Talaado 18,March 2025 {HMC} Cabdiraxmaan Shirwac Laahoor, oo ka mid ahaa xubnaha kooxda Daacish, ayaa xalay ku geeriyooday xabsi ku yaalla magaalada Boosaaso, sida ay xaqiijiyeen ilo-wareedyo amni.

Laahoor, oo 60 jir ahaa, ayaa 3-dii Febraayo 2025 si iskiis ah isugu soo dhiibay ciidamada amniga Puntland, kaddib markii uu ka baxay kooxda uu horey uga tirsanaa ee Daacish. Tan iyo markaas, wuxuu ku jiray xabsi, halkaas oo dhowr jeer ay hay’adaha dambi baaristu ku wareysteen.

Ilaa hadda lama shaacin sababta rasmiga ah ee geeridiisa, mana jiro war rasmi ah oo kasoo baxay masuuliyiinta Puntland oo ku saabsan dhacdadan.

Laahoor ayaa horey ugu xukunnaa dil toogasho ah, isagoo lagu eedeeyay inuu masuul ka ahaa dilal dad badan lagu laayay iyo qaraxyo ka dhacay magaalada Boosaaso.

Shabakado Daacish katirsan oo horey loogu fuliyay xukun dil ah, kuwa kalena ay xabsiya ku jiraan ayaa Loohaar ku sheegay inuu horjoogaha bixin jiray amarada dilalka laga gaynsan jiray magaalada Boosaaso, inkastoo uu isagu beeniyay eedeymahaas.

Geeridiisa ayaa kusoo beegmaysa xilli ay Puntland isku diyaarinayso howlgallo ka dhan ah shakhsiyaadka lala xiriirinayo kooxda Daacish, oo ay ka mid yihiin ganacsato iyo dad kale.

Dhawaan, ilo-wareedyo amni ayaa shaaciyay in la helay dukumentiyo ay ku qoran yihiin magacyada shirkado ganacsi oo sahay u diri jiray deganada kooxda Daacish ay ku sugan yihiin.

Talaado 18,March 2025 {HMC} Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa gaaray jiidaha hore ee dagaalka ka dhanka ah AS, gaar ahaan Degmada Aadan Yabaal oo uu ka hoggaaminayo hawlgallada xoreynta deegaannada ay ku harsan yihiin.

Madaxweynuhu ayaa u kuur-gali doonaa xaaladda ciidamada iyo xoogagga shacbiga ah ee u istaagay xoreynta deegaannadooda, isagoo warbixinno ka dhegeysan doona talisyada iyo hoggaannada ku sugan furimaha dagaalka, kuwaas oo maalmihii la soo dhaafay jab weyn gaarsiiyay cadowga shacabka Soomaaliyeed.

Sidoo kale, Madaxweynaha Jamhuuriyadda ayaa dul istaagi doona xaaladda nololeed ee deegaannada laga xoreeyey muddadii la soo dhaafay, maadaama dowladdu ay dadaal badan ku bixisay gurmadka, adeegyada aasaasiga ah iyo daryeelka dadkeenna ku nool deegaannada la xoreeyey oo duruufo adag la noolaa inta ay ku jireen gacanta AS.

Dowladda Federaalka Soomaaliya waxay bogaadinaysaa baraarugga dhallinyarada Soomaaliyeed, haweenka, waxgaradka iyo culimada ee ka dhanka Kooxaha dhibaatada ku haysa dalkeenna, gaar ahaan taageerada halyeeyada Ciidamada Qaranka ee naftooda u huraya qarannimada iyo gobanida dalkeenna.

Talaado 18,March 2025 {HMC} Lataliyaha dhinaca Amniga Madaxweynaha Jamhuuriyadda Federaalka Soomaaliya Xuseen Sheekh Cali oo ka hadlay qarax barqonimadii maanta ka dhacay Muqdisho ayaa sheegay in uu badqabo Madaxweyne Xasan Sheekh Maxamuud.

Xuseen ayaa sheegay in ‘been abuur la buunbuuniyay uu yahay wararka laga faafiyay qaraxa ee dacaayadda looga sameeyay Madaxweynaha Soomaaliya Xasan Sheeh Maxamuud’ sida uu hadalka u dhigay Taliyihiisa dhinaca amniga.

“Madaxwaynaha Jamhuuriyadda waa badqabaa, wuxuuna ku guda-jiraa safaro uu ugu kuurgalaayo hawlgalada barakaysan oo ay gobalada dalka ka wadaan CXD, iyagoo taageero buuxda ka helaaya shacabka deegaanadaas.” Ayuu yiri Xuseen Sheekh Cali

“Naflacaarinimo iyo been la buunbuuniyo qarankan laguma cabsi-gelin karo.” Ayuu sii raaciyay qoraalkiisa kooban, Xuseen Sheekh Cali oo ah Lataliyaha amniga Qaranka oo qoraalkaan soo dhigay bartiisa X (Twitterka).

Talaado 18,March 2025 {HMC} Guddoomiyaha Guddiga Madaxabannaan ee Doorashooyinka Qaranka iyo Soohdimaha Cabdikariin Axmed Xasan oo Warbaahinta la hadlay ayaa sheegay in ay la wareegeen qalabkii doorashada loo adeegsan lahaa.

Cabdikariin ayaa sheegay in bisha Juun dhammaadkeeda la qabanayo Doorashada Deegaanka, waxaana billaabanaya diiwaangelinta Dadweynaha buuxiya shuruudaha u ogolaanaya in ay codeeyaan sida hadalka loo dhigay.

“Waxaan la wareegnay dhamaan qalabkii doorashada, bisha soo socta waxaa bilaabanaysa Diiwaan galinta dadweynaha, waxaana noo bilaabmaya doorashada golaha deegaanka” ayuu yiri Guddoomiyaha Guddiga Doorashooyinka Cabdikariin Axmed Xasan.

Soomaaliya ayaa ku dhawaaqday in ay qabaneyso Doorasho qof iyo cod ah si ay uga guurto nidaamka codeynta Doorashooyinkii dadbanaa ee lagu soo dhisay 6dii Dowlad ugu dambeysay ee la doortay tan iyo sanadkii 2000.

Talaado 18,March 2025 {HMC} Qaban-qaabada Soo dhaweeynta Madaxweynaha Jamhuuriyda Soomaaliya Xasan shiikh Maxamuud ayaa ka socoto Degmada Moqokori ee Gobolka Hiiraan oo lagu wado in Saacadaha soo socda uu gaaaro Madaxweynaha.

Degmada Moqokori Waxaa ku sugan Madaxweyne ku xigeenka Hirshabeelle Yuusuf axmed Hagar, Gudoomiyaha Gobolka Hiiraan iyo Madax kale kuwaas oo dhamaantod ka qeeyb qaadan doono Soo dhaweeynta Madaxweynaha Soomaaliya Xasan Shiikh Maxamuud.

Madaxweyne Xasan Shiikh waxaa Safarka ku wehliyo, Taliyaha Hay’ada Nabadsugida Soomaaliya Cabdullaahi Maxamed Cali Iyo Taliyaha Ciidamada Xooga dalka Soomaaliye Generaal Odowaa Yuusuf Raage.

dhamaan Madaxdan ayaa Moqokori u gaari doono dardar galinta Dagaalka ka dhanka Ah Al-shabaab ee ka socda Hirshabeelle iyo Galmudug. waxaana Wararka qaar ay sheegayaan in moqokori laga dhige doono Saldhig Militire oo howlgaladan laga hago.

Madaxweynaha Soomaaliya ayaa hada ku sugan degmada aadan yabaal ee Gobolka Shabeelaha dhaxe, halkaasi uu u tagay dardar galinta Dagaalka ka dhanka ah Kooxda AS oo mudooyinkii dambo ka socday Gobolkaasi.