Sabti  14 Feb 2026 {HMC} Magaalada Addis Ababa waxaa ka furmay meertada 39aad ee Shirka Madaxda Midowga Afrika oo sanadkiiba mar qabsooma, waxaa daahfuray Ra’iisul Wasaaraha Itoobiya, Abiy Ahmed oo si qotodheer uga hadlay ajanaha miiska saaran.

Shirka waxaa sanadkaan diiradda lagu saarayaa Arrimaha Amniga, Dhaqaalaha, Isbaddelka Cimillada, Midnimada & sidii loo sii wadi lahaa wadashaqaynta ka dhex jirta Dalalka xubnaha ka ah Ururkaan ee Addis Ababa intooda badan ku sugan.

Arrimaha Amniga hoos imaanaya waxaa kamid ah Dagaallada iyo Colaadaha ka jira Dalal kala duwan oo Afrika ah, waxaa la iswaydiinayaa sida ay madaxdaan u waji karaan in xal waara loo helo dagaalladaas sokeeye oo qaaraddaan dib u dhigay.

Horumarka dhaqaalaha waa meesha indhaha lagu hayo, Afrika ayaa doonaysa in ay xoogga saarto hirgelinta aagga Ganacsiga ee Xorta ah si Dalal badan ay u helaan fursado maalgashi iyo in ay horumar muuqda samayn karaan.

Isbaddelka Cimillada, tani waxaa caqabadda ugu darran ee sababta Abaaraha, Barakaca iyo caafimad darrada, Madaxda madasha ku sugan oo horay uga qaybgalay shirar meelo kala duwna ka dhacay oo looga hadlay arrintaas ayaa khudbado ka jeedinaya meertada 39aad.

Gunaanadka waxaa lagu wadaa in diiradda la saaro sidii loo midayn lahaa mowqifka Afrika ee Arrimaha Caalamiga ah, ka gudubka dhibaatooyinka taagan, dardargelinta qorshaha horumarineed iyo dhaqangelinta waxyaabaha lagu ballamo.

La soco wixii kasoo kordha Hiiraanweyn

Sabti  14 Feb 2026 {HMC}  Wakaalada wararka ee Reuters ayaa sheegtay in wareegga labaad ee wada-hadallada nukliyeerka ee u dhexeeya Iran iyo Maraykanka lagu qaban doono Geneva, Switzerland, Talaadada.

Warbaahinta ayaa, iyadoo xiganaysa ilo xog-ogaal ah, sheegtay in Steve Whittaker, wakiilka Maraykanka ee Bariga Dhexe ee Donald Trump, iyo Jared Kushner, ay la kulmi doonaan wafdiga Iiraan subaxda Talaadada.

Ilo xog-ogaal ah ayaa u sheegay Reuters in sidoo kale wafdiga Omani uu joogayo Geneva si uu u dhex-dhexaadiyo wada-hadallada, sidii hore.

Wareeggii ugu horreeyay ee wada-hadallada aan tooska ahayn waxaa la qabtay Jimcaha, 6 Febraayo, magaalada Muscat, caasimadda Oman, taasoo labada dhinac ay ku tilmaameen mid faa’iido leh.

Shalay, Mr. Trump ayaa sheegay inuu u maleynayo in mas’uuliyiinta Iiraan ay diyaar u yihiin wada-hadal, isla markaana uu aaminsan yahay in wada-hadalladu la soo gabagabeyn karo wakhti dhow.

Sabti  14 Feb 2026 {HMC} Madaxda Dowladda Federaalka Soomaaliya iyo xubnaha Mucaaradka ah ayaa kulamo gaar gaar ah ka wada Magaalada Muqdisho, waxa ay uga arrinsanayaan fadhiyadaan shirka u dhaxeeya ee lagu wado in uu dhowaan furmo

Ra’iisul Wasaaraha Xukuumadda Federaalka Soomaaliya, Xamsa Cabdi Barre ayaa weli ku guda jira Booqashada Xubnaha Mucaaradka ah ee isugu jira Madaxdii hore iyo Madaxweyneyaasha Dowlad-Goboleedyada Puntland & Jubbaland

Xamsa ayaa mas’uuliyiintaan Mucaaradka si hordhac ah ugala hadlay xaaladda Siyaasadeed ee Dalka, wadahadalka la qorshaynayo iyo waxyaabaha laga filan karo maadaama Dowladda Federaalka ay dhigtay gogosha wadaxaajoodka

Xubnaha Mucaaradka waxa ay dhankooda wadaan kulamo dhexdooda ah oo ay uga arrinsanayaan qodobada ay la shirtagi karaan iyo qaabka ay uga xaltami karaan haddii uu culays siyaasadeed uga yimaado dhinaca wadahadalkaas

Jimco 13 Feb 2026 {HMC} Laba sano ka hor magaalada Roma, Shir-madaxeedkii ugu horreeyay ee Talyaaniga iyo Afrika waxaa lagu guddoomiyay in laga gudbo hannaanka iskaashiga soojireenka ahaa, lana yagleelo iskaashi ku saleysan arrimaha hortabinta u leh Afrika iyo in Afrika ay iyadu go’aamiso masiirkeeda.

Marka laga ambaqaado aragtideenna, iskaashiga Talyaaniga iyo Afrika waxa uu jidaynayaa ahmiyadda ay leedahay maalgelinta kaabayaasha halbowlaha ah ee horseedaya xasillooni iyo koboc dhaqaale oo waara.

Waxyaabaha hortabinta u leh Soomaaliya waa kuwo cad: xoojinta gegsiga bulshada, inaan dhallinyaradeenna u abuurno fursado shaqo, helitaanka cunto bulshada ku filan, iyo inaan dhaqaalaheenna ku xirno suuqyada heer gobol iyo heer caalami.

Horumarka ay Afrika ku tallaabsanayso waa inay saldhig u tahay ilaalinta gobonnimada, midnimada dhuleed iyo madax-bannaanida siyaasadeed ee dalalka, si waafaqsan mabaadii’da Axdiyada Qaramada Midoobay iyo Midowga Afrika.

Mabaadii’dani ma aha kuwo la tiigsado oo kali ah; waa waajibaad sharci ah oo go’aaminaya badqabkeenna. Tallaabooyinka ay sida goonida ah Israa’iil ugu beegsatay madaxbannaanideenna waxay si toos ah u wiiqayaan nidaamka caalamiga, waana inaan si adag isaga diidnaa.

Waxaan ugu baaqeynaa dhammaan dalalka xubnaha ka ah Midowga Afrika inay iska diidaan nooc kasta oo faragelin dibadeed oo wiiqaysa sharciga caalamiga ah, xasaradna ka abuuraysa gobolka, isla markaana dhaawacaysa kalsoonida u dhaxaysa wadammada.

Maadaama nabadda iyo horumarku aysan kala harin, Soomaaliya waxay ahmiyad gaar ah siinaysaa iskaashiga amniga ee u dhexeeya Talyaaniga iyo Afrika.

Waxaan si gaar ah uga mahadnaqaynaa taageerada Talyaaniga ee Hawlgalka Taageerada iyo Xasillinta Midowga Afrika ee Soomaaliya (AUSSOM).

Soomaaliya waxay diyaar u tahay inay xoojiso iskaashiga kala dhexeeya Talyaaniga iyo dhammaan bahwadaagta qaybta ka ah Qorshaha Mattei, iyadoo qorshahaas lagu hagayo kalsooni, xilkasnimo, dan-wadaag iyo aragti mideysan oo ku wajahan Afrika oo barwaaqo ah.
DHAMMAAD

Jimco 13 Feb 2026 {HMC} Sida uu goor dhow baahiyay Wargeyska New York Times warbixin la xiriira dhaq-dhaqaaqyada Dowladda Mareykanka ee ku wajahan Dowladda Iiraan.

Warbixintu waxay sheegtay in Wasaaradda Dagaalka Mareykanka (Pentagon) ay hadda kordhinayso ciidankeeda ku sugan gobolka, gaar ahaan maraakiibta dagaalka iyo kuwa xambaara diyaaradaha, si ay u xoojiso joogitaankeeda milatari.

Sidoo kale, Pentagon-ku wuxuu madaxweyne Trump u gudbiyay liis bartilmaameedyo suurtagal ah.

Weerarrada uu Mareykanka ku qaadi karo Iiraan, markan kuma koobnaan doonaan kaliya bartilmaameedyada xarumaha nukliyeerka, balse waxaa qeyb ka noqonaya;

•Kaydka Gantaallada ridada dheer ee Iiraan.

•Goobaha laga rido gantaallada iyo warshadaha sameeya hubkaas.

Ujeeddadu waa in la wiiqo awoodda Iiraan si aysan u helin fursad ay kaga jawaabto haddii la qaado tallaabo milatari.

Warbixintu waxay kaloo sheegtay in mid ka mid ah ikhtiyaarrada la tixgelinayo uu yahay in la diro ciidamo gaar ah oo tababar sare leh, si ay hawlgallo gaar ah uga fuliyaan gudaha Iiraan. Ciidamadan waxaa loo diri karaa inay beegsadaan xarumo si adag loo ilaaliyo oo aan si fudud gantaallo u gaari karin, iyo sidoo kale meelaha laga hago ciidamada Ilaalada Kacaanka Iiraan.

Si kooban, warbixintu waxay muujinaysaa in qorshayaasha Mareykanku aysan ku koobnayn hanjabaad hadal ah oo keliya, balse ay jiraan diyaargarowyo muuqda oo milatari oo la sii wado.