Arbaco 28 Juun 2026 {HMC} Amiirka dhaxal sugaha Sacuudiga Maxamed bin Salman ayaa sheegay in Boqortooyada aysan ogolaan doonin in hawadeeda ama dhulkeeda loo isticmaalo weerar militari oo ka dhan ah Iiraan.

Hadalkan ayaa yimid intii lagu jiray wicitaan taleefan oo dhexmaray amiirka dhaxal sugaha, oo sidoo kale ah ra’iisul wasaare, iyo Madaxweynaha Iiraan Masoud Pezeshkian, sida ay ku warantay Wakaaladda Wararka Sacuudiga (SPA) Talaadadii.

Bin Salman ayaa xaqiijiyay “mowqifka Boqortooyada ee ku aaddan ixtiraamka madaxbannaanida Jamhuuriyadda Islaamiga ah ee Iiraan,” isagoo carabka ku adkeeyay in Sacuudi Carabiya “aysan u oggolaan doonin isticmaalka hawadeeda ama dhulkeeda falal militari oo ka dhan ah Jamhuuriyadda Islaamiga ah ee Iiraan ama weerar kasta oo dhinac kasta uu qaado, iyadoon loo eegin meesha ay u socdaan.”

Waxa kale oo uu ku celiyay taageerada Sacuudi Carabiya ee “dadaallo kasta oo loogu talagalay in lagu xalliyo khilaafaadka iyada oo loo marayo wadahadal si kor loogu qaado amniga iyo xasilloonida gobolka.”

ISHA:AA

Arbaco 28 Jun 2026 {HMC} Xildhibaannada ka soo jeeda Beesha Gadabuursi ee ka tirsan Golaha Wakiillada Somaliland iyo wasiirka Arrimaha gudaha Sandheere ayaa yeeshay kulan fashilmay isku Afgaram waayeen xaaladda ka jirta gobolada Awdal iyo Salal.

Kulanka oo ahaa mid xasaasi ah ayaa lagaga wada hadlayay xaaladda guud ee Gobolada Salal iyo Awdal gaar ahaan cabashooyinka la xidhiidha ciidamada Somaliland ee la sheegay in si joogto ah loogu daabulayo gobolka, taas oo xildhibaannadu ku tilmaameen mid walaac iyo culays ku ah shacabka deegaanka.

Xildhibaannadu waxay wasiirka u gudbiyeen dareenka, xaalada Amaan ka jirta galbeedka iyo cabashada shacabka reer Awdal, iyagoo si cad u sheegay in haddii aan wax muuqda laga qaban dhibaatada iyo cadaadiska ay sheegeen in lagu hayo bulshada beelaha Gadabuursi

Xogaha ayaa intaas ku biiranaya in kulanku ku dhamaaday is-afgarasho la ‘aan islamarkaana aanu jirin go’aan Cad ah oo lagu qanciyay xildhibaannada, taasoo keentay inay si caro leh uga baxaan xafiiska wasiir cabdalle Sandheere

Arrintan ayaa kusoo beegmaysa xilli ay sii kordhayaan walaacyada siyaasadeed iyo amni ee ka taagan Awdal iyo Salal kuwaas oo u baahan xal degdeg ah iyo wada-hadal miro dhal ah.

Arbaco 28 Jun 2026 {HMC}  Booliiska ayaa sheegay in dhowr qof oo shacab ah la xiray intii lagu jiray mudaharaad ka dhacay bannaanka hoteel lagu tuhunsanaa in uu ku sugnaa Taliyaha Ilaalada Xudduudaha Gregory Bovino xalay, ka dib markii dadku ku qeyliyeen oo waxyeello u geysteen hanti dadweyne kun tuureen walxo askarta. Booliisku waxay sheegeen dadka aan amarada kala dirista u hoggaansamin ama falal dambiyeed sameeyay in la xiray.

Mudaharaadka ayaa ka dambeeyay dilkii naxdinta lahaa ee Alex Pretti, oo ahaa kalkaaliye caafimaad, oo lagu toogtay Minneapolis intii uu socday hawlgal ay fuliyeen wakiillo federaal ah kuwaas oo qayb ka ahaa kordhinta howlgallada ICE ee Minneapolis.

Booliiska gobolka Minnesota iyo dadweynaha ayaa ka careysan sida kiisaska dilalka ah ee ay geysteen ciidamada federaalka ay u dhaceen, gaar ahaan iyadoo muuqaal laga soo qaaday uu muujinayo in Pretti uusan hanjabaad u gaysan markii rasaas lala dhacay.

Wararka ugu dambeeya waxay sheegayaan in Gregory Bovino uu ka baxayo Minneapolis maanta, iyadoo arrinta dilka Pretti ay keentay cadaadis siyaasadeed iyo dibadbaxyo sii xoogaysanaya.

Madaxweyne Trump ayaa u magacabay Tom Homan inuu ka talo geliyo howlgalka dhulka ka socda.

Mudaharaadayaasha ayaa ku baaqaya in la baabi’iyo hay’adda ICE iyagoo ku qaylinayay erayo ka dhan ah ICE.

Arbaco 28 Jun 2026 {HMC} Madaxweynihii hore ee Maraykanka Joe Biden ayaa ka hadlay xarigga iyo masaafurinta muhaajiriinta ee ka dhacday Minneapolis, isaga oo sheegay in dhacdooyinka toddobaadyadii u dambeeyay ay ka hor imanayaan mabaadi’da aasaaska u ah dalka.

Waxa uu yidhi Maraykanku ma aha waddan muwaadiniintiisa lagu toogto waddooyinka, mana aha mid oggolaanaya in dad lagu silciyo ama lagu cadaadiyo ku dhaqanka waxyaabaha uu Dastuurku u oggol yahay inay sameeyaan.

Hadallo u muuqday kuwo si dadban loogu jeediyay Donald Trump, ayuu Mr. Biden ku sheegay in aanu jirin hal qof, xitaa madaxweynaha, oo burburin kara qiyamka iyo himilooyinka Maraykanka.

Arbaco 28 Jun 2026 {HMC} Madaxweynaha Mareykanka ,Donald Trump ayaa caawa digniin u diray Ciraaq, isagoo sheegay in Mareykanku uusan mar dambe caawin doonin Ciraaq haddii Nouri al-Maliki loo doorto ra’iisul wasaaraha cusub.

Trump wuxuu farriintiisa ku caddeeyay in taageerada Mareykanka ay ku xirnaan doonto jihada hoggaanka cusub ee Ciraaq, taas oo muujinaysa cadaadis siyaasadeed oo toos ah oo Mareykanka ka imaanaya, xilli suurtagalnimada dib u soo laabashada Nouri al-Maliki ee xilka ra’iisul wasaaraha.

Nouri al-Maliki, oo xilka ka degay sanadkii 2014 kadib cadaadis xooggan oo Mareykanka ka yimid, ayaa hadda loo doortay musharrax ra’iisul wasaare oo ay wataan xulafada ugu waaweyn Shiicada ee Ciraaq, taasoo ka dhigan in si rasmi ah loogu soo magacaabi karo xilka, isagoo xataa booqday Tehran , halkaa oo uu kula soo kulmay hoggaamiyaha sare ee Iiraan, Cali Khamenei.

Talaado 27 Jun 2026 {HMC} Turkiga ayaa isu diyaarinaya xaalad ugu darran oo ay wajahi karto Iiraan, haddii uu Mareykanku weerarro, iyadoo Turkiga uu qaaday tallaabooyin lagu sameynayo aag xannibaad ah (buffer zone) oo ku yaalla dhinaca xadka Iiraan, si looga hortago hir cusub oo qaxooti ah oo u soo gudba Turkiga.

Mas’uuliyiin Turkiga ah ayaa u sheegay Baarlaaanka Turkiga, inay qorsheynayaan joojinta muhaajiriinta, isla markaana ay horey u adkeeyeen ammaanka xadka. Xadka waxaa lagu xoojiyay darbiyaal, godad, munaarado ilaalin ah, diyaarado aan duuliye lahayn iyo nidaamyo kormeer oo casri ah.

Sidoo kale, mas’uuliyiinta Turkiga ayaa sheegay in dibadbaxyadii dhawaan ka dhacay Iiraan ay sababeen qiyaastii 4,000 qof oo dhintay iyo 20,000 oo dhaawac ah, xilli sicir-bararka ka jira gudaha Iiraan uu sare u kacay , qiimaha lacagta Iiraana ay ku jirto xaalad burbur ah.

Talaado 27 Jun 2026 {HMC} Madaxweynaha Mareykanka, Donald Trump ayaa caawa sheegay inuu telefoon kula hadlay madaxweynaha Suuriya Axmed Sharac, kuna tilmaamay;hoggaamiye si weyn loo ixtiraamo.

Hadalkan wuxuu yimid wax yar kaddib markii Aqalka Ruushka ee Kremlin-ka uu shaaciyay in madaxweynaha Ruushka Vladimir Putin uu martiqaad rasmi ah u diray Sharac, si ay 28-ka Janaayo wadahadallo ugu yeeshaan Moscow, kuwaas oo la xiriira isbeddelladii u dambeeyay ee ka dhacay Suuriya iyo xaaladda guud ee gobolka.

Trump, isagoo ka hadlayay wada-hadalka uu la yeeshay Sharac, wuxuu sheegay in xaaladda Suuriya ay si fiican u socoto, isla markaana ay ku faraxsan yihiin waxa halkaas ka socda. Hadalkaas waxaa si guud loo fahmay inuu la xiriiro tallaabooyin ay dowladda Sharac dib ugu soo ceshatay dhulal horey uga baxsanaa gacanta dowladda, gaar ahaan meelihii ay joogeen ciidamada Kurdiyiinta.

Falanqeyn;

In Axmed Sharac uu mar keliya helo hadal togan oo ka imanaya Trump, isla markaana uu martiqaad rasmi ah ka helo Putin, waxay muujinaysaa ; Sharac hadda waa hoggaamiye ay quwadaha waaweyn u arkaan hoggaamiye ay la shaqeyn karaan.

Mareykanku wuxuu u muuqdaa inuu doonayo xasillooni iyo kala dambeyn, isagoo aan rabin firaaq amni oo cusub, halka Ruushkuna uu doonayo in uu sii hayo saameynta uu ku leeyahay Suuriya isla markaana hoggaamiyo marxaladda isbeddelka.Sharac arrintan waxay u tahay fursad weyn, wuxuu helay waqti iyo taageero uu ku xoojiyo awoodda gudaha.

Ugu dambeyn, aqbalaadda ay Trump iyo Putin u muujiyeen Sharac waxay si cad u tusaysaa in hoggaamiye kasta oo si dhab ah u maamula dhulka oo xaaladda gacanta ku haya, uu heli karo aqoonsi iyo la macaamil caalami ah, xitaa haddii weli lagu muransan yahay nidaamka siyaasadeed ee dalkaas.