Isniin 3, March 2025 {HMC} Israa’iil ayaa qaar ka mid ah bulshada caalamka kala kulantay dhaleecayn ba’an, kaddib marki ay Axaddii shalay joojisay dhammaan sahaydi cuntada iyo dawada ee geleysay Marinka Gaza, isla markaana ka digtay cawaaqib dheeraadka ah, haddii aanan la kordhinin muddada xabbad-joojinta.

Dalalka Masar iyo Qatar oo ka mid ah dhexdhexaadiyaasha wadahadallada Israa’iil iyo Xamaas ayaa ku eedeeyay Israa’il in ay ku xadgudubtay sharciga caalamiga ah ee bani’aadannimada, isla markaana ay gaajadu u adeegsanayaan sida hubki oo kale.

Madaxa bini’aadantinimada ee Qaramada Midoobay Tom Fletcher ayaa go’aanka Israa’iil ku tilmaamay mid laga naxo, isagoo xusay in sharciga caalamiga ah ee bini’aadannimada uu si cad u sheegayo in ay waajib tahay ogolaashaha helitaanka gargaarka.

Hay’adda samafalka caafimaadka ee MSF ayaa iyaduna ku eedaysay Israa’iil in ay gargaarka u adeegsato gorgortan, taas oo ay ku tilmaantay wax aan la aqbali karin iyo wax laga xumaado.

Wajigii koowaad ee xabbad-joojinta ayaa xaqiijiyay qulqulka gargaar bani’aadannimo oo la geeyay Gaza, kaddib 15 bilood oo gaaja iyo duqeyn ah. Jaritaanka gargaarka ee Isra’il ayaa ku soo aadday xilli ay billow tahay bisha barakeysan ee Ramadan.

Axad 2, March 2025 {HMC} Marxuum Abwaan Cumar Muxumed Cawaale Gacaneey (Cumar Gubte aya galabta lagu dilay Magalada Buulabarde.

Geerida marxuumka aya timid kidib Markii ciidama kawada Tirsan Dowlada Soomaliya aay ka Dhax Bilaawatay Rasaas, Rasaasta ayaa lagu sheegay in aay Haleeshay Abwaanka sidoo kale waxa la Sheegay in laba Qof oo kale aay soo Gaareen Dhaawac.

Dhacdadaan ayaa Maanta Galingii Danbe waxa aay ka Dhacday Degmada Buulaburte ee Gobalka Hiiraan.

Cumar waxuu ahaa Abwaan aad looga yaqaano Gobalka Hiiraan, waxa uu aad uga soo muuqday Dagaaladi lagula Dagaalamaya kooxda Al-Shabaab Asigoona ugu qeeyb Qaatay Suugan aay Gabayo ka mid yahiin.

Shaqaaqada uu Abwaankaan ku dhintay sidoo kale Dhaawacyadu soo Gaarsiiyeen Dadka Rayidka ah aayaana Wili ka Hadlin maamulka Degmada Buulubarte.

Axad 2, March 2025 {HMC} Taliyaha Ciidanka Dhulka Xoogga Dalka Janeraal Sahal Cabdullaahi Cumar oo uu wehliyo Madaxweyne ku xigeenka Hirshabeelle mudane Yuusuf Axmed Hagar iyo masuuliyiin kale ayaa maanta dhiirigelin ugu tagay boqolaal ka tirsan Ciidamada xaq u dirirka deegaanka ee ku sugan deegaanka Xalfooleey oo dhacda xadka kala qeybiya goballada Hiiraan iyo Shabeellaha Dhaxe.

Taliyaha Ciidanka Dhulka S/Guuto Sahal Cabdullaahi Cumar ayaa Ciidamada xaq u dirirka deegaanka ku boggaadiyay doorka ay ku leeyihiin Dagaalka Dalka looga saarayo kooxda AS isagoona sheegay in dowladdu ay laba jibaarayso dadaalkeeda garab istaagga Ciidamada deegaanka.

Kooxda AS ayaa culees xoogan soo saartay Gobolada Hiiraan iyo SHabeelada Dhaxe halkaas oo maalmihii lasoo dhaafay dagaalo culus ku dhax-maray ciidanka xoogga iyo kuwa deegaanka oo is garabsanaya iyo kooxda AS.

Axad 2, March 2025 {HMC} Dowladda Soomaaliya ayaa sheegtay in meesha ka baxday cabsidii shacabka ay ka qabeen kooxaha AS, xilli uu dalka ka socda dagaal ka dhan ah kooxda AS.

La-taliyaha Amniga Qaranka, Xuseen Macallin oo wareysi gaar ah siiyey warbaahinta qaranka ayaa sheegay in shacabka Soomaaliyeed ay gareen hadda in si cabsi la’aan ah ay u soo bandhigaan xumaanta iyo dhagaraha Al-Shabaab.

Isbeddelkan weyn ayuu sheegay inay keentay kalsoonida shacabka ay ku qabaan dowladda, oo haatan dagaal culus kula jirta kooxda Al-Shabaab, iyadoo gacan ka helaysa dadka deegaanka ee Macawiisleyda.

“Shacabku waxa ay hadda gaareen in ay si toos ah u soo bandhigaan xumaanta Khawaarijta cabsi la’aan,” ayuu yiri La-taliyaha Amnig Qaranka.

Sidoo kale waxa uu tilmaamay in xilligii hore ay shacbku ka cabsan jireen magacyada argagixisada oo erayo afgarasho ah ay isticmaali jireen, taas oo meesha ka baxday kadib markii dowladda ay qaaday howl-gallada Al-Shabaab looga xoreeyay degaanno badan oo ka tirsan gobollada dalka.

La-taliyaha Amniga Qaranka ayaa sidoo kale wuxuu sheegay in si weyn loo wiiqay, lana soo afjaray illihii dhaqaalaha ee Shabaab, taasoo kaalin muhiim ah ka qaadatay dagaalka aya geesiyaasha ciidanka xoogga iyo kuwa deegaanka ay wadaan.

“Habraacyo sugan ayaa loo sameeyay oo lagula dagaalamo, loogana hortagayo farsamo walba oo Khawaarijta isku daydo in ay dhaqaale ku helaan,” ayuu yiri La-taliyaha Amniga Qaranka, Xuseen Macallin.