Talaado 11, Nov 2025 {HMC} Haddii heshiiskan la fuliyo, wuxuu muujin doonaa isbeddelo waaweyn oo ku yimaadda siyaasadda arrimaha dibadda ee Maraykanka, sidoo kalana wuxuu keeni karaa caqabado ku wajahan dhinaca milateriga Israa’iil.

Si kastaba ha ahaatee, heshiiskan Sacuudiga waxaa lagu dari karaa shuruudo iyo xarrimo kale oo lagu hubinayo awoodda millateri ee Israa’iil ee gobolkaas.

Trump wuxuu doonayaa in uu dhammystiro qorshahan maaddaama uu fahamsan yahay hoggaanka Sacuudiga. Mubarak Al-Attiyah ayaa sheegay in Trump uu aamminsan yahay in hadafka Sacuudiga uu ka badan yahay ilaalinta xuduudaheeda.

Al-Attiyah ayaa intaa ku daray in Madaxweyne Trump uu sidoo kale ogyahay in Sacuudiga oo ka duwan waddamda kale ee gobolku aanay lahayn ujeeddooyin kale oo ballaadhan.

Khubaradu waxay sheegayaan in Israa’iil aanay dooneyn in Maraykanku ka iibiyo Sacuudiga diyaaradaha dagaalka ee F-35.

Sida ay warbaahinta Israa’il ku warrantay, heshiiskan wuxuu noqon karaa halis weyn oo amniga Israa’iil ka dhan ah mustaqbalka haddii xidhiidhkeeda dalalka kale ee Bariga Dhexe aanu ku socon sidii caadiga ahayd.

Laakiin marka laga hadlayo Sacuudiga, Mubarak Al-Attiyah waxa kale oo uu aamminsan yahay in aanay doonayn in ay bedesho siyaasaddeeda iyo masuuliyadeeda ku aaddan arrimaha dalalka Carabta waqtigan.

Arrinta ugu muhiimsan waa Falastiin, Sacuudiguna wuxuu aamminsan yahay in dal madax bannaan oo Falastiiniyiint8u leeyihiin la dhiso iyadoo la tixgelinayo xuduudihii 1967.

Tani waa shuruud aasaasi ah oo ku saabsan wada-hadallo kasta ee ku aaddan mustaqbalka Bariga Dhexe.

Talaado 11, Nov 2025 {HMC} Ra’iisul Wasaare-ku-xigeenka Labaad ee Xukuumadda Federaalka Soomaaliya, Mudane Jibriil Cabdirashiid Xaaji Cabdi, ayaa ka qayb galay munaasabadda saxiixa mashruuca Dardargelinta Horumarka Dhaqaalaha iyo Bulshada ee Soomaaliya, oo lagu hirgelinayo iskaashi ballaaran oo u dhexeeya Dowladda Federaalka Soomaaliya, UNDP, iyo Qaar ka mid ah Shirkadaha ganacsi ee dalka .

Mudane Jibriil, ayaa sheegay in mashruucan uu yahay tusaale muuqda oo muujinaya sida ay isku kaashan karaan, dhinacyada kala duwan ee dawladda, ganacsatada iyo saaxiibbada caalamiga ah, si loo gaaro hal ujeeddo oo ah horumar waara iyo fursado loo abuuro shacabka Soomaaliyeed.

“Mashruucan ma aha oo keliya barnaamij horumarineed; waa tusaale cad oo muujinaya sida hey’adaha dawliga ah, ganacsatada, iyo saaxiibbada caalamiga ah ay isu garab taagi karaan hal hadaf,” ayuu yiri Ra’iisul Wasaare-ku-xigeenka.

Ra’iisul Wasaare-ku-xigeenka, ayaa carrabka ku adkeeyay in Xukuumadda DanQaran ay si buuxda uga go’an tahay abuurista deegaan ganacsi oo furan, iyada oo dib-u-habeyn lagu samaynayo shuruucda, canshuuraha, iyo nidaamyada ganacsiga, si loo fududeeyo maalgashiga iyo hal-abuurka gudaha.

Mashruucan ayaa si gaar ah diiradda u saaraya xoojinta deegaanka ganacsiga, shaqo-abuurka dhallinyarada, iyo horumarinta dhijitaalka. In ka badan 1,000 dhallinyaro Soomaaliyeed ayaa heli doona tababaro xirfadeed iyo dhijitaal ah, si ay u helaan shaqooyin ama u abuuraan ganacsiyo madax-bannaan, halka 500 ganacsi Soomaaliyeed – oo intooda badan ay hoggaaminayaan haween iyo dhallinyaro – ay si toos ah uga faa’iidaysan doonaan barnaamijka.

Talaado 11, Nov 2025 {HMC} Wasiirka Wasaaradda Gaadiidka iyo Duulista Hawada ee Xukuumadda Federaalka Soomaaliya, Xildhibaan Maxamed Faarax Nuux, ayaa ku guuleystay xalinta cabasho ay qabeen shaqaalaha Garoonka Diyaaradaha ee Aadan Cadde, taas oo keentay in shaqaalihii garoonka ay dib ugu laabtaan shaqooyinkoodii si habsami leh.

Intii uu socday kulanka, wafdiga Wasaaradda ayaa si dhow u dhageystay cabashooyinka shaqaalaha oo la xiriiray arrimo shaqo iyo maamulka garoonka.

Kadib wada-hadallo miro-dhal ah, waxaa la isla gartay xal waara oo lagu qanciyay dhinacyadii kala duwanaa.

Tallaabooyinka la qaaday waxaa ka mid ah:

•Wasiirka ayaa faray shirkadda maamusha garoonka inay si degdeg ah wax uga qabato qodobadii ay shaqaaluhu tabashada ka muujiyeen.

•Waxaa loo digay shirkadda maamulka garoonka, iyadoo lagu amray inayn mar dambe soo laaban cabashooyin la mid ah.

•Wasaaradda Gaadiidka iyo Duulista Hawada ayaa ballanqaadday inay si joogto ah ula socon doonto xaaladda shaqaalaha, si loo hubiyo ilaalinta xuquuqdooda iyo hufnaanta howlaha garoonka.

•Wasiir Maxamed Faarax Nuux ayaa u mahadceliyay shaqaalaha garoonka sida ay u muujiyeen dulqaad iyo masuuliyad, isagoo ku dhiirrigeliyay inay sii wadaan shaqadooda si daacadnimo iyo waddaniyad leh.

Wuxuu xusay in Wasaaraddu ay mar walba ka go’an tahay ilaalinta xuquuqda iyo daryeelka shaqaalaha, si loo hubiyo in adeegyada duulimaadyada dalka ay u socdaan si nabad iyo nidaam leh.

Talaado 11, Nov 2025 {HMC} Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa xafiiskiisa ku qaabilay Danjiraha Jamhuuriyadda Jarmalka u fadhiya Soomaaliya, Sebastian Groth.

Kulanka, ayaa looga hadlay xoojinta xiriirka iyo iskaashiga labada dal, ee dhinacyada amniga, maal¬gashiga iyo horumarinta dhaqaalaha.

Ra’iisul Wasaaraha, ayaa uga mahadceliyey Dowladda Jarmalka, taageerada ay siiso Shacabka iyo Dowladda Soomaaliyeed.

Dhankiisa, Danjire, Groth ayaa sheegay in Soomaaliya iyo Jarmalka ay ka dhaxeyso xiriir saaxiibtinimo oo qoto dheer, isla markaana ay ka go’an tahay dhankooda in ay sii xoojiyaan, si loo gaaro yoolasha la hiigsanayo.

Talaado 11, Nov 2025 {HMC} Howlgalka Midowga Yurub ee la dagaalanka Burcad Badeeda Soomaalida ayaa sheegay in uu la socdo dhaqdhaqaaqa Kooxahaas oo muddooyinkii ugu dambeeyay isku dayay in ay afduubtaan Maraakiib marayay xeebaha Soomaaliya iyo biyaha ka baxsan.

Midowga Yurub ayaa sheegay in maraakiibtooda ku sugan Biyaha Soomaaliya iyo Badweynta Hindiya in ay dusha kala socdaan Maraakiibta & Doomaha Ganacsiga ee u nugul in ay afduuban karaan Kooxaha Burcad Badeedda sida hadalka loo dhigay.

Saraakiisha howlgalka Midowga Yurub ee Atalanta ayaa meesha ka saaray in ay jirto awood buuxda oo Kooxaha Burcad badeeddu xiligaan u leeyihiin sidii ay duullaan joogta ah ugu qaadi lahaayeen Maraakiibta ay damacsan yihiin in ay afduubtaan.

Dhacdooyinkii koobnaa ee dhowaan dhacay ayay ku tilmaameen kuwo mar dhif ah dhici kara iyada oo kooxaha Burcad Badeedda ay ka feejigan yihiin tallaabada ay kala kulmi karaan maraakiibtooda ku sugan Badweynta Hindiya.

Hay’adda la socodka badaha ayaa sheegtay in aysan jirin halis cabsi badan abuuri karta oo laga qabo Kooxaha Burcad badeedda Soomaalida xitaa iyaga oo gaystay labo weerar oo ay ku guuldaraysteen in ay ku qabsadaan maraakiibtaas.

Talaado 11, Nov 2025 {HMC} Wasiirka Arrimaha Gudaha Dalka Hindiya Amit Shah oo tagay goobta uu ka dhacay qaraxa galaaftay nolosha 9 qof isla markaana sababay dhaawaca 20 kale ayaa ku hanjabay in ay tallaab culus oo ka dhan ah ficilkaas ay qaadayaan.

Amit ayaa sheegay in weerarkaas loo adeegsanayo xeerka la dagaalka Waxa loogu yeero ‘Argagixisada’ si ciqaab adag loo mariyo Dadkii abaabulay ama wax ka ogaa sida uu hadalka u dhigay Wasiirka Arrimaha Gudaha Hindiya.

Laamaha ammaanka ee Delhi ayuu faray in ay si degdeg ah usoo gudbiyaan natiijo lagu qanci karo oo dhan weliba laga soo hubiyay maadaama tallaabada jawaabta ah ee la qaadayo ay tahay mid aad u culus sida uu yiri.

“Waxa aan baaraynaa dhammaan suurtagalnimada weerarkaan, waxaana samayn doonnaa baaritaan dhameystiran oo dhinac kasta laga eegayo. Waxa aan u adeegsan doonnaa qodobka qeexaya la dagaalanka argagixisada, natiijooyinkana shacabka ayaan la wadaagi doonnaa” ayuu yiri Wasiirka Arrimaha Gudaha Hindiya Amit Shah.

Weerarka ka dhacay Magaalada Delhi gaar ahaan Agagarka Red Fort waxa uu dadka dib u xusuusiyay weerar sidaas oo kale uga dhacay dhowr iyo toban sanno kahor oo lagu beegsaday ajaanib dalkaas joogtay.

Talaado 11, Nov 2025 {HMC} Shaqaale katirsan kuwa ka shaqeeya Garoonka Diyaaradaha Aadan Cadde ee Magaalada Muqdisho ayaa maanta shaqo joojin ka sameeyay garoonkaas kaddib markii ay sheegeen in qaar kamid ah dadkii ay wada shaqaynayeen ay erisay Shirkadda Favori.

Dibadbax kooban ayay ka dhigeen gudaha Garoonka Diyaaradaha Aadan Cadde, waxa ay sheegeen in ay u baahan yihiin in Xukuumadda Federaalka Soomaaliya soo farageliso waxa ay isku hayaan iyaga iyo shirkadda Favori.

Sida ay Mustaqbal u sheegeen ilo kala duwan, shaqaalaha la eryay ayaa Magacyadooda iyo nambarada aqoonsiga ay ku shaqeeyaan la shaaciyay, waxa ay tiradoodu gaaraysaa ilaa 15 qof sida ilahaas ay ku warrameen.

Muuqaallo laga soo duubay oo lasoo geliyay baraha Bulshada waxaa ka dhex muuqday shaqaale xiran dharka gaarka u ah shirkadda Favori oo aanay wax shaqo ah hayn, tani waxa ay muujineysaa gadoodka ay sameeyeen.

Ma jiro war kasoo baxay maamulka Garoonka Diyaaradaha Aadan Cadda ee Magaalada Muqdisho iyo shirkadda Favori oo muddo gacanta ku haysa maamulidda Garoonkaan maadaama shaqaalahaan ay ka cabanayaan.