3-April 2025 -{HMC} Wasaaradda Amniga Gudaha ee HirShabelle oo kaashaneysa taageerada farsamo iyo mid dhaqaale oo ay bixiyeen UNDP-Japan ayaa u suurtagelisay qabashada kulamo saddex biloodle ah oo lagu qabtay degmooyinka Moqokori iyo Aden yabal iyada oo manta laso geb-gebeeyay kulanki ugu dambeeyay muddo 3 bil  ah -Janaayo-April 2025

Kulamadan ayaa la isugu keenay dhammaan qaybaha bulshada si loo abuuro madal wadatashi ah, loogana shaqeeyo dib u dhiska kalsoonida shacabka iyo hay’adaha amniga, iyadoo la horumarinayo hannaan boolis bulsheed oo ku saleysan deegaanka.

• Kulamadan oo ay ka qeyb galeem G,uddoomiyeyaasha degmooyinka iyo mas’uuliyiinta maamulka hoose, Ciidamada Booliska Soomaaliyeed iyo cutubyada Darawiishta, Odayaasha dhaqanka, haweenka, dhalinyarada iyo culimada, Ururada bulshada rayidka ah (CSOs)  waxaaa diiradda lagu saaray  Xoojinta kalsoonida ka dhaxeysa bulshada iyo laamaha amniga, Dhisidda guddi nabadeed oo heer degmo ah oo si joogto ah ula socdo xaaladda amniga, Ku dhaqanka mabda’a boolis dimoqraadi ah iyo isla xisaabtan bulsheed iyo Dhiirrigelinta ka qeybgalka firfircoon ee bulshada rayidka ah ee arrimaha maamulka iyo nabadgelyada.

Dadka deegaanka ee Moqokori iyo Aadan Yabaal waxay si weyn u soo dhaweeyeen kulamadan, iyagoo u arkay inay astaan u yihiin soo laabashada dowladda, ilaalinta xuquuqda shacabka, iyo dib u bilaabashada dhaqan wadatashi ah oo muddo dheer hakad ku jiray. Kulamadu waxay abuureen rajo cusub iyo dareen la xiriira in codka shacabka la maqlo lagana qaybgeliyo go’aan qaadashada.

Kulamada saddex biloodle ee wadatashiga bulshada waxay noqdeen hannaan  muhiim ah oo lagu taageerayo xasilloonida, dib u dhiska dowladnimada, iyo horumar waara oo deegaanka ku saleysan. Waxaa muhiim ah in la sii xoojiyo kulamadan, lana helo taageero joogto ah oo dowladda iyo beesha caalamka ah si loo gaaro bulsho nabad ah, midaysan, oo leh adeegyo caddaaladeed iyo amni oo hufan.

Khamiis 03, April-2025 {HMC} Ciidamo aad u tira badan oo ka tirsan kuwa Daraawisihta maamulka Jubbaland oo wata gaadiidka dagaalka ayaa maanta u dhaqaaqay deegaanada ay kooxda Al-shabaab kaga sugan yihiin Waqooyiga gobolka Jubbada Hoose.

Muqaal lagu baahiyay Talefeshinka ku hadla afka maamulka Jubbaland ayaa lagu arkaayay ciidamadaan oo ah kuwa aad u hubeysan oo loo dhameystiray qalabkooda, kuwaas oo ku biiraya howlgalada ka dhanka ah Al-shabaabka ku sugan deegaanada Waqooyi ee gobolkaas.

Dhowr maalin ka hor ayay aheyd markii howlgal qorsheysnaa oo ay iska kaashadeen ciidanka Kumaandooska Danab iyo kuwa Daraawiishta Jubbaland ay ku burburiyeen fariisimo kooxdu ku laheyd Waqooyiga gobolka Jubbada Hoose.

Ciidamada Daraawiishta Jubbaland ayaa wada dhaqdhaqaaqyo culus oo ay ku doonayaan in kooxda Al-shabaab kaga xureeyeen deegaanda ay kaga sugan yihiin gobolada Jubbada Hoose iyo Jubbada Dhexe ee maamulka Jubbaland.

Ugu dambeyntii dhaqdhaqaaqyadaan ciidan ayaa kusoo aadaya, iyadoo bishii lasoo dhaafay dowladda Soomaaliya oo kaashaneysa saaxiibada Caalamka ay duqeymo culus oo khasaare xooga leh lagu gaarsiiyay Al-shabaab ka fuliyeen gudaha magaalada Jilib oo Al-shabaab u ah saldhigooda ugu weyn .