Jimco , October -20- 2023-{HMC}  Ciidanka dowladda Soomaaliya iyo kuwa daraawiishta Maamulka Galmudug iyo ciidamada deegaanka ee howlgallada ka wada deegaanno katirsan gobolka Mudug, ayaa gacanta ku dhigay nin la sheegay in uu katirsanaa saraakiisha kooxda Al Shabaab.

Ninkan oo lagu magacaabo Ismaaciil Aadan Maxamed ayaa lagu qabtay deegaanka Qoriley ee koofurta Gobolka Mudug, waxaana sargaalkan la sheegay in Al Shabaab u qaabilsanaa uruurinta lacagaha laga qaado shacabka degan Bacaaweyn.

Telefishinka dowladda ayaa baahiyay in ninkan ciidamada huwanta ah ay soo qabteen isaga oo dhuumaaleysi ku jiray, waxa ay sidoo kale sheegeen in ninkan xilligii la qabanayay uu qorsheenayay in ciidanka isku soo dhiibo.

Saraakiil iyo dagaalyahanno kale katirsanaa kooxda Al Shabaab kuna sugnaa qeybo kamid ah gobolka Mudug ayaa muddooyinkii dambe isku soo dhiibay ciidanka huwanta ah, waxaa sidoo kale jira kuwa kale oo howlgallo lagu soo qabtay.

Jimco , October -20- 2023-{HMC} Maamulka Dowlad degaanka Soomaalida oo ka hadashay Natiijada Imtixaanka fasalka 12aad oo dhawaan ardayda degaanku ay galeen ayaa sheegtay in boqolkiiba 99 tiro ka badan ay ardaydu ku dhaceen imtixaankaas ama ay keeneen natiijo ka hooseysa natiijadii loogu gudbayay Jaamacadaha.

Cabdilaahi Cabdi Wasiirka Waxbarashada ee degaanka Soomaalida oo la hadlay Warbaahinta degaanka ayaa sheegay in natiijada sannadkan ardayda fasalka 12aad ay keeneen ay aad u hooseyso, isagoo xusay in sannadkan imtixaanka lagu galayay Jaamacadaha dalka Itoobiya.

Wasiir Cabdilaahi Cabdi waxa kale oo uu sheegay in ka degaan ahaan ay Imtixaanka fasalka 12aad ee sannadkan ay u fadhiisteen 21,787 Arday, oo isugu jirtay Ardayda Cilmi degaan iyo kuwa Sayniska, waxaana baastay ama keenay natiijadii loogu gudbayay Jaamacadaha Arday gaaraysa boqolkiiba 0.3% oo u dhiganta 74 Arday oo kaliya.

Marka la eego guud ahaan dalka Itoobiya sannadkan waxaa imtixaanka Fasalka 12aad u fadhiistay Arday gaaraysa 84,5099 waxaana gudbay oo baasay 27,267 Arday oo u dhiganta boqolkiiba 3.2%. taas oo ka dhigan in natiijada hooseysa ay sannadkan ka jirtay guud ahaan dalka Itoobiya.

Dowladdu inkastoo ay arrintan u sababaysay dadaal yari dhanka Ardayda ah iyo inay ardaydu is dhigteen oo ay sahashadeen imtixaanka oo qaab cusub loo qaaday sannadkan, haddana dad badan ayaa ka biyo diiday hadalkaas dowladda kasoo yeeray, iyagoo xusay in dhinaca kale ay ceeb ku tahay dowladda in badi ardaydaasi ay gudbi waayaan oo dowladdu aysan dadaal badan horey ugu soo bixin.

“Natiijadu ma ahayn mid nafarax galisa, laakiin waa mid xaqiiq ah oo ay tahay inaan qaadano”, ayuu kusoo gunaanaday Wasiirka Waxbarashadu ee Dowlad degaanka Soomaalida Cabdilaahi Cabdi.

tan oo kale wali Horey uma dhicin in ardayda degaanka Soomaalida ee fasalka 12aad ay heli waayaan natiijadii lagu baasayay, inkastoo dowladdu ay waxbadan ka badashay Waxbarashadii degaanka, sidoo kalena ay ka hortagtay Qishkii iyo qaababkii hore ee imtixaanka loogali jiray, haddana natiijada sannadkan soo baxday waa mid dad badani wax iska waydiinayaan.

Jimco , October -20- 2023-{HMC} Axmed Maxamed Jimcaale  Guddoomiyaha guddiga ka hortaga HIV/AIDS-ka ee Soomaaliya ayaa shaaca ka qaaday iney si aad ah u sii kordhayaan dadka uu soo ridanaayo Cudurka HIV/AIDS-ka.

Wuxuu sheegay guddoomiye Jimcaale in lixdii bilood ee la soo dhaafay laga helay xanuunka HIV/AIDS-ka dad gaaraya 11 kun oo qofood, taasi oo muujineysa inuu si aad ah ugu faafayo xanuunkaan gudaha Soomaaliya.

“Tirada dadka cusub ee lixdii billood u dambeysay laga helay xanuunkan waxay gaaraysa 11,000 oo ruux, dallad ayaa u sameynay oo muddo ayay shaqeynaysay, Dadka ismuujiyay ee dallada ku mideysan waa kun iyo toddoba boqol iyo xoogga, waxaa ka badan inta aan ismuujin ee ka shiixaya ee bulshada dhexdeeda ku jira” ayuu yiri guddoomiyaha guddiga ka hortaga HIV/AIDS-ka ee Soomaaliya Axmed Maxamed Jimcaale.

Wuxuu sidoo kale tilmaamay guddoomiyaha in haatan Muqdisho ay ka wadaan wacyigelinta tababaro ku saabsan halista uu leeyahay Cudurkaan, islamarkaana ay dadaal badan ugu jiraan sidii kor loogu qaadi lahaa wacyiga bulshada ee la xiriira xanuunkan.

Guddoomiyaha guddiga ka hortaga HIV/AIDS-ka ayaa sidoo kale sheegay in dadka qaba xanuunkaan ee is muujiyay ay ka tiro badan yihiin kuwa qaba Cudurkaan ee aanan is muujin ee hadana la nool xanuunkaan.

guddoomiye Axmed ayuu Yiri“Waxaa daawooyinka si joogta ah u qaata 4,419 qof oo ah dadka ku mideysan dalada an sameynay, waxaana taasi muujineysa halista ah inuu sii faafayo xanuunkaan maadama ay badan kuwa aanan is muujin ee aan daawoyinka qaadan”

Gabagabadii wuxuu codsaday guddoomiyaha guddiga ka hortaga HIV/AIDS-ka in madaxda sare ee dalka ay ku garab istaagaan guddigooda taageeero dhaqaale, si ay wax badan uga qabtaan khatarta Cudurkaan ee sida weyn ugu sii faafaya Soomaaliya.

Jimco , October -20- 2023-{HMC} Abuukar Cismaan Baalle Safiirka Soomaaliya ee Qaramada Midoobay  oo warbixin ka jeediyay kulanka Golaha Amaanka ee Qaramada Midoobay ayaa ka hadlay arrimo ay ka mid ahayeen cunaqabateynta hubka ee saaran Soomaaliya iyo xaalada SSC Khaatumo.

Danjire Abuukar Baalle ayaa ugu horeyn Golaha Amaanka ee Qaramada Midoobay ugu baaqay in Soomaaliya laga qaado cunaqabateynta hubka ee saaran mudada dheer, isagoona tusaale u soo qaatay in dalka uu sameeyay isbadalo iyo horumar la taaban karo.

Sidoo kale Safiirka Soomaaliya ee Qaramada Midoobay uu kulankaas ka sheegay in xaalad deganaasho ay ka jirto magaalada Laascaanood ee gobolka Sool, isagoo xusay in taasi ay ku timid dadaalada dheeraadka ah oo ay sameeyeen maamulka SSC Khaatumo.

Abuukar Baalle Safiirka Soomaaliya ee Qaramada Midoobay ayaa sidoo kale soo dhaweeyay aqoonsiga dowladda Fedaraalka ee dhismaha maamulka ku meel gaarka ah ee SSC Khaatumo, isagoona ku booriyay UNSOM iyo saaxiibada caalamka inay taageeraan horumarkan si loo waafajiyo siyaasadda dowladda Federaalka Soomaaliya.

Safiirka Dowladda Soomaaliya ee Qaramada Modoobay Abuukar Cismaan Baalle ayaa rajo wanaagsan ka muujiyay in dadaal wadajir ah ay Soomaaliya uga gudubeyso khatarta Al-Shabaab, islamarkaana ay dhawaan gali doonto nabad iyo barwaaqo waarta.

Jimco , October -20- 2023-{HMC} Madaxweynaha Soomaaliya Xasan Sheekh Maxamuud ayaa galabta dib ugu soo laabtay magaalada Dhuusamareeb ee Xarunta Maamulka Galmudug, halkaas oo uu ka sii ambaqaadayo dhammeystirka howlgalka ka dhanka ah AS sida lagu baahiyay qoraal lagu daabacay Warbaahinta afka Dowladda ku hadasho.

Madaxweynaha ayaa ka soo laabtay safar uu ku tagay magaalooyinka Baydhabo iyo Xudur oo la xiriira abaabulka wajiga Labaad ee howgalka dhawaan lagu xoreynayo deegaannada ay AS deegaanada Maamulada Koonfur-galbeed iyo Jubbaland.

Tan iyo markii uu bilaabay Madaxweynaha Soomaaliya Xasan Shiikh Maxamuud Dagaalka ka dhanka ah al shabaab waxa uu daganaa Magaalada dhuusamareeb ee Caasimada Maamulka Galmudug taas uu uu ku shaagay in uu xoojinaayo Dagaalka lagu la jiro Al shabaab.