Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa hambalyo u diray Madaxweyne Cabdulqaadir Axmed Aw-cali iyo Madaxweyne Kuxigeen Cabdirishiid Yuusuf Jibriil oo loo doortay hoggaaminta Dowlad-goboleedka Waqooyi Bari Soomaaliya.Somali cuisine

Madaxweynaha oo bogaadiyey bisaylka ay muujiyeen Xildhibaannada, Guddoonka iyo musharraxiinta Madaxtinimada ee ku loollamay Waqooyi Bari Soomaaliya ayaa Alle uga rajeeyey Hoggaanka la doortay in uu u fududeeyo gudashada masuuliyadda culus ee hortaalla.

“Waxaan u rajeynayaa Madaxweyne Cabdulqaadir Axmed Aw-cali iyo Kuxigeenkiisa Mudane Cabdirishiid Yuusuf Jibriil in uu ka yeelo hoggaan mideeya bulshada Waqooyi Bari, kana shaqeeya nabadda, horumarka iyo dowladnimada. Dowladda Federaalka Soomaaliya waxay diyaar u tahay in ay garab istaagto dowlad-goboleedka si wadajir loogu xaqiijiyo dhammaystirka Federaaleynta”.

Madaxweynaha Jamhuuriyadda ayaa ku adkeeyey bulshada iyo hogaanka cusub ee Dowlad-goboleedka Waqooyi Bari in ay adkeeyaan midnimada, wadajirka iyo iskaashiga, si looga gudbo caqabadaha jira loona gaaro horumar waara.

Muqdisho, 30 Aug 2025 {HMC}  Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaam Cabdi Cali, ayaa maanta xarunta Wasaaradda arrimaha Dibada Jabuuti Mudane Danjire Cabdulqaadir Xuseen Cumar, xarunta Wasaaradda ee magaalada Muqdisho.

Kulanka ayaa ujeedkiisu ahaa xoojinta xiriirka laba geesoodka ah iyo kor u qaadidda iskaashiga labada dal ee dan-wadaagga ah.

Intii uu socday kulanka, waxa laga wada hadlay arrimo badan oo ay ka mid yihiin iskaashiga dhanka amniga, xasilloonida gobolka, iyo arrimaha caalamiga ah ee labada dal ay danaha ka leeyihiin.

Labada wasiir ayaa adkeeyay muhiimadda ay leedahay in si dhow la isula shaqeeyo si loo horumariyo nabadda, horumarka, iyo barwaaqada Geeska Afrika.

Intii lagu guda jiray kulanka, labada wasaaradood waxay kala saxiixdeen heshiis is-afgarad (MoU) oo ku saabsan wadatashiyada siyaasadeed, taas oo dhisaysa hannaan rasmi ah oo lagu yeelanayo wadahadal joogto ah oo u dhexeeya Soomaaliya iyo Jabuuti.

Heshiiskan ayaa la filayaa inuu xoojiyo iskaashiga diblomaasiyadeed isla markaana uu horumariyo mudnaanta labada dal ee heer gobol iyo heer caalami.

Soomaaliya iyo Jabuuti, oo ay ka dhaxeyso xiriir qoto dheer oo taariikhi ah, dhaqan iyo walaaltinimo, ayaa sii wada dhisidda iskaashigooda soo jireenka ah iyaga oo mar walba ka shaqeynaya wada-shaqeyn iyo isu soo dhowaansho.

Madaxweyne Cabdiqaadir Axmed Cali Firdhiye ayaa ku guulaystay madaxweynaha Dowlad Goboleedka Waqooyi Bari Soomaaliya, kaddib markii musharax Cabdirisaaq Khaliif Axmed oo wareegga labaad la tartami lahaa uu ka tanaasulay doorashada.

Tanaasulka Cabdirisaaq Khaliif ayaa ku yimid, kaddib musharax Jamaal Maxamed Xasan oo ku haray wareegga koowaad uu codadkiisii ku wareejiyay madaxweyne Firdhiye, taasoo dishay rajada uu Cabdirisaaq Khaliif ka lahaa wareegga labaad ee doorashada.

Si kastaba ha ahaatee, madaxweyne Firdhiye ayaa mar kale sii hoggaamindoona maamulka cusub, isagoo nasiib u yeeshay inuu muddo 5 sano ah xilka sii hayo.

Dhinaca kale, Waxaa hadda la aaday doorashada madaxweyne ku xigeenka, waxaana loo badinayaa inuu ku guulaysan karo Abwaan Cabdirashiid Yuusuf Jibriil oo ahaa guddoomiyihii hore ee Baarlamaanka Puntland.

Madaxweyne Firdhiye iyo Abwaan Cabdirashiid oo isku dhinac ah ayaa horey loogu saadaalinayay inay ku guulaysan doonaan doorashada maamulka cusub, waxaana la ogsoon yahay inay ahaayeen labo musharax oo ay Dowladda Federaalka bari taaraysay.

Doorashadan ayaa dhameystir u ahayd geeddi socodka dhismaha maamulka cusub ee Waqooyi Bari Soomaaliya, kaasoo illaa bishii Julay dhismihiisu ka socday magaalada Laascaanood.