Khamiis 29, Jan 2026 {HMC} Ciidanka dalka Iiraan ayaa maanta helay dufcaddii ugu horreysay oo ka kooban 1,000 diyaaradaha aan duuliyaha lahayn ah (drones), kuwaas oo loo qaybiyay qaybaha kala duwan ee ciidanka.

Tallaabadan ayaa timid xilli ay cirka isku sii shareertay xiisadda kala dhaxaysa dalka Maraykanka, kaddib markii madaxweyne Donald Trump uu ugu goodiyay Teheran weerar milatari haddii ay diiddo inay saxiixdo heshiis cusub oo ku saabsan barnaamijkeeda Nukliyeerka.

Taliyaha guud ee ciidanka Iiraan, Amir Hatami, ayaa sheegay in ciidanka ay xoojinayaan cududdooda istiraatiijiyadeed si ay uga jawaab bixin karaan hanjabaad kasta, isagoo ballan-qaaday jawaab “burburin ah” oo ka dhan ah cid kasta oo soo weerarta.

Dhanka kale, ciidanka badda ee Ilaalada Kacaanka Iiraan (IRGC) ayaa ku dhawaaqay inay 1-da iyo 2-da bisha Febraayo dhoolatus ciidan oo ay adeegsanayaan rasaasta nool ah ka fulin doonaan marin-biyoodka Hormuz.

Marinkan oo ah midka ugu muhiimsan caalamka ee laga dhoofiyo saliidda, ayaa xudun u ah loolanka juquraafi-siyaasadeed ee u dhexeeya Iiraan iyo quwadaha reer galbeedka.

Khamiis, 29, Jan 2026 {HMC} Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Wasiirka Maaliyadda Dowladda Jabuuti, Mudane Elyaas Muuse Dawaale, waxa ayna ka wada hadleen xoojinta iyo horumarinta iskaashiga dhinacyada maaliyadda iyo maalgashiga.

Ra’iisul Wasaare Xamsa, ayaa wasiirka la wadaagay horumarka ay dowladda Soomaaliya ka gaartay kobaca dhaqaalaha, dib-u-habeynta maaliyadda iyo kaabeyaasha dakhliga dalka oo meel aad u wagaansan soo gaaray sanadihii dambe, kadib dadaalladii ay sameeyeen hey’adaha dowladda iyo shacabka Soomaaliyeed.

Wasiirka Maaliyadda Dowladda Jabuuti, ayaa Ra’iisul Wasaaraha la-wadaagay muhiimadda ay leedahay dardar-gelinta iskaashiga maaliyadeed ee labada dal, wada shaqeynta dhanka mashaariicda horumarineed, iyo sidii loo kobcin lahaa ganacsiga iyo maalgashiga gobolka Geeska Afrika.

Wasiirka oo Muqdisho u yimid ka qeybgalka shirka 27-aad ee Madasha Hindisaha Geeska Afrika (Horn of Africa Initiative), oo ay martigalisay caasimadda Muqdisho isla markaana ay Soomaaliya guddoon ka tahay sannadkan, ayaa xaqiijiyay in ay dowladda Soomaaliya horumar ka gaartay kobaca dhaqaalaha iyo dakhliga.

Ra’iisul Wasaare Xamsa Cabdi Barre, ayaa adkeeyay muhiimadda ay leedahay iskaashiga dhaqaalaha iyo is-dhaafsiga ganacsiga oo ka hirgala gobolka iyo mudnaanta ay Soomaaliya u leedahay ka faa’iideysiga maalgashiga gaar ahaan macdanta,

korontada iyo wax-soo-saarka, taasi oo keenaysa in Gobolka Geeska Afrika uu xaqiijiyo isku filnaansho dhaqaale oo lagaga maarmo kaalmo shisheeye.

Khamiis, 29, Jan 2026 {HMC} Dowladda Federaalka ayaa guud ahaan hawada Soomaaliya u diidday diyaaradda Israa|l ee Arkia, iyada oo shirkadda diyaaraddan ay sheegtey in ay ku khasbanaan doonto in ay ka wareegto hawada Soomaalida, sida uu ku warramay wargeyska Ynetnews.

DFS weli arrintan kama soo saarin war-rasmi ah, waxa se tani imanaysaa xilli weli ay taagan tahay xiisadda Muqdisho & Telaabiib, ka dib aqoonsiga Somaliland.

Soomaaliya ma siinin shirkadda diyaaradaha ee Israa’iil ee Arkia ogolaansho ay ku duuli karto hawadeeda, taasoo ah tallaabo ku qasbi karta shirkadda diyaaradaha inay beddesho marinkeeda duulimaadka ee Thailand haddii aan la helin oggolaanshaha horraanta Febraayo, sida ay sheegtay shirkadda diyaaradaha.

Dib u dhaca ayaa yimid iyadoo ay jirto xiisad diblomaasiyadeed ka dib go’aankii dhawaan Israa’iil ay ku aqoonsatay Somaliland inay tahay waddan madax-bannaan,

Tallaabadaas ayaa Soomaaliya si xooggan uga soo horjeesatay. Soomaaliya waxay diiday sheegashada madaxbannaanida Somaliland waxayna u aragtaa inay qayb muhiim ah ka tahay dhulkeeda.

Dhinaca Kale Dowladda Soomaaliya wali war rasmi ah sooma saarin oo arrintaan la xiriirta.

Isha wargeyska Ynetnews.

Khamiis, 29, Jan 2026 {HMC} Warbixinno isa soo taraya oo ka imanaya Mareykanka ayaa muujinaya in wadahadalladii u dhexeeyay Mareykanka iyo Iiraan ay fashilmeen.

Sababta ugu weyn waxay tahay in Iiraan ay doonayso heshiis caddaalad ku dhisan, halka Mareykanku uu ku adkeysanayo shuruudo u muuqda kuwo ka tarjumaya danaha Israa’iil, ee aan ahayn heshiis labada dhinac u siman.

Iiraan ma bixin wax tanaasul ah oo waaweyn, waxayna sheegtay in dalabyada Mareykanku ay yihiin arrimo gudaha u gaar ah Iiraan.

Arrintan, marka la eego sharciga caalamiga ah iyo madax-bannaanida dalalka, waa dood leh sal adag.

Haddaba, su’aasha taagan ayaa ah: maxaa loo hadli waayay hubka nukliyeerka iyo diyaaradaha dagaal ee Israa’iil, kuwaas oo khatar ku ah guud ahaan gobolka, isla markaana loo adeegsaday weerarro ka dhan ah dalal Carbeed iyo Iiraan? Maxaa xitaa dood looga dhigi waayay arrintaas?

Sida uu toddobaadkii yiri Ra’iisul Wasaaraha Canada, Mark Carney: “Haddii aadan miiska cuntada joogin, adiga ayaa ah cuntada miiska lagu cuni doono.” Oraahdan waxay si cad u muujinaysaa sida awoodda iyo go’aamada caalamiga ahi u shaqeeyaan.

Mareykanka wuxuu u muuqdaa mid doonaya in Bariga Dhexe laga dhigo gobol aan lahayn awood weerar, si dalalku ay u noqdaan daawadayaal kaliya marka la duqeeyo, iyagoo aan awood u lahayn inay iska difaacaan, tusaale ugu dhow waa weerarkii Israa’iil ka geysatay magaalada Dooxa ee caasimadda Qatar, markaa oo jawaabta ay noqotay kana keliya cambaarayn hadal ah.

Jawaabta Iiraan waxay ku saleysan tahay mabda’ ah “haddii la i weeraro, waan is difaacayaa”. Tani waa xaalad cusub oo gobolka ka soo muuqatay, tan iyo dagaalkii Masar ay hoggaaminaysay, kaas oo ku dhammaaday heshiiskii Camp David.

Heshiiskaas ka dib, Masar waa laga saaray isku-duubnidii militari ee Carabta, taas oo noqotay guul istaraatiiji ah oo Israa’iil gaartay.

Tani si cad ayaa looga arkay duullaankii Lubnaan 1982, markaas oo Lubnaan iyo ururradii Falastiiniyiinta lagu laayay indhaha Carabta hortooda, iyada oo aan jirin faragelin Carbeed oo mideysan.

Tan iyo xilligaas, isku-duubnidii Carabta way burburtay, arrinta Falastiinna waxay ka baxday inay noqoto arrin si wadajir ah Carab iyo Muslim u wada qaadaan.

Inkasta oo taas ay dhacday, Israa’iil ma joojin gardarradeeda.

Siyaasaddeedu waxay ku dhisan tahay ballaarin, degsiimooyin sharci-darro ah, iyo quursi ay u hayso Carabta, taas oo weli hurinaysa colaadda gobolka.

Dhinaca kale, Iiraan waxay muujisay ad-adayg iyo is-ixtiraam qaran, iyadoo keligeed u istaagtay cadaadis militari oo aad u weyn, kana imanaya quwadaha ugu awoodda badan dunida, isla markaana ay la socdaan taageero reer galbeed oo dhinac u janjeerta.

Dad badan waxay tan u arkaan muuqaal haybad, degganaan iyo kalsooni qaran, dal aan si sahal ah uga tanaasulin mowqifkiisa, kana adkeysanaya cadaadis kasta.

Khamiis, 29, Jan 2026 {HMC} Sida durba la dareemayo, dhaqanka aan xasilloonayn ee Donald Trump iyo qaabka uu ula dagaallamayo xulafada Mareykanka waxay dunida gelinayaan marxalad cusub.

Dalal badan ayaa maanta ka fikiraya in ay ballaariyaan xiriirkooda, isla markaana ay dib u eegaan nidaamka dhaqaale iyo maaliyadeed ee caalamka, nidaam muddo dheer ku tiirsanaa Mareykanka. Isbeddelkan sii xoogeysanaya, waddadiisu si cad waxay u sii maraysaa Shiinaha.

Arrintan waxaa tusaale cad u ah booqashada Ra’iisul Wasaaraha Ingiriiska ee Shiinaha, iyo kulankii uu la yeeshay Madaxweynaha Shiinaha. Ra’iisul Wasaaraha Ingiriiska , Keir Starmer ayaa si toos ah u sheegay in aysan macquul ahayn in la iska indha-tiro Shiinaha, maadaama uu yahay dhaqaalaha labaad ee ugu weyn dunida, isla markaana Ingiriisku uu u baahan yahay iskaashi istaraatiiji ah oo muddo dheer ah, joogto ah, kana dhammaystiran dhammaan dhinacyada.

Madaxweynaha Shiinaha, Xi Jinping ayaa isna si daahfuran u qirtay in xiriirka Shiinaha iyo Ingiriiska sanadkii la soo dhaafay uu ahaa mid qalqal galay, balse wuxuu xusay in xaaladda caalamiga ah ee maanta jirta ay tahay mid adag oo caqabado badan leh, taas oo ka dhigaysa wada-hadalka iyo iskaashiga laba dal mid lama huraan ah.

Wuxuu carrabka ku adkeeyay in Shiinaha iyo Ingiriiska, maadaama ay yihiin laba dal oo miisaan culus ku leh dunida, kana tirsan Golaha Ammaanka ee Qaramada Midoobay, ay mas’uuliyad gaar ah ka saaran tahay xoojinta wada-hadalka iyo iskaashiga, si ay door muuqda uga qaataan xasilloonida iyo jihaynta nidaamka caalamka. Madaxweynaha Shiinaha ayaa intaa ku daray in waqtiga booqashada Ra’iisul Wasaaraha Ingiriiska uu yahay mid astaan leh, isla markaana uu rumeysan yahay in iskaashiga labada dal uu gaari doono heer ka sarreeya kii hore, lana furi doono bog cusub oo xiriirkooda ah.

Isbeddelladan dhaqaale iyo diblomaasiyadeed ee socda ayaa si toos ah u saameeyay hoos u dhaca dollarka Mareykanka iyo kororka qiimaha dahabka. Sababtu waa kalsooni-darro sii kordheysa oo caalami ah oo laga qabo dhaqaalaha Mareykanka, gaar ahaan marka la eego siyaasadaha qalafsan iyo farriimaha is khilaafsan ee ka imanaya Washington.

Ugu dambeyn, Trump oo isku muujiyay badbaadiyaha dhaqaalaha Mareykanka, ayaa maanta u muuqda inuu si dadban u noqday mid ka mid ah sababaha ugu waaweyn ee qalalaase dhaqaale oo iman kara. Qalalaase aan kaliya saameyn doonin Mareykanka, balse laga yaabo inuu si buuxda dib ugu qaabeeyo nidaamka dhaqaale ee dunida.

Khamiis, 29, Jan 2026 {HMC} Warbixin lagu daabacay shabagga wararka Axios ayaa sheegtay in labada saraakiil ee sare ee Mareykanka ay kulmayaan madaxda ammaanka iyo difaaca ee Israa’iil iyo Sacuudi Carabiya si ay uga wada hadlaan xaaladda ku saabsan Iiraan, iyadoo ay jirto welwel sii kordhaya in Mareykanku uu weerar ku qaado Iiraan.

Kulamada oo ka dhacay Washington, DC, ayaa qayb ka ah dadaallada maamulka Madaxweyne Donald Trump uu ku qiimeynayo khiyaarada u furan ee ku aadan dagaal milateri ee ka dhan ah Iiraan, iyadoo la rumeysan yahay in Trump weli go’aan kama dambeys ah aanu gaarin.

Saraakiisha Israa’iil ayaa la sheegay inay la wadaageen Washington macluumaad sirdoon ah oo ku saabsan bartilmaameedyada suurtagalka ah ee Iiraan gudaheeda, halka Sacuudi Carabiya ay dhinaca kale diiradda saareyso xalka diblomaasiyadeed si loo ka fogaado dagaal ballaaran oo gobolka ka dhaca.

Warbixintu waxay intaas ku dartay in Sacuudi Carabiya aysan oggolaan doonin in hawadaheeda ama dhulkeeda loo isticmaalo howlgal milateri oo ka dhan ah Tehran, iyadoo Sacuudiya waxay isku dayaysaa inay u gudbiso fariimo u dhexeeya Washington iyo Tehran si loo dejiyo xiisadaha.

Waxaa xusid mudan in ilaa hadda aysan jirin diblomaasiyad rasmi ah oo toos ah oo dhexmartay Washington iyo Tehran, isla markaana Iiraan ay ku hanjabtay in wax kasta oo tallaabo milateri ah loo qaado ay jawaab adag ka bixin doonto.

Khamiis, 29, Jan 2026 {HMC} Taliyaha Ciidanka Boliiska Soomaaliyeed Sarreeye Guuto Asad Cismaan Cabdullaahi ayaa shir gudoomiyey kulanka Todobaadlaha ee Hogaanada , Fadhiyada madaxa banaan , Qeybaha, Talisyada Dekedda iyo Garoonka Diyaaradaha oo looga hadlay Amniga , xoojinta Howlgalada ka dhanka ah maandooriyaha, Tahriibta sharci darada ah iyo u diyaar garowga Bisha barakaysan ee Ramadan oo foodda inagu soo haysa.

Saraakiisha soo xaadirtay kulanka ayaa Warbixino la xiriira shaqada ay hayaan looga dhagaystay waxayna si faah faahsan sharaxaad uga bixiyeen howlaha loo idmaday ee hortabinta u leh shaqada maadama uu kulankan yahay mid si joogta ah isla xisaabtan Saraakiisha loogu sameeyo si loo helo hufnaan si howlkarnimo ku jirtana loogu adeego Bulshada .

Taliyaha ayaa Saraakiisha uga Mahadceliyey dedaalka shaqo iyo isku xirnaantooda oo hadda sabab u noqotay in laga talaabo dal dalooladii ku imaan jiray shaqada iyo habacsanaantii mararka qaybtood sababta u noqon jirtay hoos u dhaca Amniga , waxaana uu faray in markasta xoojiyaan midnimada iyo wada shaqeynta dhexdooda .