Talaado 29, April 2025 {HMC} Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa kursiga tirsigiisu HOP#201 dib ugu celiyay guddiga xeer hoosaadka, Daryeelka, Anshaxa iyo xasaanadda ee Golaha Shacabka si uu uga soo talo bixiyo dibna uu golaha ugu soo celiyo.

Talaabadan ayaa ka dhalatay ka dib kulan ay yeesheen Guddoonka Golaha Shacabka iyo kutlad Xildhibaano oo kor u dhaafaya 100 kuwaasoo wada hadallo galinkii dambe ee maanta bilowday kuwaasoo heshiis lagaga gaaray khilaafkii keenay in fadhiyada Golaha Shacabka meesha ka baxaan.

Xasaanad ka xayuubintii Guddoomiye Aadan Madoobe si iskiis ah uu ugu sameeyey Xildhibaan Cabdilaahi Xaashi Abiib oo ahayd saldhiga khilaafka ayaa la isku afgartay in heshiiis lagu dhammeeyo. Hase yeeshee, siiqada loo dhigayo qoraalka iyo hannaanka hawshan loo xallinayo ayaa kala aragti duwanaasho xooggan dhalisay.

Guddoomiyaha Golaha Sheekh Aadan Madoobe ayaa ogolaaday in arrinta Xildhibaan Abiib loo dhaafo Guddiga Xeer-hoosaadka ee Golaha, taasoo ka dhigan in dooddii Xildhibaannadu qeyb ahaan guuleysatay.

Qodobka kale ee la isku waayey ayaa ah in Golaha Shacabka dib loo furo berri, laakiin Xildhibaannada ayaa ku adkaysanaya in marka hore xal waara laga gaaro kiiska Dr. Cabdullaahi Xaashi Abiib.

Sheekh Aadan Madoobe ayaa culeys badan kala kulmay talaabada uu xilka kaga qaaday Xildhibaan Abiib ka dib markii Mooshin isaga xilka looga qaadayo ay diyaariyeen xildhibaano 100 ka badan kuwaasoo ka hor yimid Xil ka qaadista Xildhibaan Abiib oo ay ku tilmaameen mid aan sharciga iyo xeer hoosaadka baarlamanka waafaqsaneyn.

HOOS KA AKHRISO QORAALKA AADAN MADOOBE

Talaado 29, April 2025 {HMC} Maxkamadda Gobolka Banaadir ayaa maanta xukun ku riday koox lagu eedeeyay inay ka tirsan yihiin shabakad ka shaqeysa tahriibinta iyo ganacsiga dadka, iyadoo soo gabagabaysay dhageysiga dacwaddooda.

Guddoomiyaha maxkamadda, Salaax Cali Maxamuud, ayaa ku dhawaaqay xukunka Maxamed Jimcaale Raage iyo Maxamuud Cali Xasan, oo mid kasta lagu xukumay labo sano oo xabsi ah. Sidoo kale, waxaa lagu amray inay bixiyaan min 50 Halaad oo ah diyada afar haween ah oo ay tahriibiyeen oo ku geeriyooday tahriibka.

Maxkamaddu waxay sidoo kale ku xukuntay eedeysanayaashan inay si buuxda u bixiyaan dhammaan lacagihii ay ka qaateen qoysaska dadka ay tahriibiyeen. Waxayna amar kusoo saartay in lagala noqdo dammaanadaha ay bannaanka ku joogeen.

Sidoo kale, eedeysanayaasha kala ah, Cabdiwahaab Nuur Mahdi, Ibraahim Cabdi Ibraahim, Waliid Cabdullaahi Abuukar, iyo Cabdiqani Maxamed ayaa lagu xukumay min lix bilood oo xabsi ah, kadib markii lagu helay inay si toos ah ama si dadban uga qayb qaateen dambiyada tahriibinta iyo ganacsiga dadka.

Xukunka eedeysanayaashaan wuxuu imaaneyaa xilli ay si aad ah u kordheen shabakadaha tahriibiya dadka ee ka howlgala gudaha Soomaaliya, iyadoo ay faraha kasii baxayaan tahriibka dhalinyarada iyo dadka waaweyn.

Talaado 29, April 2025 {HMC} Madaxweynaha Somaliland, Cabdiraxmaan Maxamed Cabdillaahi ‘Cirro’, ayaa sheegay inay ka shaqaynayaan nabadaynta iyo sii-daynta maxaabiistii lagu qabtay dagaalkii Laascaanood.

Madaxweyne Cirro ayaa sidoo kale xusay inay doonayaan in la furo mar kale isu-socodka ganacsiga iyo bulshada ee u dhexeeya deegaanada Somaliland iyo kuwa maamulka SSC-Khaatumo ee hadda ka arrimiyo.

“Gobolka Bariga Sool ee Somaliland, waxaanu muhiimad siin doonnaa sii-daynta maxaabiista iyo sidii dib layskugu furi lahaa isu-socodka bulshada iyo ganacsiga,” ayuu yidhi Madaxweyne Cirro.

Hadalka Madaxweynaha ayaa yimid kadib markii dhawaan maamulka SSC-Khaatumo uu sii daayay 25 maxbuus oo ka mid ah maxaabiista ay Somaliland ka haystaan, kuwaas oo ay sheegeen inay duruufo gaar ah qabaan, iyada oo markii lasii daayay laga dejiyay magaalada Muqdisho.

Ra’iisul Wasaaraha Soomaaliya, Xamse Cabdi Barre, oo safar ku tagay magaalada Laascaanood, ayaa hormuud ka ahaa sii-dayntooda, isagoo maamulka ku qanciyay in marka hore la sii daayo maxaabiista jilicsan.

Somaliland ayaa sheegtay inaanay la wareegi doonin maxaabiistaasi, waxayna ku eedaysay dowladda Soomaaliya inay arrinta maxaabiista siyaasadaysay. Waxay intaa ku dartay in haddii maxaabiis la is-waydaarsanayo, ay tahay in ay arrintaasi u dhacdo si dhexdhexaad ah, iyadoo loo marayo hay’adaha caalamiga ah sida Laanqayrta Cas.

Hadaba, qaar kamid ah warbaahinta Somaliland ayaa dhawaan wariyay in maxaabiistii Muqdisho diyaarad laga saaray oo laga dajiyay Hargaysa, iyada oo imaanshiyahooda warbaahinta laga qariyay lakiin xukuumada Somaliland may xaqiijin.

Hadalka Madaxweyne Cirro ayaa muujinaya in ay jirto fursad labada dhinac ay ku kala qaadan karaan maxaabiista, hase ahaatee madaxweynuhu si toos ah ugama uusan hadlin cidda dhexdhexaadinta samaynaysa ama wadada rasmiga ah ee loo marayo arrintaasi.

Somaliland ayaa shalay soo gabagabaysay qaramaynta kumannaan maleeshiyo beeleed ah oo la abuuray kadib dagaalkii Laascaanood, taasoo ay ku tilmaantay tallaabo muhiim u ah nabadaynta deegaanada Sool iyo Sanaag oo ay weli colaaduhu ka taagan yihiin.

Inkasta oo labada dhinac ee Somaliland iyo SSC-Khaatumo ay ku baaqayaan nabad, haddana ilaa hadda laguma guulaysan in ay miis wada-fadhiistaan si ay si dhab ah ugu xalliyaan colaadda.

Talaado 29, April 2025 {HMC} Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa xilka u kala wareejiyey Ra’iisul Wasaare ku Xigeenka Labaad ee cusub, Mudane Jibriil Cabdirashiid Xaaji Cabdi, iyo Ra’iisul Wasaare ku-xigeenkii Labaad ee hore Mudane Cabdisalaam Cabdi Cali.

Ra’iisul Wasaaraha, ayaa tilmaamay muhiimadda ay leedahay in la dardargeliyo howlaha mudnaanta u leh dowladda, isla markaana Ra’iisul Wasaare Ku-xigeenka cusub looga baahan yahay in uu xoogga saaro qorsheyaasha Xukuumadda DanQaran ee ku aaddan hirgelinta Siyaasadda Jaangoynta Mushaaraadka Shaqaalaha dowladda, dib-u xoreynta goobahay ay AS ku harsan yihiin iyo garab istaagga ciidamada qalabka sida ee dagaalka kula jira AS.

Mudane Xamsa, ayaa uga mahadceliyey Ra’iisul Wasaare Ku-xigeenkii labaad ee hore, shaqooyinkii muhiimka ahaa ee uu qabtay, kuwaas oo ay kamid ahaayeen dardargelinta dagaalka lagu ciribtirayo kooxaha AS ah, iyo abaabulka bulshada ee ku aaddan garab istaagga ciidamada geesiyaasha ah ee dagaalka kula jira AS.