaareysay weerar ay sheegtay inay shalay kusoo qaadeen isbaheysi ka kooban saddex dhinac, kaasi oo ka dhacay deegaanka Buqdharkeyn ee gobolka Sool, islamarkaana lagu waxyeeleeyey dad shacab ah.

“Weerarkan ayaa waxaa ka dhashay khasaare isugu jira dhimasho iyo dhaawac, waxaana uu ahaa fal wuxuushnimo ah iyo sidoo kale xadgudub cad oo ka dhan ah sharciga caalamiga ah,” ayaa lagu yiri war-saxaafadeed ay soo saartay wasaaradda arrimaha dibedda Somaliland.

Weerarka ayey Somaliland sheegtay inay soo qaadeen isbaheysi ka kooban, Al-Shabaab, maamulka Puntland iyo wax ay ugu yeertay maleeshiyada Garaadada ee Laascaanood

“Falkan foosha xun ayaa waxaa mas’uul ka ah maamulka Puntland ee Soomaaliya iyo kooxaha argagixisada. Isbahaysigan oo taageero ka helaya dawladda Faderaalka ee Soomaaliya, ayaa taariikh u leh xasillooni dareynta magaalada Laascaanood iyo deegaanada ku xeeran, kuwaas oo marar badan colaad iyo rabshado ka abuurayay dhulka Somaliland,” ayaa lagu yiri war-saxaafadeedka.

Somaliland ayaa sheegtay in weerarka uu sidoo kale yahay isku day uu maamulka Puntland dareenka uga weecinayo xasaradaha ka taagan gudaha maamulkaas.

“Si kastaba ha ahaatee, xukuumadda Somaliland ma ogolaanayso inay sii socoto dhibaatada lagu hayo dadka rayidka ah ee aan waxba galabsan ee loo adeegsanayo qalab siyaasadeed ahaan,” ayey tiri Somaliland.

“Xukuumadda Somaliland waxaa ka go’an badbaadada iyo nabad-gelyada muwaadiniinteeda, waxaanay qaadi doontaa tallaabo kasta oo ay ku ilaalinayso muwaadiniinteeda ku sugan gobolka Sool ee Somaliland.”

Somaliland ayaa ugu dambeyn ku hanjabtay in aanay ka laba labeyn doonin inay dhulkeeda la aqoosan yahay ka difaacdo nooc kasta oo gardarro ah
Khasaare kala duwan oo isugu jiro dhimasho iyo dhaawac ayaa ka dhashay dagaalka aagga Buqdharkayn, balse ma cadda inta uu gaarsiisan yahay.

Dhinaca kale, SSC-Khaatumo oo war kasoo saartay dagaalkaas ayaa ku eedeysay inay ka dambeeyeen ciidamada Somaliland, balse ay iska difaaceen ciidamadeeda.

“Maamulka SSC Khaatumo wuxuu ogeeysiinayaa dowladda federaalka iyo beesha caalamka inay diyaar u yihiin nabad kula noolaanshiyaha deriskooda isla marakaana ay u hogaansamayaan xeerarka caalamiga iyo go’aanada golaha ammaanka,” ayaa lagu yiri warsaxaafadeedka.
.

Khamiis Nofembar 23, 2023 {HMC} Kooxda Xisbulah ee dalka Lubnaan ayaa sheegtay iney sii wadeyso duqeymaha ay ku heyso woqooyiga Israel ka dib xabad joojin afar maalmood ah oo ay gaareen Xamaas iyo Israel.

War ay soo saartay kooxda ayey ku sheegtay ineysan qeyb ka aheyn dhinacyada gaaray heshiiska xabad joojinta ee beri ka dhaqan galaya Gaza sidaas awgeedna ay sii wadayaan dagaalka.

Xabbad joojinta Israa’iil iyo Xamaas ayaa lagu wadaa inay bilaabato 10-ka subaxnimo xilliga maxalliga ah {3-da subaxnimo ET} Khamiista sida uu sarkaal Israa’iili ah u sheegay wakaalada wararka ee Reuters.

Waxaa jira ikhtiyaar ah in hakadka dagaalka uu sii ahaado ilaa 10 maalmood, laakiin saraakiisha Israa’iil waxay rumeysan yihiin inaysan u badneyn inay sii jirto muddadaas.

Ra’iisul wasaaraha Israa’iil Benjamin Netanyahu ayaa sheegay markii heshiiska la ansixiyay in 10-ka qof ee dheeraadka ah ee la sii daayo, ay jiri doonto maalin dheeraad ah oo hakad ah dagaalka.

Heshiisku waxa uu dhigayaa in la sii daayo ugu yaraan 50 la haystayaal ah oo Xamaas ay qabsatay, oo ay ku jiraan haween iyo carruur, taasoo lagu beddelanayo in muddo afar maalmood ah la hakiyo ololaha cirka iyo dhulka ee Israa’iil. sido kale 150 maxbuus oo falastiiniyiin ah ayaa laga sii dayn doonaa jeelasha Israel, taasoo qayb ka ah heshiiska

Khamiis Nofembar 23, 2023 {HMC} Madaxweynaha Koonfur Galbeed Cabdicasiis Laftagareen ayaa olole ugu jira sidii uu Madaxweyne Xasan Sheekh ula meel-mari lahaa qodobada ku jira heshiiskii golaha wadatashiga ee la gaaray bishii May ee sanadkaan.

Laftagareen oo si buuxda ula soo shaqeystay kooxdii Farmaajo ayaa hadda sidii oo kale ula shaqeysta dowladda federaalka ee Xasan Sheekh uu hoggaamiyo, wuxuuna u muuqdaa nin duruufaha taagan wax ku goosta

Madaxweyne Cabdicasiis ayaa Baydhaba ugu yeeray inta badan xildhibaanada BFS ee ka soo jeeda K/Galbeed, isagoo ku qancinaya inay xukuumadda Xasan Sheekh ku garab siiyaan meel-marinta heshiiskaas

Laftagareen ayaa la sheegay inuu aad u daneynayo qorshaha lagu bedelayo nidaamka hoggaanka sare ee DF oo Xasan Sheekh uu doonayo in laga dhigo madaxweyne iyo maxaxweyne ku xigeen.

Reer K/Galbeed ayaa qorshahaan u arka fursad ay uga gudbi karaan kursiga guddoomiyaha golaha shacabka oo muddo ay dhaafi weysnaayeen.

Soomaaliya ayaa ku biireysa dowladaha isticmaalaha hanaanka madaxweyne iyo madaxweyne ku xigeen, hadii uu qorshahaan ansixiyo baarlamaanka Soomaaliya, waxaana laga guurayaa nidaamka ra’iisul wasaaraha

Madaxda dowlad goboleedyada ayaa heshiiskii bishii May ee golaha wadatashiga qaranka waxay ka heleen muddo kororsi, balse ilaa hadda ma jiro hoggaamiye sida Laftagareen ugu ololeynaya ansixinta heshiiskaan

Madaxda qaar waxaa la sheegay in muddo kororsiga kaliya ay fursad u arkaan, balse aysan dooneyn inay olole u galaan ansixinta qodobada kale ee ku jira heshiiska, kuwaas oo sababaya in lagu qoro dastuurka

Xasan Sheekh ayaa dhawaan si buuxda ula saftay Laftagareen, kadib markii mucaaradkiisa ay isku dayeen iinay doorasho geliyaan maamulka Koonfur Galbeed, balse inta aan la gaarin Laftagareen, waxaa doorashada diiday Xasan Sheekh, maadaama uu ku jiro dagaalka Shabaab iyo meel marinta qorshihiisa wax ka bedelka dastuurka.