Jimco 13 Feb 2026 {HMC}  Ra’iisul Wasaaraha xukuumadda Soomaaliya, Xamsa Cabdi Barre, ayaa sheegay in Dowladda Federaalka Soomaaliya ay si buuxda uga go’an tahay gogosha wada hadalka, islamarkaana ay mar walba fidsan tahay, isagoo sheega in albaabku u furan yahay dhammaan dhinacyada siyaasadda.

Ra’iisul Wasaare Xamse Cabdi Barre ayaa hadalkan sheegay kaddib kulan uu xalay la yeeshay xubno uu ka mid yahay raysal wasaarihii hore ee dalka Maxamed Xuseen Rooble oo ku jira siyaasiyiinta ku mideysan Golaha Mustaqbalka Soomaaliya.

Kulanka ayaa lagu sheegay in looga hadlay xaaladaha ugu dambeeyay ee dalka, gaar ahaan arrimaha la xiriira gogosha wadahadalka ee u dhaxeysa dowladda iyo Golaha Mustaqbalka.

Xamse ayaa sidoo kale xusay baahida loo qabo mideynta dadaallada lagula dagaallamayo kooxaha Khawaariijta, iyo in si wadajir ah looga hortago faragelinta dibadeed ee lagu sameeyo dalka.

Hadalka Ra’iisul Wasaaraha ay cambaareeyeen waxa ay ku tilmaameen is-hortaag ay ciidamada ammaanku ku sameeyeen Madaxweynihii hore ee dalka Sheekh Shariif Sheekh Axmed iyo Ra’iisul Wasaarihii hore Maxamed Xuseen Rooble.

Labadan mas’uul ee hore ayaa la sheegay in laga hor istaagay kulan ay Golaha Mustaqbalka xalay ku la haayeen Hotel Airport oo ku yaalla gudaha garoonka diyaaradaha Aadan Cadde, kaas oo looga arrinsanayay diyaar garowga wada xaajood la filayo inuu dhex maro Dowladda Federaalka iyo Golaha Mustaqbalka Soomaaliyeed.

Golaha Mustaqbalka waxay sheegeen in ay ka go’an tahay ka qeybgalka wada hadallada lagu jaangoynayo jihada siyaasadeed ee dalka, gaar ahaan sidii heshiis loo dhan yahay looga gaari lahaa hannaanka doorashada dalka, loogana baaqsan lahaa firaaq dastuuri ah iyo khilaaf siyaasadeed oo daba dheeraada.

Jimco 13 Feb 2026 {HMC} Wasaaradda Amniga Gudaha ee xukuumadda Soomaaliya ayaa jawaab ka bixisay warar lagu faafiyay warbaahinta oo sheegayay in masuuliyiin ay kamid yihiin madaxweyne hore Shariif Sheikh Axmed iyo raysal wasaare hore, Maxamed Xuseen Rooble laga celiyay in ay galaan xerada Xalane.

Siyaasiyiinta ayaa ku socday hotel kuyaala garoonka Aadan Cadde oo ay deggen yihiin madaxda Puntland iyo Jubbaland, islamarkaas ay kulamo ku leeyihiin mucaaradka ku jira Golaha Mustaqbalka Soomaaliya.

War qoraal ah oo kasoo baxay wasaaradda amniga Soomaaliya ayaa lagu sheegay in habraaca garoonka uu dhigayo in wixii ka dambeeya 5:00 galabnimo laga soo galo albaabka loo yaqaan Mariina Gate, isla markaana aan loo oggolayn in ciidan hubeysan lala galo gudaha garoonka.

Wasaaradda ayaa tilmaamtay in habeenkii xalay ay dhacday arrin la xiriirta masuuliyiin hore oo la sheegay inay ku xadgudbeen nidaamkaas, kaddib markii ay gudaha garoonka la galeen ciidamo tiro badan, isla markaana ay adeegsadeen albaab aan ahayn midka loo asteeyey in habeenkii la isticmaalo.

Sida lagu sheegay warka, tallaabadaas ayay wasaaraddu sheegtay in ay halis gelin karto amniga iyo badqabka garoonka, ayna jebineyso habraacyada rasmiga ah ee sugidda amniga.

Wasaaraddu waxay sheegtay in aanay jirin masuuliyiin hore oo si toos ah loogu diiday gelitaanka garoonka, balse ay jireen kuwo aan oggolaan inay u hoggaansamaan habraaca amniga ee u degsan garoonka.

Wasaaradda Amniga Gudaha waxay ugu baaqday dhammaan dhinacyada inay ixtiraamaan shuruucda iyo habraacyada amniga si loo xaqiijiyo badqabka garoonka iyo muwaadiniinta.

Si kastaba ha ahaatee, Golaha Mustaqbalka Soomaaliya ayaa lagu wadaa inay soo saarayaan war-saxaafadeed ay uga jawaabayaan dhacdadan.

Jimco 13 Feb 2026 {HMC}  Golaha Nabadda iyo Ammaanka ee Midowga Afrika ayaa sheegay in uu xoogga saarayo raadinta taageerrada ay u baahan yihiin Ciidamada Soomaaliya ku jooga ee fasaxa ka haysta Golaha ammaanka ee Qaramada Midoobay ee AUSSOM.

Ciidankaan waa AUSSOM waxa ay Soomaaliya ku joogaan Qaraarka tirsigiisu yahay 2767 ee dib u eegista lagu sameeyay sanadkii tagay 2025 iyada oo wax laga baddelay hannaanka uu ku shaqaynayo iyo tiradiisa oo la dhimay.

Waxa uu soo bandhigay dhibaatada Dhaqaale ee haatan uu wajahayo Howlgalkaan oo soo billawday sanadkii 2007dii, kaddib markii dalal bixin jiray qaaraanka la siiyo askarta AUSSOM ay joojiyeen sababo u gaar ah.

Midowga Afrika gaar ahaan Golaha Nabadda iyo Ammaanka ee ururkaas ayaa soo jeediyay in aan laga maarmin garab istaagga Ciidamada Afrikaanka ah ee Jooga Soomaaliya ee xiran Dharka AU-da sida lagu xusay Bayaanka.

Uganda ayaa dhowaan sheegtay in 19 sano kaddib inay ciidankeeda kala baxaysa Soomaaliya, ujeedka ugu wayn ee go’aankaas ku dhaliyay waa dhaqaalaha sii yaraanaya iyo in ay waysay damacihii ay kala lahayd inay ciidamo dheeraad ah usoo dirto Soomaaliya.

Maamulka Madaxweyne Donald Trump ayaa horay u joojiyay dhaqaalihii badnaa ee Maraykanka uu ku bixinayay Ciidamada nabad ilaalinta ah, Hay’adaha hoostaga Qaramada Midoobay iyo bixinta qaaraankii guud ee dalkaas lagu yaqaanay in uu bixiyo.

Khamiis 12 Feb 2026 {HMC} Ugu yaraan 21 qof ayaa ku qaraqmay, halka kuwa kalena ay weli maqan yihiin, ka dib markii doon rakaab ah ay ku degtay Webiga Niil ee Waqooyiga Suudaan ee Gobolka Wabiga Nile, sida ay sheegeen saraakiisha difaaca madaniga ee Dalka Suudan

Dowladda Suudaan ayaa soo saaray war-saxaafadeed ay uga tacsiyeynayaan dhimashada 21 qof, oo ay ku jiraan haween iyo carruur.

Taliyaha Booliska, Jeneraal Quashi Hussein, oo ah kaaliyaha agaasimaha guud ee difaaca rayidka ee Suudaan, ayaa Khamiistii u sheegay Al Jazeera in lix ama toddoba qof la badbaadiyay, iyadoo dadaallada lagu soo celinayo ilaa darsin qof oo la rumeysan yahay inay maqan yihiin la sii wado.

Doonta rakaabka ee alwaaxa ah ayaa siday 30-35 rakaab ah, oo ay ku jiraan haween, waayeel iyo carruur, markii ay degtay fiidnimadii Arbacada iyadoo u dhaxaysa tuulooyinka Tayba al-Khawad iyo Deim al-Qarai ee degmada Shendi ee Gobolka Wabiga Nile, Xuseen ayaa sidaas yidhi.

Xuseen ayaa intaas ku daray in kooxo laga soo diray Khartoum, caasimadda Suudaan, si ay uga caawiyaan hawlgalka, iyadoo dhammaan kooxaha difaaca rayidka ee Gobolka Wabiga Nile la abaabulay si ay u raadiyaan dadka maqan.

“Kooxahayagu wali waxay raadinayaan meydadka kuwa ku qaraqmay Wabiga,” ayuu yiri.

Shabakadda Dhakhaatiirta Suudaan, oo ah urur ay ku mideysan yihiin xirfadlayaasha caafimaadka ee Suudaan, ayaa qoraal ay soo dhigtay X ku sheegtay in masiibadani ay iftiimisay “jilicsanaanta gaadiidka wabiga”

Waxay sidoo kale sheegtay in jawaab celin gaabis ah oo ka timid mas’uuliyiinta maxalliga ah iyo kooxaha difaaca rayidka saacadihii ugu horreeyay ee muhiimka ahaa ka dib markii ay quustay ay “sii xumeysay baaxadda masiibada”.

Kooxdu waxay sheegtay inay dalbatay in mas’uuliyiintu ay ka jawaabaan “tallaabooyin degdeg ah si loo hubiyo badbaadada gaadiidka wabiga iyo ka hortagga soo noqoshada masiibooyinka noocaas ah ee galaaftay nolosha dad badan.

Qiimaha Arbacadii ma aha masiibadii ugu horreysay ee wabiga ka dhacda gobolka waqooyiga Suudaan.

Sannadkii 2018, ugu yaraan 23 qof, oo badankood carruur yihiin, ayaa ku qaraqmay markii doontooda ay ku degtay Wabiga Niil iyagoo loo qaadayay iskuulka.

Khamiis 12 Feb 2026 {HMC} Ra’iisul Wasaaraha Xukuumadda JFS Mudane Xamsa Cabdi Barre ayaa hoygiisa ku booqday Madaxweyne hore Mudane Shariif Sh Axmed xilli loo madlanyahay shirka wadahadalka dowladda iyo Golaha Mustaqbalka.

Ra’iisul Wasaare Xamsa ayay booqashadiisa qeyb ka tahay niyad wanaagga madaxda dowladda ku wajahayso wadahadalka, horeyna u abuurtay jawi kasta oo xasiloon oo dalka horey loogu wadi karo.

Kulanka ayaa waxaa qeyb ka ahaa Ra’iisul Wasaare hore Mudane Xasan Cali Kheyre oo xubin ka ahaa Golaha Mustaqbalka.

Ra’iisul Wasaaraha ayaa sheegay in gogosha dowladda ay markasta fidsantahay, albaabka madaxdana uu furanyahay, muhiimna tahay in dhinacyada lagala fariisto xal u halista arrimaha taagan si dalka uu horey ugu talaabsado, laga xoreeyo cadawga Khawaariijta, meelna looga soo wada jeesto farogalinta dibadeed ee lagu sameeyay dalka.