Sabti , October -14- 2023-{HMC} Warar dheeraad ah ayaa laga helayaa qarax sababay dhimasho iyo dhaawac oo duhurnimadii Maanta ka dhacay magaalada caasimadda ah ee Muqdisho gaar ahaan Xaafadda Waxaracade ee degmada Heliwaa.

Qaraxa oo ahaa miino dhulka la geliyay ayaa waxaa lala eegtay gaari ay saarnaayeen ciidamo ka tirsan kuwa miino baarista ee loo yaqaan K9, waxaana qaraxaasi oo ahaa mid xooggan uu gaariga ku qabsaday, xilli ay marayeen Xaafadda Waxaracade.

Inta la xaqiijiyay 2 Askari ayaa ku dhimatay qaraxa, halka 3 kalena ay ku dhaawacmeen, kuwaasi oo saarnaa gaari nooca Soomaalida u taqaano Qooqan, waxaana gaariga la tilmaamay inuu gaarigaasi qeybo kamid ah gaaray burbur.

Labada askari ee dhintay ayaa waxaa la soo gaarsiiyey Xarunta hay’adda dembi baarista ee CID-da, halka kuwii dhaawaca ahaa la geeyay isbitaalka Madiino, si xaaladooda halkaas loogu dabiibo, sidoo qaraxa ayaa waxaa ka badbaaday Eey-da wax urisa ee ka tirsan Ciidanka K9.

Illaa iyo hadda ma jiro wax hadal ah oo kasoo baxay saraakiisha laamaha amniga oo ku aadan qaraxaasi lala beegsaday ciidanka dowladda Federaalka Soomaaliya gaar ahaan kuwa miino baarista ee loo yaqaan K9.

Sabti , October -14- 2023-{HMC} Madaxweynaha Maamulka Somaliland Muuse Biixi Cabdi ayaa maamulka Puntland ku eedeeyay inay dooneyso inay dhul Somaliland kaga qabsato hab beelaysan, kadib markii saaka Biixi uu khudbad ka jeediyay munaasabad ka dhacday Magaalada Hargeysa.

Madaxweyne Muuse Biixi ayaa waxaa uu sheegay in ay ciqaabi doonaan cidii kusoo xadgudubta gobolada Maamulkiisa, wuxuuna intaas kusii daray in Somaliland aysan ogolaan doonin in taako kamid ah dhulkeed lagu soo xadgudbo.

Isaga oo sii hadlaayay Madaxweynaha Maamulka Somaliland ayaa waxaa digniin u diray maamulka Puntland ee uu hoggaamiyo Madaxweyne Saciid Cabdullaahi Deni, isaga oo sheegay in ay doonayso in ay dhul Somaliland kaga qaadato hab qabiilaysan.

Waxan tusaale usoo qaadanaya maamulka Puntland, oo aad ugu fadalo dheer in uu dhul balaadhsi, uu Somaliland dhul kaga qaado hab qabiilaysan, in aad kaga qaadi karto iyo in kale waynu is huranahay” ayuu yiri Biixi Muuse Biixi Cabdi.

Sidoo kale Madaxweyne Biixi ayaa ugu baaqay shacabka Somaliland in loo midoobo dagaalka rogaal-celinta ah oo sida uu tilmaamay lagu difaacayo xuduudihii gumeysigu u sameeyay Somaliland.

Hadalka Muuse Biixi ayaa ksuoo beegsaday, ka gadaal markii Madaxweynaha Puntland, oo shalay ka hadlay masiirka gobolada SSC, uu sheegay in ay ku qancayaan wixii reer SSC dan u arkaan, waxa uuna Somaliland ugu baaqay in anay dagaal danbe qaadin.