Talaado 18, Feb 2025 {HMC} Xoghayaha arrimaha dibadda ee Maraykanka Marco Rubio ayaa Isniintii shalay gaaray dalka Sacuudiga, isagoo madaxda Boqortooyada Sacuudiga kala hadlaya xabad joojinta Isaa’iil iyo Xamaas iyo masiirka Marinka Gaza hadii dagaalka la soo afjaro.

Dibloomaasiga sare ee cusub ee Mareykanka ayaa la kulmay Dhaxal-sugaha Sacuudiga Maxamed Bin Salmaan iyo Wasiirka Arrimaha Dibadda Faysal Bin Farxaan.

Wada hadalka mas’uuliyiinta ayaa ka dambeeyay kadib markii madaxweynaha Mareykanka Donald Trump uu ku baaqay in 2.3 milyan oo Falastiiniyiin ah laga raro Gaza lana geeyo dalalka deriska la ah, iyadoo Mareykanka uu markaas dib u habeyn ku sameeynayo dhulka ciriiriga ah ee ku teedsan badda Mediterranean-ka.

Qorshahaas ayaa waxaa dhaliilay oo kasoo horjeestay Sacuudiga iyo dalalka kale ee Caraba. Waxaa sidoo kale saluugay madaxda dalal badan oo xulafo la ah Mareykanka.
Rubio iyo Mohamed Bin Salmaan waxay hoosta ka xariiqeen muhiimadda ay leedahay isku-dubaridka Gaza, arrintaas oo gacan ka geysaneeysa amniga gobolka, sida ay sheegtay afhayeen u hadashay wasaaradda arrimaha dibadda Mareeykanka.

Tammy Bruce ayaa arrintan uga warrantay warbaahinta ka dib markii ay labada mas’uul kulmeen, hase yeeshee maysan sheegin wax wada-xajood ah oo ku saabsan soo jeedinta Trump.

Tammy Bruce ayaa sheegtay in labada mas’uul ay xaqiijiyeen sida ay uga go’an tahay hirgelinta xabbad joojinta Gaza iyo in la xaqiijiyo in Kooxda Xamaas ay sii deeyso dhamaan la haystayaasha, oo ay ku jiraan muwaadiniin Mareykanka.

Talaado 18, Feb 2025 {HMC} Diyaarad rakaab wadday oo ay leeday shirkadda Delta Air Lines ee dalkan Mareykanka ayaa Isniintii shalay ku rogmatay, garoonka diyaaradaha caalamiga ah ee magaalada Toronto, shilkaas oo dhaliyay dhaawac soo gaaray ilaa 19 qof oo ay ku jiraan saddex ruux oo ay xaaladdoodu aad u liidato.

Maamulka Garoonka Diyaaradaha Pearson ee magaalada Toronto ayaa xaqiijiyay, in shilka uu dhacay shalay abaaro 2:15 daqiiqo ee galabnimo, kaddib marki ay dayaaraddu rogmatay isla markaana dusha ku istaagtay xilligi ay soo caga dhiganeysay jidka ay diyaaradaha ku ordaan.

Dayaaradda oo ay saarnaayeen 76 rakaab ah iyo 4 ka mid ah shaqaalaheeda ayaa kasoo duushay magaalada Minneapolis. Dhammaan 80-ki qof ee la socday diyaaradda ayaa lasoo badbaadiyay.

Saraakiisha ayaa sheegay in ay u badantahay in shilka diyaaradda uu sababay baraf xoog leh oo ka da’ay magaalada Toronto. Muuqaal laga soo duubay shilka ayaa muujiyay diyaaradda oo dusheeda ku fadhida iyo shaqaalaha gurmadka oo ku xoomman aaggaasi.

Sida laga soo xigtay Adeegga Saadaasha Hawada ee Canada, garoonka diyaaradaha waxaa buuxiyay baraf, iyadoo ay jireen dabeylo ku socday xawaare dhan 51 kiilomitir saacaddiiba, halka darajada qabowga ay ka hooseysay -8.6 selsiyas.

Waa shilki afraad ee diyaaradeed ee ka dhaca Waqooyiga America tan iyo bishi hore. Diyaarad helikobter ah iyo mid rakaab wadday ayaa 29-ki Janaayo iskula dhacay agagaarka magaalada Washington ee caasimadda Mareykanka, halkaas oo ay ku dhinteen ilaa 67 qof oo u badnaa rakaabki diyaaradda.

Shil kale oo ka dhacay magaalada Philadelphia, ayaa waxaa ku dhintay 6 qof, kaddib marki ay dhacday diyaarad yar oo nuuca caafimaadka. 10 qof oo kale ayaa iyaguna ku dhintay shil diyaaradeed oo ka dhacay gobolka Alaska.